"Belə çətin oyunumuz olmamışdı" - Qurban Qurbanov

ÖLKƏ FUTBOLU 2 Oktyabr 2015 / 00:45 12177

- A +

“Hər bir futbolçudan razı qaldım. Qələbə qazansaq da, rəqibin zəif yeri yox idi. Çox güclü komandaya qarşı oynadıq. Vacib üç xal əldə etdik”.

Qol.Az-ın məlumatına görə, bu sözləri “Qarabağ”ın baş məşqçisi Qurban Qurbanov Avropa Liqasının qrup mərhələsində “Anderlext” üzərində qələbədən (1:0) sonra keçirdiyi mətbuat konfransında deyib.

- İbrahim Şehiç son vaxtlar həddindən çox səhv edir. Bununla bağlı bir tədbir görmək fikriniz var?

- Bir insanın üzərinə çox getsək, o öz potensialını itirə bilər. Şehiçin sayəsində çox qələbələr qazanmışıq. Kimin səhvi olmur ki? Bu gün də Şehiç pis çıxış etmədi. Bəzi səhvlər oldu, ancaq üzərinə çox getmək lazım deyil. Gəlin, bu suala daha qayıtmayaq.

- “Anderlext”ə qarşı xüsusi hazırlığınız nədən ibarət idi?

- Gördüyünüz kimi rəqib fiziki cəhətdən çox güclü idi. Ona görə də müdafiədə xüsusi taktikalardan istifadə etdik. Künc zərbələri üzərində daha çox işləmişdik. Künc zərbəsi zamanı 3 oyunçunu irəlidə saxlayırdım. Ən real qol imkanlarını da standart vəziyyətdən sonra yaratdılar.

- Sizcə, rəqib Bakıya çox arxayın gəldiyi üçün uduzdu, yoxsa “Qarabağ” onların oynamasına imkan vermədi?

- Biz ilk növbədə rəqibin qarşısını almalıyıq. İlk hissədə komandamız çox əziyyət çəkdi. Çünki topsuz daha çox oynadıq. Doxsan dəqiqə bu templə davam edə bilməzdik. Rəqib fiziki cəhətdən çox güclü idi. “Anderlext” kimi balanslaşdırılmış komanda nadir hallarda olur. Belə çətin oyunumuz olmamışdı. Hər halda biz də öz oyunumuz göstərdik. Dünən də demişdim ki, “Anderlext”də seleksiya işi yaxşı aparılır. Çox şükür ki, düşüncələrimiz tam olmasa da, həyata keçdi.

- “Qarabağ” əvvəllər qrupa düşmək uğrunda mübarizə aparırdı. Bu uğurlu nəticələrdən sonra iştah artıbmı? Yəni artıq qrupdan çıxmağı hədəfləmisiniz?

- Reallığı demək lazımdır. Bu gün rəqiblərimizin hər biri bizdən üstündür. Ancaq istəklə nəsə etmək olar. Mən dəfələrlə demişəm ki, “Sent-Etyen”lə qarşılaşm ən yaxşı oyunlarımızdan biri olub. Amma həmin görüşdə qalib gələ bilməmişdik. Gördüyünüz kimi həyatda mümkünsüz heç nə yoxdur. Bizə bir qədər də zaman lazımdır ki, daha böyük uğurlar qazanaq.

- Son vaxtlar “Qarabağ” küncdən zərbələr zamanı qollar buraxır. Bunun qarşısını almaq üçün hansı işlər görürsünüz?

- “Mançester Siti” “Tottenhem”lə oyunda iki qolu künc zərbəsindən buraxdı. Yəni heç kim bu cür vəziyyətlərdən sığortalana bilməz. Bəli, qəbul edirəm ki, standart vəziyyətlərdə problemlərimiz var. Futbolçularımızın potensialı bu qədərdir. Ancaq bunun qarşısını almağa çalışırıq. Mümkün qədər künc zərbəsi yaratmamağa çalışırıq. Bu gün mən deyim ki, boyu 190 sm boyu olan 4 müdafiəçi gətirəcəm, bu o demək deyil ki, yüz faiz künc zərbəsindən qol buraxmayacağıq

Daha çox