"Qarabağ"la oyunumuz Avropa səviyyəli olacaq" - Ernest Nfor

“Neftçi” klubunun hücumçusu Ernest Nfor Qol.Az saytına müsahibə verib. Kamerunlu futbolçu ilk olaraq Premyer Liqamızın son turunda bərabərə qaldıqları “Sumqayıt”la oyun (2:2) haqda danışıb.

- “Sumqayıt” gənclərdən təşkil olunmuş komandadır. Belə komandalara qarşı oynamaq hər zaman çətin olur. Çünki onlar özlərini sübut etmək üçün meydanda daha çox əzmkarlıq göstərir və yaxşı mübarizə aparırlar. Bacardıqları qədər səhv etməməyə çalışırlar. Bizə qarşı da yaxşı oynadılar və komandamıza çətinlik yarada bildilər.

 - “Bakı”, “Xəzər Lənkəran”, “Sumqayıt” kimi klubların heyətinə baxdıqda görürük ki, orta yaş həddi 21-23-dür. Avropanın əksər klubları bu yaşda futbolçularla uğur qazanır. Səncə, Azərbaycanda bu cür klublar niyə yaxşı  nəticə göstərə bilmirlər?

- Doğrudur, Avropada bu yaşda futbolçular böyük klublarda oynayırlar. Çünki onlar xarakter göstərirlər. Hər zaman çalışırlar zirvəyə qalxsınlar. Yüksək yerlər uğrunda mübarizə aparan klublar da belə futbolçulara maraq göstərir. Bəzən elə gənc futbolçu olur ki, bir neçə klub onu heyətinə qatmaq üçün mübarizə aparır. Həmin futbolçular da artıq gələcəyin peşəkarlarına çevrilir.

- "Neftçi" mövsüm sonuna kimi hansı yer üçün mübarizə aparacaq? 

- Bu gündən sonra sadəcə turnir cədvəlində 3-cü yeri qoruyub saxlamağa çalışacağıq.  Qıraqdan baxanda hər şey asan görünür. Biz hansı pillədə olmaq haqqında düşünmürük. Bir məqsədimiz var - meydana çıxdığımız hər oyundan 3 xalla ayrılmaq. Yəni düşünmürük ki, hansısa mövqe uğrunda mübarizə aparaq. Biz qalib gəldikcə istəyimizə də nail ola biləcəyik.

- Gələcək karyeran haqqında nə düşünürsən? “Neftçi”dən getmək ehtimalın varmı?

- Bu məndən asılı deyil. “Neftçi” ilə hələ müqaviləm var. Sonra komandada qalıb-qalmayacağım haqqında qərarı rəhbərlik verəcək. Gələcək karyeram barədə müqaviləm başa çatandan sonra düşünəcəm.

- “Neftçi”yə transfer olunanda sənə böyük ümidlər bəslənilirdi. Nə baş verdi ki, Azərbaycanda karyeran uğursuz alındı.

 - Fikirimcə, Azərbaycanda mənə olan ehtimadı doğrultmuşam. Amma son 6 ayda, demək olar ki, mən stabil bir mövqedə oynamamışam. Harda istəyiblərsə, orada özümü ən yaxşı şəkildə göstərməyə çalışmışam.

 - Azərbaycan kubokunun finalında “Qarabağ”la qarşılaşacaqsınız. Səncə, bu mövsüm məğlub edə bilmədiyiniz Premyer Liqanın liderini kubokdan məhrum edə biləcəksiniz?

- Kubokun finalında iki böyük klubun qarşıdurması olacaq. Yəni Avropa səviyyəli bir matç olacaq. Bizi çox maraqlı oyun gözləyir. “Qarabağ”a qarşı heç vaxt rahat oynamaq olmaz. Yoxsa onlar həmin an bizim üçün təhlükə ola bilər.

 - “Qarabağ”ın heyətində hansı futbolçunu daha təhlükəli hesab edirsən?

- “Qarabağ” bir futbolçudan asılı olan klub deyil. Onlarda çox yaxşı sistem var. Hansı ki, bunu mən ancaq Avropada görmüşəm.  Yəni onlar bütün istiqamətlərdə komanda şəkilində oynayırlar. Bu səbəbdən də  gərək “Qarabağ”a qarşı bütün mövqelərdə yaxşı mübarizə aparasan.

 Ergün SEYİD