Mahir Şükürov: “Qəbələ”də Adams yox, Ramiz Məmmədov olsaydı, gəlməzdim”

Milli komandamız və “Qəbələ”nin müdafiəçisi Mahir Şükürovun Qol.Az saytına müsahibəsi

- “Qəbələ”yə keçməzdən əvvəl başqa klublardan təklif almışdın?

- Hə, iddialı klublardan təkliflər var idi. Ancaq adlarını açıqlamayacağam.

- Yaxşı, niyə məhz “Qəbələ”ni seçdin?

- “Qəbələ”ni ən çox şəraitinə görə seçdim. Burada futbolçular üçün hər bir imkan yaradılıb. Bundan başqa, bölgə klubudur. Uğurlu nəticələrə acdırlar. Həm də komandanın başında Toni Adams kimi mütəxəssis durur. Onunla işləmək yaxşıdır. “Qəbələ”yə keçidimdə də onun rolu az olmadı. Məni çağırıb dedi ki, komandada əcnəbi futbolçular çoxdur. Bizim yerli kapitana ehtiyacımız var. Adams bildirdi ki, komandada təcrübəli yerli futbolçunun olması onun da işinə yarayır. Çünki komandanın kapitanı yerli olanda, əcnəbilər onun sözünə baxırlar və meydanda daha ürəklə çıxış edirlər. “Qəbələ”də Adams yox, Ramiz Məmmədov olsaydı, gəlməzdim. Çünki onun vaxtında bəzi yerli futbolçular birləşmişdilər.

- Demək istəyirsən ki, Ramiz müəllimin vaxtında komandada qruplaşma var idi?

- Yox, qruplaşma deməyək. Onda oyunçuların əksəriyyəti yerlilər olduğundan, bəzilərinin arasında birlik var idi. Belə olanda komandanı idarə etmək asan olmur. İndi isə fərqlidir. “Qəbələ”də legioner çoxdur. Onlara yerli kapitan lazım idi. Ona görə də “Qəbələ”nin təklifini qəbul etdim.

- Belə çıxır ki, legionerləri idarə etmək üçün komandaya cəlb olunmusan.

- İdarə etmək deyəndə, əcnəbiləri bir az boş buraxanda istədikləri kimi oynayırlar. Ona görə də məni “Qəbələ”yə dəvət etdilər ki, legionerlərə örnək olum.

- Karyeran ərzində bir çox məşqçilərlə işləmisən. Toni Adamsı onlardan nə ilə fərqləndirərdin?

- Adams futbolun içindən çıxıb. Futbolçuyla necə davranmaq lazım olduğunu gözəl bilir. Məsələn, bəzi məşqçilər komandada intizam yaratmaq üçün futbolçuların qarşısına müəyyən tələblər qoyur. Misal üçün, futbolçuya deyir ki, saat 12-də yatmalısan. Ancaq Adams belə etmir. O hər şeyi bizə başa salır və bundan sonra məsələni oyunçuların peşəkarlığına buraxır. Daha onu sıxma-boğmaya salmır.

- Bundan əvvəlki müsahibəndə bildirmisən ki, Toni Adamsı aldatmaq mümkün deyil. Bunu hansı mənada demisən və səncə, futbolçu məşqçini aldatmalıdır?

- Yox, aldatmaq deyəndə bayaqkı məsələni nəzərdə tuturam. Futbolçuların yatmaq söhbəti və bu kimi bəzi şeylər. Məsələn, məşqçi məşq zamanı öz tapşırıqlarını verir. Onları yerinə yetirib-yetirməmək isə futbolçunun peşəkarlığına qalır. Bəzi oyunçular meydanda qaçmırlar və müxtəlif yollarla məşqçinin diqqətindən yayınırlar. Ancaq bu hərəkəti Adamsa qarşı etmək çox çətindir.

- Bir az da milli komandadan danışaq. Son iki rəsmi oyunda iştirak etmədin. Əvvəlcə Qazaxıstan məğlubiyyəti ilə bağlı fikirlərini öyrənək.

- Açığı, həmin oyunda nə baş verdiyini mən də başa düşə bilmədim. Komandamızın qələbə qazanmağa borclu olduğu bir görüş idi. Amma alınmadı.

- Bəs almanlara doğma meydanda məğlubiyyət?

- Onsuz da oyundan əvvəl hamı bilirdi ki, millimiz uduzacaq.

- “Anji”nin oyunlarını izləyirsən?

- Yox, izləmirəm.

- Mahaçqala klubundan ayrıldıqdan sonra, sabiq komandan barədə məlumatın var?

- Yox, nəyimə lazımdır. Heç maraqlanmıram.

- Deyəsən səni “Anji”dən küsdürüblər?

- Küsdürüblər deyəndə, mənə “Anji” lazımdır? Oyunları alıb udurlar, adını da qoyurlar ki, qələbə qazandıq.

- Belə çıxır ki, “Anji” oyun alqı-satqısı ilə məşğul olur.

- Belədir də. Başqa cür qələbə qazana bilmirlər.