"Mən reallığa yox, öz adımıza aldandım" - Samir Abasov

"Neftçi"nin baş məşqçisi Samir Abasov Misli Premyer Liqasının 21-ci turunda "Şamaxı"ya 1:0 hesabı ilə qalib gəldikləri oyunu şərh edib. 

QOL.az xəbər verir ki, o, matçdan sonra keçirilən mətbuat konfransında deyib:

- Çempionatda olan komandaların hamısı bizim üçün çətin, möhkəm komandalardır. Baxmayaraq ki, öz meydanımızda oynayırdıq, hazırda asan oyunlar yoxdur. Özünüz görürsünüz ki, bütün komandalar bir-birilərindən necə xal alırlar. Bütün oyunlarda bu cür əziyyətlərin olması normal bir şeydir. Oyundan razı qaldım. Qol epizodları da yaratdıq. Həmin şansları qola çevirə bilmədik. Ən xoş olan məqam odur ki, bu gün nizam-intizamı qoruya bildik, rəqibə şans vermirdik. Bu da rəqibin heyətində olan fərqli  və müxtəlif tərzdə oynaya biləcək oyunçularının bizə çətinlik yaratmasına gətirib çıxardı. Komandamızın bunların öhdəsindən gəlməyi xoş məqam idi. Kuboka köklənmişik. Üç gündən bir oyunlarımız olacaq, ağır həftəyə giririk. Kubok oyunu da səfərdədir. Futbolçularımız da həmən bu oyundan sonra dincəlib növbəti matça hazırlaşmalıdırlar. Ona görə də bu oyun psixologiya, motivasiya cəhətdən önəmli idi. Futbolçulara təşəkkür edirəm. Görəcək işimiz var. Bəzi məqamlar var ki, onların daha yaxşı və tez olmasını istəyirəm. İnşallah, inanıram ki, yaxşı bir şeylərə gəlib çıxacağıq. 

- "Araz-Naxçıvan"a qarşı məğlubiyyətdən sonra bəzi oyunçular daha yaxşı oynamağa başladılar. Həmin oyundan sonra komandada nələri dəyişdiniz?

- Ötən matçdakı məğlubiyyətin ən böyük günahkarı kimi özümü görürəm. Çünki mən reallığa yox, öz adımıza aldandım. Dəyişikliklər etdim və düşündüm ki, qışdan sonra gəlmişik, "Sabah"la matçda da az hücum etdik. Baxmayaraq ki, nizamlı oynamışdıq və, bəlkə də, həmin oyun elə bir topluq oyun idi. Amma "Araz-Naxçıvan"la oyunda düşündüm ki, daha çox hücum etməliyik, matçı hücumda keçirməliyik. Bu adımızı reallıqdan daha üstün tutdum. Ağır nəticəsi də göz qabağındadır. Bugünkü görüşdə isə reallıqları ortaya qoyduq. Çünki hazırda meydanda nizam-intizamı qorumalıyıq, rəqibə şans verməməliyik və ondan sonra da az epizodlar olsa da, onlara girməliyik. Bizim komandamızın reallığı budur. Bir oyun üslubu istəyirsənsə və bu oyun üslubu adımıza görə daim hücumda olmaqdırsa, buna həmin an gəlmək olmaz. Bunun üçün böyük işlər görməlisən. Qapıçıdan hücumçuya kimi davam edən bir prosesdir. Açığı, həmin məğlubiyyətdən sonra öz qərarıma çox üzüldüm. Ondan sonra bir şeylər dəyişmədik, sadəcə futbolçuları oyuna bu cür köklədik. Ayrılıqda tapşırıqlar verdik və hazırda bizə nəyin önəmli olduğunu bildirdik. Daha öncə dedim ki, narazı olduğum məqamlar var. Bu da bəzən tələskənliyimiz və topu lazımsız yerdə itirməyimizlə bağlıdır. Onu da indiki vəziyyətdə başa düşürəm. Futbolçular sırf qazanmaq fikri ilə çıxdıqda bu cür şeylər olur. Ötən oyundan sonra dəyişdiyimiz şey odur ki, təzədən reallığa qayıtdıq. Düşünürəm ki, bununla da hələ ki davam etməliyik.

- Matçın ilk 30 dəqiqəsi rəqib daha üstün oldu...

- Ştoqrin uzun müddət oyundan çıxdı və bunun ani olduğu üçün, onun yerinə girən Koffi hələ özünə gəlməmişdi. Həmin anda rəqibə üstünlük verdik. Amma ondan sonra üstünlüyü yenə ələ aldıq. Lakin üstünlükdən düzgün istifadə edə bilməmək bayaq qeyd etdiyim narazı məqamlardan biridir. Bunları da düzəldəcəyik, çünki üzərində çox işləyirik.