Ramiz Məmmədov: “Biz Azərbaycanda heç vaxt səfərdə oynamırıq”

“Qəbələ” klubunun baş məşqçisi Ramiz Məmmədovun Qol.Az saytına müsahibəsi

- Öncə yenidən “Qəbələ”yə qayıtdıqdan sonra keçirdiyiniz ilk oyuna toxunmaq istərdim.  AZAL-la matçda komandanızdan istədiyinizin heç olmasa, əlli faizini ala bildinizmi?
 
- Mən futbolçularımızda ölmüş ruhun dirilməsini gördüm. Artıq oyunçularda özünəinam artıb. Bunu məşqlərdə, futbolçular arasındakı münasibətdən də görmək mümkündür. Qapıçı Anar Nəzirovun oyun praktikası olmadığı üçün onu da meydana buraxdım. Digər futbolçu Rövşən Əmiraslanov verdiyim tapşırıqların 99 faizinin öhdəsindən gəlməyi bacardı. Sadəcə, bir məqamda yüngül səhvə yol verdi. Yəni, biz oynamayan futbolçuları da oynatdıq. İstədiyimi onlardan ala bildim. Əvəzedici heyətdən bir neçə futbolçunu da əsas komandaya cəlb etmişik. Bunlardan biri Rey Məmmədovdur. Məqsədimiz yerli perspektivli futbolçularımızın Kamanan, Dodo, Rəşad Abdullayev kimi futbolçularla birgə çıxış edib təcrübə toplamasıdır.

- Sabah Premyer Liqanın VIII turunda “Bakı” ilə qarşılaşacaqsınız. Komandanızı bu oyuna tam hazır hesab edirsiniz?

- Rəqibimiz güclüdür. Komandanın yaxşı baş məşqçisi və səviyyəli futbolçuları var. Bu görüşə tam hazırıq. Sabah “Bakı” ilə meydana üç xal üçün çıxacağıq. Futbolçulardan tələb olunan və qarşımıza qoyulan məqsəd budur.

- Səfərdə oynayamağını sizin üçün nə kimi çətinliklər yarada bilər?

- Mən əvvəllər də demişəm ki, ev, səfər oyun amili olmur. Hətta bunu Qazaxıstanda işləyən zaman futbolçularıma deyirdim. Biz  Azərbaycanda oynayırıq, deməli, bura öz evimizdir. Ona görə də biz Azərbaycanda heç vaxt səfərdə oynamırıq.

- Bəs rəqibinizin bu gün lazımı səviyyədə olmaması “Qəbələ”yə nə kimi üstünlük verə bilər?

- “Bakı” hazırda istədiyi futbolu nümayiş etdirə bilmir, adlarına layiq yerdə qərarlaşmayıblar. Lakin bu o demək deyil ki, onlar sabah ciddi mübarizə aparmayacaqlar. Belə götürəndə, “Sumqayıt”a yenildikdən sonra Bakıda  maksimum güc sərf edərək qalib gəlmək istəyəcəklər. Biz onların keçirdikləri bütün oyunlarla yaxından tanış olmuşuq. Futbolçulara kimə qarşı və necə oynamalı olduqlarını izah etmişəm.

- Deməli, “Bakı”nın zəif və güclü mövqelərini müəyyən etmisiniz?

- Demək olar ki, hə. İstənilən güclü komandanın zəif nöqtəsi olur. Təcrübəli məşqçi digər komandada bunu müəyyən etməlidir. Məşqçi həm də bundan ötrü fəaliyyət göstərir. Biz də öz texniki heyətimizlə birlikdə rəqibin zəif nöqtələri üzərində işləmişik. Necə lazımdırsa, yaxşı analiz etmişik. İnşallah, bunun bəhrəsini görərik.  Futbolçularla dil problemini, tərcüməçi vasitəsiylə həll edirik. 

- Sizin baş məşqçi vəzifəsinə gəlişinizdən sonra AZAL-a qarşılaşmada “Qəbələ”nin oyununda taktika və nizam intizam aydın görünürdü. Bunu qısa bir zamanda necə edə bildiniz?

- İstedadlı insan həyata lider kimi gəlir. Bu keyfiyyətləri insana Allah bəxş edib. Milliyyətindən asılı olmayaraq, istənilən insana yanaşma tərzimiz yaxşıdır. Qısa bir zamanda heyətdəki futbolçularla dil tapa bildim. Bunu onların özündən soruşsanız, daha yaxşı olar.  Komandada xoş ab-hava hökm sürür. Artıq komandanı pis əhval-ruhiyyədən çıxara bilmişik. Birdə ki, hər bir məşqçinin özünə məxsus futbol fəlsəfəsi var. Bu gün futbol ən sadə və bir o qədər də mürəkkəb idman növüdür. Mən klub rəhbərliyinə minnətdaram ki, vaxtında bizi oxudublar. Bugün kateqoriya sənədimiz var. Yavaş-yavaş işlərimizi daha da yaxşılaşdırmağa davam edəcəyik.

-  Bu gedişlə komandanızın ən azı Avroliqaya vəsiqə qazana biləcəyinə inanırsınız?
 
- Düzgün məşq prosseslərini davam etdirsək, məqsədimizə çata bilərik.
Əli HƏYATİ