Qurban Qurbanov: “Biz çempionluq üçün bütün çətinlikləri nəzərə almışıq”

“Qarabağ”ın baş məşqçisi Qurban Qurbanovun Qol.Az saytına müsahibəsi

- Cari mövsüm Premyer Liqada ilk oyununuzu Quzanlıda “İnter”ə qarşı keçirdiniz. Matçdan sonrakı mətbuat konfransında komandanın çıxışından razı qalmadığınızı demişdiniz. Konkret olaraq hansı futbolçuların oyunu sizi qane etmədi?

- Elə bir baxımlı oyun da göstərə bilmədik. Buna şərait də yox idi. Həm meydança yaxşı deyildi, həm də hava isti idi. Belə vəziyyətdə baxımlı oyun alınmazdı. Sadəcə ondan razı qaldım ki, futbolçular nəticə üçün oynamağı bacardılar. Lazımı anda qələbə qazana bildilər.

- Dediniz ki, stadionun ot örüyü yaxşı vəziyyətdə deyildi. Maraqlıdır, bundan sonra necə olacaq? Komanda həmin örtükdə oynayacaq, yoxsa hər hansı bərpa işləri aparılandan sonra orada oynamaq mümkün olacaq?

- İnşallah, elə orada oynayacağıq. Təmir işləri indidən gedir. Son vaxtlar ölkə ərazisində havaların isti keçməsi ot örtüyünü yandırıb. Hazırda işçilərimiz Ağdamda lazımı işləri görür. Yəqin ki, oyundan-oyuna daha yaxşı olacaq.

- Zədəli futbolçuların çoxluğu “İnter”lə oyunda hiss olunurdu?

- Əlbəttə, hiss olunurdu. Zədəlilərdən başqa, bəzi futbolçularımız da tam hazırlıqlı deyildilər. Buna görə də şükürlər olsun Allaha, hər şey bizim üçün yaxşı qurtardı.

- Zədəlilərin vəziyyəti nə yerdədi?

- Zədəlilər də get-gedə yaxşılaşırlar. Ancaq inanmıram ki, onlardan hansısa növbəti oyunda “Kəpəz”ə qarşı oynaya bilsin. Hamısı qarşıdakı oyunu buraxacaq.

- “İnter”lə matçın ikinci hissəsi başlayan kimi Nderim Necipini əvəzlədiniz. Bu nə ilə əlaqədar idi?

- O, topla çox oynamağı xoşlayan futbolçudur. Ancaq hava şəraiti və meydança amili ona öz oyununu göstərməyə mane oldu. Bununla belə futbolçu istənilən şəraitə uyğunlaşa bilməli və öz oyununu göstərməlidir. Düzdür, Necipi elə də yaxşı təsir bağışlamadı. Ancaq onu meydançadan çıxarmağım sırf bununla bağlı deyildi. Hərdən oyunun gedişində əvəzetmələr lazım olur. Burada elə bir şey yoxdur.

- Cari mövsümdə başlıca hədəf kimi qarşınıza çempionluq qoyulub. Necə düşünürsünüz, hazırkı heyət qarşıya qoyulan məqsəd üçün yetərlidir?

- İnşallah, sonadək oynayacağıq. Elə əlimizdə olan futolçularla çempionluq sevinci yaşamaq istəyirik. Əsas istəyimiz milli oyunçuların uğur qazanmasıdır. Çalışırıq ki, öz yerli oyunçularımız çempionata, istənilən şəraitə uyğunlaşsınlar. Daha çox onların qələbəsini istəyirik. Bunu isə həm milli komanda, həm özümüz, həm də bütün azarkeşlər üçün etmək istəyirik. Böyük oyunlar üçün bizim gənclərin oynaması çox vacibdir. İnşallah, problemlər aradan qalxdıqdan sonra pis olmayacaq.

- Uzun müddətdən sonra “Qarabağ” yenidən Quzanlıya qayıtdı. Əvvəllər deyirdiniz ki, yol uzaqdır, futbolçular yorulur, şərait yaxşı deyil. Gördüyümz qədərilə şərait hələ də ideal səviyyədə deyil. Təkcə ot örtüyünü misal gətirmək kifayətdir. Yol isə həmin uzaq yoldur. Qarşısına çempionluq hədəfi qoyan bir komanda üçün bu amillər hansısa çətinlik yarada bilər?

- Bunların hamısını nəzərə almışıq. Yorğunluq yenə olacaq. Ancaq Quzanlıdakı azarkeşləri də düşünürük. Həm də futbolçular orada daha istəkli oynayırlar. Bundan başqa, yollar da nisbətən düzəlib. Əvvəl oyuna getməyə çox vaxt keçirdi. Ancaq indi xeyli fərq edir.

- Bayaq qeyd etdiniz ki, stadionda təmir işləri davam edir. Ot örtüyü nə vaxt ideal vəziyyətə gələcək?

- İdeal deməzdim. Çünki bunun üçün stadion müəyyən müddətə bağlanmalıdır. Amma inşallah, oyundan oyuna yaxşı vəziyyətə düşəcək.

- Növbəti turda Gəncəyə səfər edəcəksiniz. “Kəpəz”lə oyun barədə nə deyə bilərsiniz?

- Həqiqətən çətin bir səfərə gedirik. Gəncədə oynamaq həmişə ağır olub. Hazırda yaxşı komanda formalaşıb. Düzdür, zədəlilərimiz, müəyyən çatışmazlıqlarımız var. Ancaq buna baxmayaraq, oynayacağıq. Maksimum nəticə üçün meydana çıxacağıq.