Ayxan Abbasov: "Sona qədər bu gərginliyin içində olmaq istəyirik"

Ayxan Abbasov: "Sona qədər bu gərginliyin içində olmaq istəyirik"
ÖLKƏ FUTBOLU 24 Fevral 2024 / 18:15 1507
-  A +

"Öz meydanımızda oynayırdıq. Ona görə də qələbə qazanmaq istəyirdik. Futbolçularıma təşəkkür edirəm. Sona qədər mübarizə apardılar, təslim olmadılar. Azarkeşlərimiz hər rəqibə Tovuz səfərini hiss etdirirlər”.

QOL.az xəbər verir ki, bu sözləri “Turan Tovuz”un baş məşqçisi Ayxan Abbasov Misli Premyer Liqasının 24-cü turunda “Neftçi” ilə bərabərə qaldıqları oyun (1:1) barədə danışarkən deyib.

O bildirib ki, bugünkü matça komandası üçün uduzmamaq önəmli idi: “Hər iki tərəf qələbə qazanmaq istəyirdi. Rəqibin fərdi keyfiyyətləri yaxşı olan futbolçuları var. Ofsayd xəttini necə çəkdilər, bilmirəm. Filip Ozobiç öndə görünürdü. "Neftçi" ilə matçda məğlub olmamaq önəmli idi. Çempionat gərginləşir. Sona qədər bu gərginliyin içində olmaq istəyirik".

Abbasov bugünkü matça heyətdə etdiyi dəyişikliklərin səbəbini belə izah edib: “Heyəti qurmaqda çətinlik çəkirəm. Yaxşı rəqabət var. Əsas heyətdə olmayan futbolçular çox istəkli idilər. Bu gün sonradan meydana daxil olanlar can qoydular. Komanda belə olmalıdır. Qarşıdakı matçlarda da rotasiyalar olacaq”.

Mütəxəssis sonda yaranan gərginlik zamanı rəqib baş məşqçi ilə aralarında mənfi bir hadisənin yaşanmadığını bildirib: “Yəqin ki, hakimə düzgün məlumat vermədilər. Rəqibin baş məşqçisinə təşəkkür edirəm. Çox mədəni insandır. Hakim elə başa düşdü ki, biz mübahisə edirik”.

"Neftçi"dən icarəyə götürdüyünüz 3 futbolçuya şans verdiniz. Onları meydana buraxmaq riskli deyildi?” sualını Abbasov belə cavablandırıb: “Xeyr, riskli deyildi. Onlarda ikiqat motivasiyası var idi. İstəkləri görünürdülər. Hər birinin yaxşı potensialı var”.

O, son zamanlar Fərid Nəbiyevə az şans verməsinin səbəbini də açıqlayıb: “Bu gün qol vurdu, sual verilir. Amma 4-5 turdur Ayxan Quseynov qollar vururdu, bu suallar olmurdu. Səbəbi odur ki, onun yerinə oynayan futbolçu yaxşı çıxış edirdi. Rəqabətdir. Fərid bir az öz formasından aşağı çıxış edirdi. Amma onun potensialı var. Milli komandada oynamalı oyunçudur. Üzərində işləməlidir. Fərid qol duyumu olan futbolçudur. Ondan çox şey gözləyirik”.

“Turan Tovuz”un çalışdırıcısı matçın gedişi zamanı aqressiv olmasından da söz açıb: “İstəyirdik ki, futbolçulara qələbə ruhunu verək. Məğlub omaq istəmirdik. Bəzən özümüz də oyunun içində oluruq, hər şeyə reaksiya veririk. Bu da oyunun stressindən irəli gələ bilər”.

O, "Turan Tovuz"un futbolçularının milli komandaya dəvət almaması haqda da danışıb: “Turnir cədvəli təsir edir. Keçən il də öz klubunda oynamayan futbolçular milliyə dəvət olunurdu. Amma aşağı pillələrdə olan klubların futbolçularına daim diqqət edilmir. Ümid edirəm ki, yeni baş məşqçi bu detala fikir verəcək. Milli komandanın qapıları hər kəsə açıq olmalıdır”.

Daha çox


Son xəbərlər
21.04.24  16:00

"Arsenal"dan rekord

21.04.24  14:28

"Bavariya"dan ayrılır