Hikmət Karaman: “Azərbaycan millisində inkişaf daha sürətlə getməlidir”

Türkiyə superliqasında yarışan “Qaziantepspor” klubunun baş məşqçisi Hikmət Karamanın Qol.Az saytının Antalyaya ezam olunmuş xüsusi müxbirinə müsahibəsi

- Hikmət bəy, Azərbaycan futbolu ilə bağlı nə kimi məlumatlarınız var?

- Futbolunuzla vaxtım olduqca maraqlanıram. Azərbaycan bizə qardaş ölkədir. Bəzən hazırlıq proseslərin, matçlarda sizin futbol adamlarınızla görüşürük. Elə bu gün “Qarabağ”ın baş məşqçisi Qurban Qurbanovla görüşüb söhbət etdik. Milli komandanızın bəzi oyunlarını izləmişəm. Azərbaycan futbolunda inkişaf olduğunu görürəm. Azərbaycan futbolda söz sahibi ola bilər. Bunun üçün ilk növbədə infrastruktur yüksək səviyyədə olmalıdır. Azərbaycan klublarının rəhbərləri pullarını birinci növbədə bu sahəyə yönəltməlidirlər. Əlbəttə, futbol federasiyası məşqçilərin yetişməsi istiqamətində də səylərini artırmalıdır. Qismət olsa, Azərbaycana gəlib, orada bir neçə gün qalıb futbolla bağlı müzakirələr apararam.

- Yeri gəlmişkən, bir müddət əvvəl sizin Azərbaycandan təklif almağınız haqda məlumat yayılmışdı.

- Bəzən azərbaycanlı iş adamları ilə belə söhbətlərimiz olur. Bundan sonra mediaya xəbətlər sızır. Başqa bir ölkənin futboluna bir fayda vermək istərdim. Azərbaycanlılarla dil problemi olmadığından orada çalışmağın çətin olmayacağını düşünürəm.

- Hər halda, sizin konkret kimdən dəvət gəlmişdi?

- Bilirsiniz, bu təklif olur, sabah isə başqa şeylər baş verir. Azərbaycana ancaq Avropada böyük uğurlar qazanmaq üçün gələ bilərəm. Yoxsa, ancaq pul üçün çalışmaq... Bu, mənim prisipim deyil. Məni ancaq uğur və müəyyən etdiyim sistemi tətbiq etmək maraqlandırır.

- Bayaq qeyd etdiyiniz kimi, Qurban Qurbanovla görüşünüz oldu. Bildiyimə görə, 2009-cu ildə “Ankaragücü”ndə işləyəndə “Qarabağ”la yoxlama oyunu keçirmişdiniz. Azərbaycan təmsilçisi ilə bağlı fikirləriniz necədir?

- O zaman komandanı çox bəyənmişdim. Qurban Qurbanov yaxşı komanda qurmağı bacarıb. Azərbaycan bu cür məşqçilərə sahib çıxmalı, onlara dəyər verməlidir. Gənc məşqçilərin təcrübəsinin artırılması üçün konkret işlər görülməlidir. Yerli federasiya gənc mütəxəssiləri xaricə təcrübə keçməyə göndərməlidir. Çünki yerli məşqçilər öz futbollarını daha yaxşı bilirlər. Əsas odur ki, klub və federasiya rəhbərliyi onlara dəstək versin.

- “Qarabağ”la oyunda bu komandanın futbolçuları sizə necə təsir bağışladı?

- 3-4 oyunçu vardı ki, onları çox bəyəndim. Bildiyimə görə, bizə qarşı oynayan bir futbolçuları sonradan Hollandiyaya getdi (Vaqif Cavadov nəzərdə tutulur – red.). O, çox istedadlı oyunçudur. Bundan başqa, milli komandanızın matçlarında da xoşuma gələn futbolçular olub. Əslində bir həftəliyinə də olsa Azərbaycana gəlib çempionatınızın oyunları yaxından seyr etmək, futbol adamlarınızla daha geniş müzakirə aparmaq istərdim

- Milli komandamızın oyununa necə qiymət verərdiniz?

- Azərbaycan millisində inkişaf var. Bunu inkar etmək olmaz. Amma bu inkişaf daha sürətlə getməlidir. Bununla bağlı qəti fikir söyləmək üçün orada nə kimi işlərin getdiyini bilmək lazımdır.

- Milli komandada əcnəbi məşçilərin işləməsinə necə baxırsınız? Azərbaycanda Berti Foqtsu az tənqid etmirlər.

- Tənqidlər həmişə olub: bizdə də, sizdə də. Foqts əcnəbidir, fərqli mədəniyyəti təmsil edir, dünyagörüşü ayrıdır, dil problemi var. Onun çətinlik çəkməsi təbiidir. Foqts Almaniyada uğur qazanmış məşqçidir. Ona hörmət etmək lazımdır. Qısa zamanda böyük uğur qazanmaq çox çətindir. Məncə, Foqtsun ətrafında olan azərbaycanlı məşqçilərin ona verdikləri məlumatdan da çox şey asılıdır. Çünki ona doğru məlumat verilsə, mütləq daha faydalı işlər həyata keçirəcək.