"Kubok oyunlarını Xankəndidə keçirmək istəyirik" - Qurban Qurbanov

"Hər kəsi təbrik edirəm. Burada idman jurnalistləri üçün ilk konfransıdır. Həddindən artıq sevincliyəm. Neçə illər bunu həsrətlə gözləyirdik".

QOL.az xəbər verir ki. bu sözləri "Qarabağ"ın baş məşqçisi Qurban Qurbanov Azərbaycan Kubokunun 1/8 final mərhələsində Xankəndidə MOİK-ə 1:0 hesabı ilə qalib gəldikləri matçdan sonra təşkil olunan mətbuat konfransında deyib.  

O, belə bir tarixi oyunun keçirildiyinə görə çox sevincli olduğunu dilə gətirib: "Heç kim inana bilmirdi ki, ilk oyunumuz məhz Xankəndidə olar. Buna görə başda cənab prezident İlham Əliyev olmaqla, ordumuza təşəkkür edirəm. Şəhidlərə Allahdan rəhmət diləyir, qazilərə şəfa arzu edirəm. Onların sayəsində buradayıq. Bütün xalqımıza həmişə sağlam və xoşbəxt olmağı arzu edirəm. Oyundan danışmağa ehtiyac yoxdur. Bizim üçün çətin oldu. Həm həyəcan var idi, həm də sanki tam hazır deyildik. Burada futboldan başqa söhbətlər gedirdi - Xankəndi, Şuşa haqda danışılırdı. Buna görə bütün diqqət futbola ayrıla bilmirdik. Qolu da son dəqiqələrdə vurduq. MOİK sona kimi mübarizə apardı. Onlara təşəkkür edirəm. Futbolçularıma da təşəkkür edirəm, intizamlı oynadılar".

O, matçdan əvvəl MOİK-in belə yaxşı mübarizə aparacağını gözləmədiklərini deyib: "Bir neçə oyunlarının epizodlarına baxmışdıq, çox yaxşı müdafiə olunur, əks-hücumlara çıxa bilirdilər. Belə oyuna görə futbolçularda həyəcan var idi və performanslarını tam göstərə bilmirdilər".

Mütəxəssis 1/4 finala adlamaqları barədə bunları deyib: "Kubok oyunlarını Xankəndidə keçirmək istəyirik. Lakin bundan sonra bir oyun evimizdə olacaq, rəqib komandalar razılaşar, razılaşmaz bilmirik. Oyunlarımızı burada keçirmək istəyirik və düşünürəm ki, ciddi addımlar atılacaq".

Q.Qurbanov "Oyundan əvvəl prezident İlham Əliyev "İmarət" stadionunda yenidənqurma işlərinin başlayacağını bildirdi. Buna münasibətiniz necədir" sualını cavablandırıb: "Çox xoş oldu. Cənab prezidentin çox yaxşı siyasəti var, var-dövlətimizi geri qaytarmaq istəyir. Ağdamda "İmarət" uzun illər olub və indi oyun qaytarmaq, mədəniyyətimizi qoruyub-saxlamaq istəyir Təşəkkür edirəm ki, belə dərindən düşünür, diqqət ayırır. Stadion hazır olanda orada böyük məmnuniyyətlə oynamağa hazırıq".

O, Riçard Almeydanı əvəzləməsinə də toxunub: "Başından zədə aldı və özünü yaxşı hiss etmədi".

Mütəxəssis MOİK-in bu heyətlə Premyer Liqada mübarizə apara bilib-bilməyəcəyi haqda suala da cavab verib: Birinci "Liqada mübarizə aparacaq, yəqin, heyətini genişləndirəcək. Birdən-birə bizə qarşı belə mübarizə aparmaqları onlara əlavə stimul olacaq. Bu görüşdən sonra gələcəklə bağlı planları da çoxalacaq. Tarixi qoruyub-saxlamaq lazımdır".

Q.Qurbanov "Azarkeşlər komandanın daimi olaraq Ağdamda yerləşməsini istəyirlər. Legionerlər şəhərdən kənarda məskunlaşmaq istəməyə bilərlər. Bu haqda nə deyə bilərsiniz" sualına da münasibət bildirib: "Hazırda oyunlarımızı Bakıda keçiririk. "Qarabağ" Azərbaycanı təmsil edir və struktur, stadion tam hazır olandan sonra bu barədə geniş fikir bildirə bilərik. Klub olaraq həmişə istəmişik ki, xalqımız, vətənimiz üçün düzgün yol seçək, yaxşı nəticələr əldə edək. Hər  şey hazır olanda inanıram ki, doğru qərar veriləcək və oyunçular, matçlarla bağlı problem olmayacaq".

O, "Qarabağ" adının, şəhidlərimizin və qazilərimizin komandaya motivasiya verdiyini söyləyib: "Bu ad bizi məsuliyyətli edib. Heç vaxt bu adı unutmayacağıq və məsuliyyətsiz yanaşmayacağıq. Bu, o demək deyil ki, torpaqlarımız geri qayıtdı və bizə motivasiya vermək çətin olacaq. Şəhidlərimizi, qazilərimizi heç vaxt unutmayacağıq. Torpaqlarımız bizimlə olsa da, onlar yoxdur. Bizim üçün canlarından keçiblər. Bu klubda olmaq bizə böyük motivasiya verir. Motivasiyasız meydana çıxmayacağıq".

Q.Qurbanov qolun müəllifinin və qol ötürməsi verən futbolçunun azərbaycanlı olması haqda da danışıb: "Futbolçularım yaxşı oynadıqda, qələbə qazandıqda qürurlanıram. Futbol kollektiv oyunudur. Burada istənilən oyunçumuz qol vura, ötürmə edə bilər. Dəfələrlə bildirirəm ki, heç bir oyunçu arasında fərq qoymuram. Amma sırf onların qol vurması, ötürmə etməsi onları daha motivasiyalı edir".

Baş məşqçi Xankəndi şəhər stadionunun durumundan söz açıb: "Stadion olaraq hər şey müasir standartlara uyğundur. Meydança süni örtüklüdür. Baxmayaraq ki, Bakıda da belə meydançalarımız var. Meydança daha yaxşı vəziyyətdə olsa, hamı üçün sərfəli olar, baxımlı oyun keçər. MOİK-lə matç elə idi ki, meydançanı düşünmürəm. Bu meydança topla davranış üçün xoş olmasa da, buna göz yumacağıq. Meydançanın ot örtüyünün dəyişməsinin planda olacağına inanıram".

Q.Qurbanov sonda "Nəriman qol vursa da, oyundan sonra danışmaq istəmədi və dedi ki, Qurban Qurbanov qadağa qoyub" fikrinə belə münasibət bildirib: "Bu gün qadağa qoymamışdım. Onu bəzən belə müsahibələrdən uzaq saxlayıram. Harda görsəniz, müsahibə ala bilərsiniz".