50 illik ömrün ən böyük hədiyyəsi

Ömrümdə ilk dəfə stadionda peşəkar komandaların oyununu izləyəndə 14 yaşım vardı. "Neftçi" Sofiya "Lokomotiv"i ilə Bakıda qarşılaşırdı. 

Oyunun sonlarında  Qurban Qurbanov 100 faizlik epizodda şansı əldən verdi. Yanında dayanan daha təcrübəli Samir Ələkbərov ona üsyan etdi, hətta ağladı ki, niyə ötürmə vermədin qələbəni qaçırdıq...

Həmin matçda Yaşar Vahabzadənin son anlarda az qala mərkəzdən vurduğu fantastik qol ilə 2:1 qələbə qazandıq. Bu futbol tariximizdə ilk abrokubok qələbəsi idi.

Qurban Qurbanovla bağlı ilk xatirəm budu. Qurbanov futbolçu istedadı ilə seçilmirdi, amma çalışqanlığı, iradəsi, döyüşkənliyi, bunun sayəsində həm futbolçu, həm məşqçi kimi yüksəlişi gec-tez idman dərsliklərinə düşəcək. 

Rusiyada legioner həyatı yaşayanda Qurban artıq "qan edirdi" və köhnə "Xlebzavodun" yanında onun maşınında müsahibə götürdüm, inanılmaz səmimi və sadə olduğunu indiyəcən xatırlayıram.

Moskvada "Neftçi" - "Pünik"lə "Birlik kuboku" qarşılaşmasında zədə səbəbindən turnirdə iştirak etməsə də, məhz bu prinsipial matça görə Rusiya paytaxtına gəldiyini və orda oyundan sonra oteldə futbolçular arasında ermənilərlə düşən davada iştirakını xatırlayıram.

Azərbaycan futbolunda ona qarşı bugünəcən davam edən haqsızlıq, bu fonda məşqçi kimi ilk qazandığı çempionluqda final fitindən sonra göz yaşını saxlaya bilməməsi...
Kopenhagen zəfərindən sonra göz yaşları...

...Heç vaxt ağlımıza gəlməyən Çempionlar Liqasının qrup mərhələsi...

Şəxsiyyət, mənlik, mənəviyyat, insanlıq, ədalət, düzgünlük, dünyadakı milyonlarla azərbaycanlının baxıb fərəhləndiyi, qürur duyduğu duruş...
Ən ali dəyərlərə sahib olan sadə bir insanın bütün maneələrə, süni əngəllərə baxmayaraq zirvəyə yüksəlişi...

Bu zirvədə sadəliyini, səmimiyyətini,  təvazökarlığını qoruması...

...Bəli, bu QURBAN  QURNANOVDUR!

Bu canlı əfsanənin 50 yaşı tamam olur. 

Onunla dost deyiləm, heç vaxt da yaxın münasibətimiz olmayıb.
Amma dünən Azərbaycan İdman Jurnalistləri Assosiasiyasının ölkənin aparıcı dövlət orta təhsil ocağı - Bakı Avropa Liseyində keçirdiyi möhtəşəm tədbirdə yüzlərlə şagirdin, müəllimin sevgi selində boğulan və sonda mənə "Təəssüf ki, bütün uşaqların avtoqraf, foto çəkdirmək arzusunu yerinə yetirə bilmədim" deyib mütəəssir olan Qurban Qurbanova "Siz xalqın və Allahın bu qədər sevgisini qazanmısınızsa bu 50 illik ömürün ən böyük hədiyyəsidir" cavabını verdim.

Bakı Avropa Liseyinin direktoru, psixologiya üzrə fəlsəfə doktoru, tək Azərbaycanda deyil, beynəlxalq miqyasda çox böyük nüfuz və uğurlar qazanmış görkəmli pedaqoq Zülfiyyə Veysova Qurban Qurbanova bir unikal insan, uşaqlara, yeniyetmələrə, gənclərə, hamımıza örnək şəxsiyyət kimi rəğbətini ifadə etdi. 

Allahın və xalqın sevdiyi, Allahı və xalqını sevən çox-çox dəyərli Qurban hoca, 50 illiyiniz mübarək!
Tanrı sizi Azərbaycana və dünyaya çox görməsin!

Anar Şabanoğlu