Nazim Süleymanov: “Qurban Qurbanov milli komandanın baş məşqçisi olmağa layiqdir”

AZAL klubunun keçmiş baş məşqçisi, milli komandamızın sabiq kaptanı Nazim Süleymanovun Qol.Az saytına müsahibəsi

- “Avro 2012”nin seçmə mərhələsi çərçivəsində keçrilən Türkiyə - Azərbaycan (1:0) görüşü haqda fikirlərinizi bilmək istərdik.

- Dünənki oyunda yığma komandamız müdafiəyə meyilli oyun nümayiş etdirsə də, pis təsir bağışlamadı. Əlbəttə, başa düşüləndi ki, səfərdə oynadığımızdan daha çox müdafiəyə diqqət yetirməli idik. Ancaq bu o demək deyil ki, ümumilikdə komanda yalnız müdafiə barəsində düşünməlidir. Türkiyə millisi oyun boyu hücumda diqtə edən tərəf oldu. Qələbə onlara daha çox gərəkli  olduğundan üç xal qazanacaqları əvvəlcədən təxmin edilirdi.

- Sizcə, millimizin daha çox müdafiə futbolu oynaması daha çox böyükhesablı məğlubiyyətdən qaçmaq məqsədi güdürdü?

- Komandanı meydana hansı taktiki sxemlə çıxarmaq səlahiyyətləri yalnız məşqçiyə aiddir. Düzdü, yığmamız oyuna başladıqda irəli atılaraq rəqiblə başabaş mübarizə aparmaq istədi. Lakin rəqibin hücumlarının çox kəsərli olduğunu gördükdə, müdafiəyə çəkilib, türkləri özlərinə aid cərimə meydançasında qarşıladılar.

- Ümumi götürdükdə “Avro 2012”nin seçmə mərhələsində Azərbaycan millisi necə təsir bağışladı?

- Qrupdakı oyunlara nəzər saldıqda yığmamız o qədər də pis təsir bağışlamadı. Lakin bəzi qarşılaşmalarda gözlənilməz məğlubiyyətlərlə üzləşdik. Məsən, Qazaxıstanla səfər oyununda  Azərbaycan komandası ən pis oyunlardan birini keçirdi. Əslində biz onlara məğlub deyil, qalib gəlməliydik. Ancaq ümumi götürəndə  milli komandanın oyunlarını qənaətbəxş hesab etmək olar. Çünki ən azı tariximizdə ilk dəfə hesabımıza yeddi xal yaza bildik.

- Belçika və Qazaxıstanla doğma meydandakı oyunlardan sonra çoxları millinin artıq öz oyununu tapdığını düşünürdü. Lakin dalbadal iki görüşdə məğlub olmağımız bu fikirləri alt-üst etdi.

- Düşünürəm ki, Azərbaycan yığması hələ sabit oyun nümayiş etdirə bilmir. Əgər sabit oynaya bilsəydik bəlkə də hesabımızda yeddi yox, daha çox olardı. Heyətimizdə yetərincə potensialı böyük olan oyunçular olsa da, bundan istifadə edə bilmirik. Məncə, belə gənc futbolçularının potensialını üzə çıxarmağa çalışmaq lazımdır.

- Türkiyə ilə oyunlarda komandamız rəqibə daha çox hansı kompanentlərdə uduzdu?

- Meydan sahibləri sürətli futbol nümayiş etdirdikdə onlarla mübarizədə xeyli gecikirdik. Düzdü, ümumilikdə götürəndə müdafiədə pis oynamadıq. Lakin yenə də müdafiədən hücuma keçəndə axsayırdıq. Bəlkə də bu taktiki gedişi normal səviyyədə yerinə yetirə bilsələr, millinin oyunla bağlı probleminin 60 faizini həll etmiş olarlar. Digər tərəfdən, türklərlə oyunda topu özümüzdə yaxşı saxlaya bilmirdik. Buna görə də hücum qurarkən istənilən səviyyədə alınmırdı.

- Bu ilin sonunda AFFA-nn millinin baş məşqçisi Berti Foqtsla müqaviləsi başa çatır. Sizcə, o, millimizdə qalmalıdır?

- Əgər bilsəm ki, mənim dediyimlə nəsə həll olunacaq, onda fikrimi açıq söyləyərəm. Boş yerə danışmağın isə mənası yoxdur. Bütün bunlar AFFA rəhbərliyindən aslılı məsələdir, Nazim Süleymanovdan yox. Bu yaxınlarda oxudum ki, Rəşad Sadıqov Berti Foqtsun qalıb işləməsinin tərəfdarıdır. Rəşad Sadıqov təcrübəli, peşəkar, futbolçu olmaqla yanaşı, milli komandanın da kapitanıdır. Yəqin Berti Foqtsun futbolumuza xeyir verəcəyini düşündüyündən, öz fikrini bildirib. Mənim fikrimcə, futbolumuzun inkişaf edərək dünya və Avropa arenalarında yaxşı nəticə göstərməsi üçün birinci növbədə çempionatımızın səviyyəsi qalxmalıdır.

- Amma Foqtsla yanaşı yerli məşqçilər də millimizə namizəd kimi göstərilir. Məsələn, Qurban Qurbanovun yığmada işləməsini istəyənlərin sayı az deyil.

- Siz Quban Qurbanovu misal göstərdiniz. Bəli, Qurban Qurbanov milli komandanın baş məşqçisi olmağa layiqdir. Niyə? Gəlin, faktlarla danışaq. Üç ildi ki Qurban müəllim Azərbaycan futbolunu Avropada layiqincə təmsil edir. Onun gördüyü işlər göz qabağındadır. Mən düşünürəm ki, ən layiqli namizədlərdən biri elə Qurban Qurbanovdur.

Əli HƏYATİ