"Qarabağ" "pley-off"u adlasa, nə qədər qazanacaq? - UEFA-nın mükafat fondu

"Qarabağ" bu gün Çempionlar Liqasının pley-off mərhələsinin cavab mərhələsində Zaqreb "Dinamo"su ilə qarşılaşacaq. Ağdam təmsilçisi səfərdəki ilk matçda 0:3 hesabı ilə uduzub. Qurban  Qurbanovun futbolçularının ilk dəfə 36 komandanın iştirakı ilə keçiriləcək ÇL-in Liqa Mərhələsinə düşməsi üçün 4 top fərqi ilə qalib gəlməsi lazımdır.

QOL.az-ın məlumatına görə, "Qarabağ" ÇL-in Liqa Mərhələsinə düşərsə, təkcə özünün və Azərbaycanın UEFA reytinqindəki mövqeyini gücləndirməyəcək, həm də büdcəsini xeyli artırmış olacaq. 

UEFA bu ilin martında 2024/25 mövsümü üçün Avropa kuboklarının mükafat fondunu təsdiq edib. Bu mövsüm UEFA-nın yeni formatda keçiriləcək 3 yarışı (Çempionlar Liqası, Avropa Liqası və Konfrans Liqası) üçün mükafat fondu artırılaraq 3,317 milyard avroya çatdırılıb. Bu məbləğin 2,467 milyard avrosu (74,38 faiz) Çempionlar Liqası və UEFA superkubokunun iştirakçılarına, 565 milyon avrosu (17,02 faiz) Avropa Liqasının, 285 milyon avrosu isə (8,60 faiz) Konfrans Liqasının iştirakçılarına ayrılıb.

"Qarabağ" da daxil olmaqla Çempionlar Liqasının pley-off mərhələsinə yüksələn klubların hər biri artıq 4,29 milyon avronu təmin edib. Əgər Azərbaycan çempionu bu mərhələdə qalib gəlsə, Liqa Mərhələsində iştirak edəcək digər 35 klub kimi UEFA-dan 18,62 milyon avro mükafat alacaq. Bu zaman isə "pley-off"da iştirak üçün təmin edilən 4,29 milyon avro artıq UEFA-nın büdcəsinə qayıdacaq.

ÇL-də Liqa Mərhələsində hər bir qələbəyə 2,1 milyon avro, heç-heçəyə isə 700 min avro nəzərdə tutulub. Bundan başqa, Liqa Mərhələsində yekunda 1-8-ci yeri tutan komandaların hər biri bonus olaraq 2 milyon avro, 9-16-cı yerləri tutanlar 1 milyon avro mükafat alacaq. 

Bundan başqa, ÇL-in Liqa Mərhələsi üçün bu mükafatlar da nəzərdə tutulub:

Final mərhələsinin hər bir "pley-off" iştirakçısı üçün 1 milyon avro

1/8 finala yüksələn klubların hər biri üçün 11 milyon avro

1/4 finala yüksələn klubların hər biri üçün 12,5 milyon avro

1/2 finala yüksələn klubların hər biri üçün 15 milyon avro

Finala yüksələn klubların hər biri üçün 18,5 milyon avro

ÇL qalibi üçün əlavə 6,5 milyon avro

2024-cü ildə Superkubok üçün yarışacaq klubların hər biri üçün 4 milyon avro, qalib üçün əlavə daha 1 milyon avro

Avropa Liqası

Avropa Liqasının Liqa Mərhələsinin 36 iştirakçı üçün isə 4,31 milyon avro mükafat ayrılıb. Qələbəyə görə 450 min avro, heç-heçəyə görə 150 min avro ayrılacaq. 1-8-ci yeri tutanlar əlavə 600 min, 9-16-cı yeri tutanlar isə 300 min avro bonus alacaq.

Bundan başqa, AL-in Liqa Mərhələsi üçün bu mükafatlar da nəzərdə tutulub:

Final mərhələsinin hər bir "pley-off" iştirakçısı üçün 300 min avro

1/8 finala yüksələn klubların hər biri üçün 1,75 milyon avro

1/4 finala yüksələn klubların hər biri üçün 2,5 milyon avro

1/2 finala yüksələn klubların hər biri üçün 4,2 milyon avro

Finala yüksələn klubların hər biri üçün 7 milyon avro

AL qalibi üçün əlavə 6 milyon avro

2024-cü ildə Superkubok üçün yarışacaq klubların hər biri üçün 4 milyon avro, qalib üçün əlavə daha 1 milyon avro

Konfrans Liqası

Nisbətən ən az gəlir isə bu yarışda olacaq. KL-in Liqa Mərhələsinin 36 iştirakçı üçün 3,17 milyon avro mükafat ayrılıb. Qələbəyə görə 400 min avro, heç-heçəyə görə 133 min avro ayrılacaq. 1-8-ci yeri tutanlar əlavə 400 min, 9-16-cı yeri tutanlar isə 200 min avro bonus alacaq.

Bundan başqa, KL-in Liqa Mərhələsi üçün bu mükafatlar da nəzərdə tutulub:

Final mərhələsinin hər bir "pley-off" iştirakçısı üçün 200 min avro

1/8 finala yüksələn klubların hər biri üçün 800 min avro

1/4 finala yüksələn klubların hər biri üçün 1,3 milyon avro

1/2 finala yüksələn klubların hər biri üçün 2,5 milyon avro

Finala yüksələn klubların hər biri üçün 4 milyon avro

KL qalibi üçün əlavə 3 milyon avro