Ağasəlim Mircavadov: "Vaqifin "Qarabağ"a dönüşü onun nüfuzunu azaltmayacaq"

Azərbaycanın əməkdar məşqçisi Ağasəlim Mircavadovun Qol.Az saytına müsahibəsi

- İlk öncə səhhətiniz barədə məlumat verərdiniz. Bir neçə gün əvvəl əməliyyat olundunuz. İndi  özünüzü necə hiss edirsiniz?

- Allaha şükür. Özümü yaxşı hiss edirəm. Hər şey qaydasındadır.

-  Klublarımızdan təkliflər  almısınız?

- Bilirsiniz, səhhətimlə bağlı bir aydır ki, vətəndə deyildim. Türkiyədə əməliyyat keçirmişdim. Hələ ki, heç bir xəbər yoxdur. Hazırda bütün klublar təlim-məşq toplanışındadırlar. Həmkarlarımın hamısının özlərinə görə iş yerləri var. Yəni,  boş olan baş məşqçi postu yoxdur.

- Bu mövsüm üçün Unibank Premyer Liqasının səviyyəsini necə dəyərləndirirsiniz?

- Bunu bir-iki sözlə izah etmək çətindir. Bu prosesləri dərindən analiz etmək lazımdır. Klublarımızın bu istiqamətdə çalışdığını söyləmək olar. 2005-ci ilə qədər komandalarımız təlim-məşq prosesi keçmək üçün xaricə üz tuta bilmirdilər. Mən “Şəmkir”də baş məşqçi işləyən zaman hazırlıq keçmək üçün Ukraynaya yollanırdıq. Ancaq digər klublarımız xaricə gedə bilmirdilər. İndi isə klublarımızın inkişaf etdiyini və maddi imkanlarının da xeyli yaxşılaşdığını görürük.

- Bayaq qeyd etdiyiniz kimi, bir neçə klubumuz təlim-məşq toplanışı keçmək üçün xarici ölkələrə üz tuturlar. Bəs, hansı səbəbdən klublarımız səviyyəli komandalarla deyil, məhz zəif rəqiblərlə yoldaşlıq görüşü keçirirlər?

- Bir şeyi nəzərə almaq lazımdır ki, yanvar ayının ortalarında çox ölkələrdə çempionat oyunları başlayır. Elə misal olaraq, Türkiyə və Almaniyanı göstərmək olar. Özünüz də yaxşı bilirsiniz ki, Antalyada hazırlıq keçən daha çox alman və türk klubları olur. Buna görə də, səviyyəli komanda tapıb yoldaşlıq görüşü keçirmək çətindir. Digər tərəfdən  Rusiya klubları ilə yoldaşlıq oyunu keçirmək də əla olardı. Çünki son illər Rusiya futbolu yenidən inkişafa doğru gedir. Digər tərəfdən klublarımızın özünəməxsus strategiyası var. Çalışırlar ki, ilk sınaq oyunlarını nisbətən zəif komandalara qarşı keçirsinlər. Sonradan isə daha səviyyəli komandalarla qarşılaşmağı planlaşdırırlar.

- Hansı klubumuzun Unibank Premyer Liqasının birinci dövrədəki çıxışını xüsusi vurğulamaq istərdiniz?

- Doğrusu, çempionatın bütün oyunlarını izləyə bilmədim. “Neftçi”nin “İnter” və  “Xəzər Lənkəran”la, eləcə də  “İnter”in “Bakı”ya qarşı oyununu izləmişəm. Bu oyunlara baxanda komandaların necə inkişaf etdiyi və hansı səviyyədə olması göz qabağına gəlir. Bir şeyi unutmaq lazım deyil ki, sürətli futbol görmək istəyirsənsə meydançaların vəziyyəti daha yüksək səviyyədə olmalıdır. Meydançanın ot örtüyünün ideal vəziyyətdə olması lazımdır. Şənbə və bazar günləri televiziya vasitəsiylə Almaniya və İspaniya çempionatlarının bir neçə oyununu izlədim. Futbolçular belə ideal meydançalarda oynayarkən çox əziyyət çəkmir. Bu səbəbdən həm sürətli, həm də texnikalı oyun göstərə bilirlər. Meydança yüksək səviyyədə olmayanda futbolçuda yorğunluq daha çox olur.

- Vaqif Cavadov “Volqa”dan ayrılaraq yenidən “Qarabağ”a döndü. Sizcə, buna nə səbəb ola bilər? 

- Mən Vaqifin “Tvente”dəki çıxışlarını izləyə bilməmişəm.  Ancaq Vaqif “Volqa”da yaxşı təsir bağışlayırdı. Vaqif cinah hücumçusu kimi öz üzərində hələ çox çalışmalıdır. Xarici klublar hücumameyilli futbolçu alarkən, onun qol vurmaq bacarığına da xüsusi diqqət yetirirlər.

- Vaqifin yenidən Azərbaycan çempionatına dönməsi onun karyerasında enişə səbəb ola bilərmi?

- Vaqifin əmisi İsgəndər Cavadovla bir yerdə çalışmışam. Onun həm atası, həm də əmisi gözəl futbolçu olublar. Mən istərdim ki, Vaqif onlardan da üstün oyunçu olsun.  Hər şey özündən asılıdır. Gərək üzərində durmadan çalışsın. Vaqif özü də “Tvente”də olarkən oranın ab-havası və məşqlərinin şahidi olub. Unutmayaq ki, Vaqif Rusiyanın CSKA klubunun yetirməsidir. “Qarabağ” klubuna qayıtması onun öz şəxsi işidir. Fikrimcə, Vaqifin “Qarabağ”a dönüşü onun nüfuzunu azaltmayacaq.

Əli HƏYATİ