Ruslan Abışov: “Vurduğum qol "Xəzər Lənkəran" azarkeşlərinə cavab idi”

“Xəzər Lənkəran”ın futbolçusu Ruslan Abışov Qol.Az-a müsahibə verib

- Nəhayət, “Xəzər Lənkəran” tilsimi qırdı və avrokuboklarda ilk qələbəsini qazanmaqla bərabər həm də mərhələ keçdi. Ancaq etiraf edək ki, ilk oyunda müqavimətini qıra bilmədiyiniz rəqibinizi bu dəfə rahat məğlub etməyiniz bir qədər gözlənilməz oldu...

- Biz bu qələbəni qazanmağı çox istəyirdik. Beynimizdə bir fikir var idi: qələbə qazanıb mərhələ keçmək. Çox şadam ki, istədiyimiz nəticəni əldə etdik.

- İlk qol çox vacib idi ki, həmin qola da sən imza atdın. Epizodu bizim üçün qısaca şərh edə bilərsən?

- Adrian Pit cərimə zərbəsindən ötürmə verdi. Mən də düzgün mövqe seçərək, topu qapıdan keçirdim.

- Lənkərandakı matçdan fərqli olaraq, bu dəfə sonuncu müdafiəçi yox, dayaq yarımmüdafiəçisi mövqeyində oynadın. Halbuki daha əvvəllər də bu mövqeydə özünü rahat hiss etmədiyini demisən...

- Sırf taktika ilə bağlı bu mövqeydə oynamalı oldum. Çünki rəqibi mərkəzdə sıxmalıydıq ki, rahat oynamasınlar.

- Növbəti rəqib “Lex”di. Razılaş ki, “Lex” “Nomme Kalyu” deyil.

- Təbii, “Lex” güclü komandadır. Amma keçilməz deyil. Yəqin ki, məşqçilər korpusu rəqibi dərindən analiz edib buna uyğun tapşırıqlarını verəcəklər. Hər halda əlimizdən gələni edəcəyik ki, ikinci mərhələni də keçək.

- Lənkəran azarkeşləri komandanın hücum xəttindən narazılıq edirlər. Səncə, bu mövqeyə yeni oyunçu almağa ehtiyac var?

- Bu mövqeydə oynayan Subaşiç heç də pis təsir bağışlamır. Lənkəranda da qol vurdu, Estoniyada da. Yeni hücumçuya ehtiyac olub-olmaması ilə bağlı məsələ isə komandanın baş məşqçisinin səlahiyyətində olan məsələdir.

- Klubunuzun fəxri prezidenti Mübariz Mənsimov oyudan sonra nə dedi?

- Mübariz müəllimin orada olması bizə böyük ruh verdi. Çünki o, son vaxtlar komandanın səfər oyunlarına getmirdi. Bu dəfə gəldi və qarşılaşmadan əvvəl də bizimlə görüşüb ruh verdi. Ancaq oyundan sonra düzü, görmədik. Deyəsən, işlərinin çoxluğu səbəbindən bir qədər tez getdi.

- Mərhələni keçən ilk komanda siz oldunuz. “İnter” də demək olar ilk mərhələ səddini dəf edib.  Növbə “Bakı” və “Neftçi”nindi. Nə düşünürsən, onlar da sizin uğurunuzu təkrarlaya  biləcək?

- Tam səmimi deyirəm, “İnter”ə də “Neftçi”yə də, “Bakı”ya ürəkdən azarkeşlik edəcəyəm. İnanıram ki, onlar da növbəti mərhələyə vəsiqə qazanacaqlar.

- Yeri gəlmişkən, necə düşünürsən, vurduğun dünənki qola “Neftçi” azarkeşləri hansı reaksiyanı verər?

- Artıq reaksiya veriblər (gülür). “Neftçi” və onun azarkeşləri ilə heç vaxt problemim olmayıb və ola da bilməz. İnanırsınız, dünən ard-arda  10-12 nəfər “Neftçi” azarkeşi zəng edib məni təbrik edib və bu uğuruma sevindiklərini bildiriblər. Mən də burdan dəstəklərinə görə, onlara öz minnətdarlığımı çatdırıram.

- Bəs, “Xəzər Lənkəran” azarkeşləri haqqında nə düşünürsən?

- Bir kəlmə deyim, “Nomme Kalyu” ilə Lənkərandakı oyunda 15 min azarkeşin bir ağızdan “Ruslan, Ruslan” deyib alqışlaması mənə böyük ruh verdi. Burdan onlara da “sağ ol” deyirəm. Düşünürəm ki, elə dünən vurduğum qolla həm də “Xəzər Lənkəran” azarkeşlərinin dəstəyini cavablandırmış oldum. Bundan sonra da çalışacam ki, oyunum və qollarımla onların inamını, dəstəyini doğruldum.

- Səhv etmiriksə, “Xəzər Lənkəran”la müqaviləndə belə bir bənd var ki, əgər hansısa səviyyəli əcnəbi klub səni istəsə, Lənkəran klubu gedişinə problem yaratmayacaq...

- Bəli, düzdür, müqavilədə elə bir bənd nəzərdə tutulub. İnşallah, yaxşı təklif olarsa və daha güclü çempionatda oynamaq şansı yaranarsa, “XəzərLənkəran” rəhbərliyi gedişimə problem yaratmayacaq.

- Dünənki oyundan sonra verdiyin açıqlamada “bizi istəməyənlər uduzmağımızı arzulayırdılar” ifadəsini işlətmisən. Yetərincə, ciddi ittihamdı. Yəni, elə azərbaycanlı tapıla bilər ki, “Xəzər Lənkəran”ın məğlubiyyətini arzulasın?

- Gəlin, bu haqda danışmayaq.

Anar XANLAROV