Fərhad Vəliyev: "Mənim üçün təhlükəli hücumçu Vüqar Nadirovdur"

Hazırda “Qarabağ”la birgə Antalyada təlim-məşq toplanışında olan qapıçı Fərhad Vəliyev Qol.Az saytının Türkiyəyə ezam olunmuş xüsusi müxbirinə müsahibə verib.

- 2012-ci il sənin üçün uğursuz olması fikriylə razısan?

- Futbolda, bəli. Çünki demək olar ki, ehtiyatda çox qaldım.

- Buna səbəb nə idi? Öz oyununda geriləmə oldu, yoxsa əvvəlcə Boyan Pavloviç, sonra da bir müddət Miro Vardoviçlə rəqabətə tab gətirə bilmədin?

- Keçən mövsüm qapını daha çox Pavloviç qorudu. Mən onunla rəqabət aparırdım, məşqimi də edirdim. Amma bu futboldur. Heç kim belə hallardan sığortalanmayıb.

- Oynamadığın dövrdə səndə bədbinlik, ruh düşkünlüyü yaranmışdı.

- Doğrudur. Bir tərəfdən “Qarabağ”da ehtiyatda oturmaq, o biri tərəfdən milliyə dəvət almamağım mənə təsir etmişdi. Amma sonradan özümdə güc tapdım, ikiqat səylə çalışmağa başladım.

- “Qarabağ”da ehtiyatda oturan vaxt millinin baş məşqçisi Berti Foqtsa sənə klubunu dəyişməyi təklif etmişdi, özün də mətbuata Ağdam komandasından getmək istədiyini açıqlamışdın. Bununla bağlı baş məşqçiniz Qurban Qurbanov və ya klubunuzun rəhbərliyi ilə söhbətin olmuşdu?

- Yox. Keçən qış fasiləsində Türkiyənin birinci liqa və Azərbaycan Premyer Liqasında çıxış edən bəzi komandalardan dəvət alsam da, qəbul etmədim. Çünki iddialı klublar deyildi.

- İddialı olsa, gedərdin?

- Bəli. Bundan başqa, Azərbaycandan kənarda da oynamaq istəyirdim. Amma o dövrdə klubumla müqaviləm vardı. Sonradan isə əsas heyətə düşə bildim.

- “Qarabağ”da əsas heyətə düşməyin özündə yenidən güc toplamağının nəticəsidir, yoxsa yeni transferiniz Miro Vardoviçlə sabiq qapıçınız Boyan Pavloviç arasındakı səviyyə fərqi?

- Onların hər ikisi yaxşı qapıçıdır. Sadəcə, yay təlim-məşq toplanışında ikiqat çalışmağa başladım. Bu mövsümün əvvəlində oynamasam da, səbr etdim. Şükür Allaha ki, baş məşqçimiz mənə şans verdi. Yəqin ki, formada olmasaydım, bu etimadı qazanmazdım. Hazırkı çıxışlarım mənə “Qarabağ”da yaxşı oynadığım vaxtları xatırladır. Həmin gücdəyəm.

- Yaxşı formada olduğunu deyirsən. Amma Berti Foqts səni bu dəfə də millinin təlim-məşq toplanışına çağırmadı.

- Mən adımı Foqtsun siyahısında görmək istəyirdim. Amma nə etmək olar, baş məşqçi belə qərar verib. Deməli, daha artıq çalışmalı və sabit oynamalıyam ki, millinin qarşıdakı görüşlərinə dəvət alım.

- Foqtsun son qərarı sənə necə təsir etdi?

- Çempionatın son qarşılaşmalarından sonra milliyə çağırılacağımı fikirləşirdim. Amma siyahıda adımı görməyəndə çox təəssüfləndim.

- Bu mövsüm “Qarabağ”ın qarşısına çempionluq vəzifəsi qoyulub. Sən şanslarınızı necə görürsən?

- Bu çempionat çox gərgin keçir. İddialı klubların hamısı çempion olmaq istəyir. Biz də həmçinin. Yəqin ki, bu qış fasiləsində baş məşqçimiz daha yaxşı çıxış etməyimiz üçün komandaya yeni legionerlər cəlb edəcək.

- “Qarabağ”a yeni hücumçu və yarımmüdafiəçinin gətirilməsinin vacibliyi haqda tez-tez danışılır. Bəs səncə, qapıçı transferinə ehtiyac var?

- Xeyr.

- Bu gün üçün Azərbaycan çempionatında kimi özün üçün təhlükəli futbolçu sayırsan?

- Çəkindiyim hücumçu yoxdur. Təhlükəli hesab etdiyim bir futbolçu isə var: komanda yoldaşım Vüqar Nadirov. Onun güclü zərbələrindən ehtiyat edirəm. Zərbələri dəqiq olur, istiqamətini tez-tez dəyişir. Məşqlərdə də tez-tez buna şahid oluram.

- Bəs, 15 qolla Premyer Liqamızın bombardiri olan “Neftçi”nin hücumçusu Nikolas Kanales haqda fikirlərin necədir?

- Kanales ölkəmizə gəldiyi ilk vaxtlardan sübut elədi ki, səviyyəli hücumçudur. Düzdür, baxırsan ki, təhlükəli hücumların qurulmasında iştirak etmir. Amma mövqe seçimi və qol duyumu yüksək səviyyədədir.

- Hücumçulardan söz düşmüşkən, Rauf Əliyevin “Qarabağ”dan ayrılmasını necə qarşıladın?

- Mən Raufu ən yaxşı hücumçularımızdan biri kimi görürəm. Onun komandamızdan getməsinə təəssüfləndim. “Qarabağ”da qalıb bizimlə çempionluq qazanmasını istərdim.

- Sonda. Bu mövsüm üçün həfədin nədir?

- Mən hələ çempion olmamışam. “Qarabağ”la qızıl medal qazanmaq istərdim. Bundan başqa, çalışacağam, daha yaxşı formada olum və yenidən milliyə dəvət alım.