Cavid Hüseynov: "Eyforiyaya qapılması "Neftçi"yə baha başa gələ bilər"

Neftçi” klubunun yarımmüdafiəçisi Cavid Hüseynovun Qol.Az saytına müsahibəsi

- “Xəzər Lənkəran”la qarşılaşmada özünü  yaxşı tərəfdən göstərən futbolçulardan biri də sən oldun. Belə irihesablı qələbə necə alındı?
- Əzəli rəqibimizlə görüş kənardan göründüyü kimi heç də asan keçmədi. Baxmayaraq ki, böyükhesablı qələbə qazanaraq, tarixi nəticəyə imza atdıq. Doğrusu, “Xəzər Lənkəran” kimi güclü rəqibin qapısından beş cavabsız top keçirib, qalib gələcəyimizi təsəvvür etmirdim. Futbolda belə hallar hərdən baş verir. Görünür, uzun müddət rəqib üzərində qələbə qazana bilməməyimiz revanş almaq istəyimizi daha da artırmışdı. Düşünürəm ki,həmin oyunda pis təsir bağışlamadım. Məşqçinin verdiyi tapşırıqların öhdəsindən gəldiyimə inanıram. Uğur qazanmağımız naminə əlimdən gələni etdim.

- “Xəzər Lənkəran” üzərində belə böyükhesablı qələbəni heç kim gözləmirdi. Bu qalibiyyətdən sonra “Neftçi”nin eyforiyaya qapılacağı səndə narahatçılıq doğurmur?
- Eyforiyaya qapılması “Neftçi”yə baha başa gələ bilər. Hər kəs yaxşı bilir ki, turnir cədvəlində axrıncı pilləni tutan “Sumqayıt Şəhər” səfərdə “Qarabağ” kimi güclü komandanı məğlubiyyətə uğratdı. Hər kəs bu qarşılaşmada “Qarabağ”ı favorit hesab edirdi. Lakin hər şey gözlənilənlərin əksinə oldu. Məhz belə sensasiyalardan sonra “Neftçi”nin arxayınlaşması mümkün deyil. Ən azından ona görə ki, növbəti turda ”Qəbələ” və “Qarabağ” kimi iddialı klublarla qarşılaşacağıq. Növbəti görüşlərə daha yaxşı köklənərək qələbə qazanmağa çalışacağıq.

- ”Xəzər Lənkəran” üzərindəki qələbəyə görə komandanızın üç qat mükafatlandırılması doğrudur?
- Xeyr. Digər oyunlardakı qələbələrə görə aldığımız mükafatlardan fərqi olmadı. “Qarabağ”ı məğlub edən zaman nə qədər mükafat almışdıqsa, “Xəzər Lənkəran” üzərindəki qələbəyə görə də həmin mükafatı aldıq.
 
- “Neftçi” hansı cəhətlərinə görə rəqibindən üstün oldu?
-  Komandamız rəqibini bütün kompanentlərdə üstələdi. Biz meydanın hər bir qarışı uğrunda mübarizə apararaq,onlara rahat hərəkət etməyə imkan vermirdik. “Xəzər Lənkəran”ın daxilində nələr yaşandığını deyə bilmərəm. Çünki mən komandanın içində deyiləm. Bununla belə, bütün baş verənlərin “Xəzər Lənkəran”ın çıxışına təsirsiz ötüşmədiyi qənaətindəyəm. Bəziləri “Xəzər Lənkəran”ın bizimlə oyuna arxayın çıxdıqlarını düşünürlər. Bu mümkün deyil. Heç bir klub “Neftçi” ilə qarşılaşmaya arxayın çıxa bilməz. Hər iki komanda onları nə qədər ağır matçın gözlədiyinin fərqində idi.

- Komanda yoldaşın Flavinyo Azərbaycan pasportu almaq üçün AFFA-ya müraciət edib. Onun millimizə faydalı olacağını düşünürsən?
- Flavinyonu Azərbaycanda ən yaxşı legionerlərdən biri hesab edirəm. Məncə,milli komandada çıxış etməyə layiqdir. Bəzi  səviyyəsiz legionerlərdənsə millidə texnikalı,qol vurmağı bacaran bir futbolçunun çıxış etməsi daha yaxşı olardı. Onun bizə çox köməyinin dəyəcəyini düşünürəm.
 
- Son oyunlarda komandanın əsas heyət üzvü kimi meydana çıxırsan. Bununla belə, hələ də Berti Foqtsun diqqətindən kənar qalmısan. Foqts səni niyə milliyə dəvət etmir?
-  Foqtsun dediyinə görə, "Neftçi"nin əsas heyətində yer almadığım üçün məni milliyə dəvət etmirdi. Lakin son oyunlarda komandamın ilk onbirliyində meydana çıxıram. Belə olan halda niyə çağırılmadığımı deyə bilmərəm. Ümid edirəm ki, növbəti toplanışlarda mən də Foqts tərəfindən dəvət alacam.

ƏLİ HƏYATİ