“Neftçi”nin sabiq futbolçusu: "Bakıdakı maşınların sayı Bolqarıstandakından iki dəfə çox idi"

2008-09-cu il mövsümündə “Neftçi”nin şərəfini qorumuş bolqarıstanlı Marko Davçev Qol.Az-a müsahibə verib.

- “Neftçi”nin son çıxışlarını izləyirsən?

- Bilirəm ki, Azərbaycan çempionu oldular. Ancaq səhv etmirəmsə, Çempionlar Liqasında uğurlu çıxış edə bilmədilər.

- Bəli, İsrail çempionu “Hapoel”ə məğlub oldular. Xüsusilə səfərdə 0:4 hesablı qeydə alındı.

- Çox təəssüf. Məncə, “Neftçi” artıq daha yüksək səviyyədə oynamalıdır.

- Bunun üçün şans var. Ancaq Avropa Liqasının "play-off" mərhələsindəki rəqib Cənubi Kipr təmsilçisi “Apoel”di...

- “Apoel” çətin rəqibdi. Ötən mövsüm Çempionlar Liqasında çox uğurlu mövsüm keçirdilər. Ancaq futbolda mümkünsüz heç nə yoxdur. Yaxşı transferlər edib, heyəti gücləndirib, uğurlu nəticə göstərmək olar. Mən bilən maliyyə cəhətdən heç vaxt “Neftçi”də problem olmayıb.

- Yeri gəlmişkən, sizin dövrünüzdə vəziyyət necə idi?

- Maliyyə cəhətdən hər hansı bir ciddi problemimiz olmayıb. Maaşlarımızı vaxtlı-vaxtında alırdıq. Hətta həmin vaxt bütün dünyanı maliyyə böhranı bürüsə də bu, Azərbaycandan yan keçdi. Bəlkə də komandaya Dövlət Neft Şirkəti himayədarlıq etdiyindən bu cəhətdən problem olmurdu.

- O vaxt səninlə birlikdə həmyerlin Svetoslav Stefanov da çıxış edirdi...

- Bəli, onunla münasibətlərimiz o vaxt da əla idi, indi də. Ailəvi cəhətdən yaxınıq. Svetoslav məndən əvvəl Azərbaycana getdiyindən yerli ab-havanı, mentaliteti məndən daha yaxşı bilirdi. Bu mənada Azərbaycana uyğunlaşmaq baxımından mənə çox böyük köməyi dəydi.

- Sizə, beynəlxalq komanda demək olardı?

- Düzü, saymamışdım, amma hardasa 10 nəfər legioner var idi. Avstraliya, Türkiyə, Braziliya, Estoniya, İrlandiya və Serbiyadan  legionerlərimiz var idi. Hətta bəzən elə olurdu ki, meydançaya cəmi iki yerli futbolçu çıxırdı. Ümumiyyətlə, Azərbaycanda legionerlərə limit yox idi. Elə komanda var idi, start heyətinin hamısı legionerlərdən ibarət olurdu.

- Bakı necə şəhər idi?

- Bakı mənim gözlədiyimdən də gözəl şəhər imiş. Ticarətə böyük üstünlük verirdilər. Amma tıxaclar çox böyük problem idi. 

- Klub sizə ev və maşın vermişdi?

- Ev vermişdilər. Özü də şəhərin gözəl guşələrindən birində. Orada Svetoslavla qonşu idik. Maşına gəlincə, xeyr. Svetoslavla bir “Mersedes” almışdıq. Bizə iki maşın lazım deyildi. Onsuz da Bakıda yetərincə avtomobil var idi. Hətta Bolqarıstandakından iki dəfə çox idi. Özü də çoxu “Mersedes”, "BMW" və "Jeep" kimi bahalı maşınlar idi. Sovet istehsalı olan “Jiquli”lər az idi.

- Dil problemin yəqin ki, olmazdı...

- Rus dilini pis bilmədiyimdən problem olmurdu.

- Bilirsən ki, “İnter”in prezidenti Georgi Nikolov da bolqardı. Onunla şəxsi tanışlığın var?

- Şəxsən yox, amma tanıyıram. Nikolov neçə illərdi Azərbaycanda çalışır və ona hörmət edirlər. Necə deyərlər, Azərbaycan futbolunda sözükeçən adamlardan sayıla bilər.

- Azərbaycanda boş vaxtını necə keçirirdin?

- Təbii ki, gəzməyə çıxırdıq. Deyim ki, Bakı çox bahalı şəhərdi. Bu mənada orada yaşamaq Bolqarıstandan daha çətindi. İstirahətə gəlincə, Bakıda gecə klubları var idi. Amma siz müsəlman ölkəsi olduğunuzdan vəziyyət bir qədər fərqli idi. O vaxtı Bakıya yeni gələndə mənə demişdilər ki, burada diskotekada qızlar azdır. Çünki Avropadan fərqli olaraq, burada qadınlara və kiçik yaşlı qızlara məhdudiyyətlər qoyulur. Ona görə, çətin ki həyat yoldaşıma həmin diskotekalarda xoş olardı.

- Azərbaycan futbolu ilə Bolqarıstan futbolunu müqayisə etmək olar?

- Mən oynadığım dönəmdə Azərbaycan futboluna yaxşı sərmayə qoyulurdu. Bu mənada bəlkə də sizinkilər artıq bizim klublara çatıblar.


Anar XANLAROV