Maksim Medvedyev: “Belçikada vuracağımız qol Bakıda bizə çox kömək olacaq”

“Qarabağ”ın müdafiəçisi Maksim Medvedyev komandası Belçikaya yola düşməzdən əvvəl Qol.Az saytının suallarını cavablandırıb.

- Artıq Belçikaya yollanırsınız. Komandada əhval-ruhiyyə necədir?

- Hər şey əladır. Uşaqlar hara getdiklərini və neynəmək lazım olduğunu yaxşı bilirlər. Əhval-ruhiyyə yüksək səviyyədədir. Çünki “Brügge” kimi güclü komandaya qarşı oynayacağıq. Hər şey qaydasındadır.

- “Banqa” və “Streymur” kimi komandalarla görüşlərdən sonra “Brügge” ilə oyuna köklənə bilmisiniz?

- “Qarabağ” güclü rəqiblərə qarşı daha yaxşı oynayır. Biz “Banqa” və “Streymur”la qarşılaşnda dedilər ki, zəif rəqiblərdir. Amma Avroliqada zəif rəqib olmur. Düzdür, “Brügge” “Banqa” və “Streymur”la müqayisədə çox güclü komandadır. Biz bunu yaxşı başa düşürük. Oyuna nə qədər ciddi hazırlaşmaq lazım olduğunu bilirik. Fikrimizi tamamilə qarşıdakı oyuna yönəltmişik. Məncə, meydana çıxıb, yaxşı mübarizə aparacaq və Bakıya sərfəli nəticə ilə qayıda biləcəyik.

- Rəqibi yetərincə təhlil etmisiniz?

- Hələ ki, internet vasitəsilə bəzi oyunlarına baxmışıq. Amma ümumi analiz hələ olmayıb. Bunu oyun günü baş məşqçimizlə birlikdə edəcəyik. Nə lazımdırsa, Qurban müəllim bizə deyəcək. Biz də onun verdiyi tapşırıqları meydançada yerinə yetirəcəyik.

- “Brügge”nin kifayət qədər güclü və çılğın azarkeş dəstəyi var. Bu amil sizi narahat etmir?

- Yox, biz artıq böyük azarkeş kütləsi qarşısında oynamağa öyrəşmişik. “Rusenburq”, “Visla” və “Borussiya” ilə oyunlarda bundan da çılğın azarkeşlər qarşısında meydana çıxmışıq. Düzdür, fanatlar komandaya çox kömək edirlər. Amma inanmıram ki, azarkeşlər tərəfindən hər hansı problem olacaq. Çünki onlar da bilirlər ki, gəlib Azərbaycanda böyük azarkeş kütləsi qarşısında oynayacaqlar. Eyni çətinliklə üzləşəcəklər. Fikrimcə, “Qarabağ” öz oyununu oynasa, hər şey istədiyimiz kimi olacaq.

- Rəqibin heyətindən xəbəriniz var. Olduqca güclü yarımmüdafiə və hücum xəttinə sahibdir. Hətta Hollandiya çempionatının ən sərrast hücumçusunu transfer etdilər. Bu baxımdan da siz müdafiəçilərin üzərinə daha çox iş düşəcək. Yəqin ki, bunu başa düşürsünüz?

- Əlbəttə, çox gözəl başa düşürük. Ona görə də rəqibə qarşı bizim öz strageyimız olacaq. Artıq məşqlərdə də bunun üzərində işləmişik. Bilirik ki, kim hansı futbolçuya qarşı, hansı mövqedə çıxış edəcək. Hərənin öz funksiyası var. Mənə elə gəlir ki, hamı üzərinə düşən vəzifəni yerinə yetirsə, elə də ciddi problemimiz olmayacaq. Onları yarımmüdafiədə qarşılamaq lazımdır.

- Səfər oyununda qazanılan hansı nəticəni sərfəli hesab etmək olar?

- Fikrimcə, səfər oyununda əsas bizim qol vurmağımızdır. Çünki Belçikada vuracağımız qol Bakıda bizə çox kömək olacaq. Ancaq hesabın necə olacağını bilmirəm. Sadəcə onu deyə bilərəm ki, çox maraqlı oyun olacaq.

- Ümumilikdə, püşkatmanın nəticəsini “Qarabağ” üçün bəxtsizlik kimi qəbul etmək olar? Çünki potensial rəqibləriniz arasında zəif komandalar da var idi.

- Yox, mən belə düşünmürəm. Qismətimizə “Brügge” düşdü. Bundan əvvəl də güclü rəqiblərlə oynamışıq. Məncə, belə şeyləri düşünmək lazım deyil. İnanıram ki, onlarla da oynaya biləcəyik. Əsas odur ki, növbəti mərhələyə necə keçməyin yollarını axtaraq.

- Sonda “Qarabağ” azarkeşlərinə nə demək istərdin?

- Həmişə bizi dəstəkləyiblər. “İmarət” fan-klubu hər məşq qabağı bizə paxlava gətirir. Sağ olsunlar. İnşallah, biz də onları sevindirərik. Azarkeşlərimizin dəstəyi bizim üçün çox vacibdir.