“Qarabağ” – “Neftçi” oyununu əcnəbi hakim idarə etsin!”

“Beynəlxalq dərəcəli hakim kimi demək istəyirəm ki, Azərbaycan hakimlik məktəbi hər zaman çox güclü olub. Öz ənənəsini indi də davam etdirir. Amma çox təəssüf ki, son zamanlar hakimlərin üzərinə böyük təzyiq var. Bu da onların bəzilərinin özünü meydanda doğrultmadığından irəli gəlir. Bunlar ictimaiyyət arasında söz-söhbətə səbəb olur”.

Qol.Az saytına açıqlamasında bu sözləri “Neftçi”nin vitse-prezidenti Tahir Süleymanov Topaz Premyer Liqanın 29-cu turunda “Qarabağ”la keçirəcəkləri oyunu ərəfəsində deyib. O bildirib ki, qarşıdakı matşı əcnəbi hakimin idarə etməlidir.

Klub rəsmisi oyunun əcnəbi hakimə tapşırılmasının zəruriliyini belə izah edib: “Heç bir klubun işinə qarışmaq istəmirəm. Amma son vaxtlar elə bir klub yoxdur ki, hakimdən narazı qalmasın. Elə “Neftçi” ilə “Qarabağ” arasında kubokun yarımfinal mərhələsinin cavab oyununa qədərki söz-söhbətlər də həddindən çox oldu. Bütün bunları nəzərə alaraq, bizim istəyimiz odur ki, “Qarabağ”la növbəti oyunumuzu yerli deyil, məhz əcnəbi hakimlər idarə etsin. İstedadlı hakimlərimiz çoxdur. Amma belə oyunlarda hakimlərlə bağlı çox qalmaqal baş verir. Gənc və istedadlı hakimlərimizi qorumaq baxımından da yaxşı olardı ki, həmin oyunu başqa ölkədən olan hakimlər briqdası idarə etsin. Belə olacağı halda bütün söz-söhbətlərə son qoyular və güclü olan tərəf qalib gələr. Həm “Neftçi”, həm də “Qarabağ” bu mövsüm artıq avrokuboklara vəsiqə qazanıblar. Bizim digər klublarla birgə hədəfimiz o olmalıdır ki, ən azından “Neftçi”nin keçən ilki uğurunu təkrarlayaq. Bunun üçün fəaliyyət göstərmək lazımdır. Artıq, mənasız şayiələr klubların gücünü alır. Normal şəkildə işləyə maneçilik törədir. Futbola, klublara, AFFA və PFL-ə inamı artırmaq üçün əcnəbi hakimin olmasını zəruri hesab edirik”.

T.Süleymanov bildirib ki, mövcud qaydalara əsasən, AFFA-nın istəyilə əcnəbi hakim Azərbaycan çempionatına təyinat ala bilər: “Bununla bağlı hələ keçən il AFFA-ya müraciət etmişik. “Neftçi”nin son uğurlarına kölgə salmaq istəyən qüvvələr var. Biz bu addımı məcburiyyətdən atırıq ki, görsünlər ki, “Neftçi”nin heç kimin köməyinə ehtiyacı yoxdur. Bizim yalnız meydanda düzgün idarəçiliyə ehtiyacımız var. “Neftçi” və “Qarabağ” hazırda öz oyunları ilə hər şeyi sübut edib. Biz keçən mövsüm avroliqadakı uğurumuzla sözümüzü dedik. “Qarabağ”da bu mövsüm öz oyunu ilə göstərir ki, ən azı avroliqanın qrup mərhələsində oynama layiqdir”.

T.Süleymanov bu təkliflə bağlı AFFA və PFL-dən müsbət cavab almadıqlarını bildirib: “Həm AFFA, həm də PFL-dən bildiriblər ki, bu məsələyə ehtiyac yoxdur. Yerli hakimlərin də hər hansının bizim oyuna təyin olunmasının fərqində deyilik. Sadəcə  bir daha rəsmi şəkildə sübuta yetirmək istəyirik ki, bizim heç kimin köməkliyinə ehtiyacımız yoxdur. Bildiririk ki, buyurun dünyanın istənilən yerindən hakim gətirin, qoy oyunu idarə etsin. Onsuz da lazımsız söhbətləri ortalığa atmalarına baxmayaraq, “Neftçi”nin qarşısını ala bilmirlər”.