Sadıq Sadıqov: «Şəxsən mənim hakimlərdən şikayətim yoxdur»

«Neftçi» klubunun prezidenti Sadıq Sadıqovun Qol.Az saytına müsahibəsi

- Komandanızın çempionluq uğrunda yarışda ən yaxın izləyiciləri ilə xal fərqi 4-ə enib. Bu mənada, «Neftçi»nin çempionluq şansını necə qiymətləndirirsiniz?
- Özünüz bilirsiniz ki, «altılıq»da hər bir komandanın çempion olmaq şansı var. Qış fasiləsindən sonra komandalar daha da gücləniblər. Xüsusilə «Xəzər Lənkəran», «Bakı» və «Qarabağ»ı qeyd edərdim. Çempionatın səviyyəsi də artıb. «Neftçi»nin çempionluq şansını hazırda 60 faiz görürəm. Amma hələ arxayınlaşmaq olmaz. «Xəzər Lənkəran» və  «Qarabağ»ın da çempionluq şansı var. Bu üç komandadan hansı layiqdirsə, o da birinci olacaq.
- Sizcə, çempionluğun taleyinə hansı turda aydınlıq gələcək?
- «Altılıq»da gərgin mübarizə gedir. Mən belə fərz edirəm ki, çempionatın bitməsinə iki tur qalmış çempion bəlli olacaq.
- İndi «Neftçi» üçün ən təhlükəli rəqib kimi son doqquz oyununun hamısında qələbə qazanan «Qarabağ»ı göstərirlər. Bu fikirlə razısınız?
- Bilirsiniz, çempionatdakı bütün komandalara hörmətimiz var. Mən «Xəzər Lənkəran»la «Qarabağ»ı ayırmaq istəməzdim. Hər ikisi çox səviyyəli komandadadır. Dediyim kimi, hər üç komandanın çempionluğa şansı daha çoxdur. «Qarabağ» Avroliqada iştirak etmiş və mərhələ keçmiş komandadır. Düzdür, «Qarabağ»ın şansı da böyükdür. Amma biz zamanı gözləməliyik.
- Futbol mütəxəssisləri «Neftçi»nin bu həftə «Qarabağ»ı yenəcəyi təqdirdə, çempionluğu 60-70 faiz təmin edəcəyini düşünürlər.
- Bu barədə indidən danışmaq doğru olmazdı. İnşallah, «Qarabağ»ı məğlub edək, sonra bu haqda danışarıq.
- Son zamanlar, xüsusilə «Xəzər Lənkəran»la oyunlarınızdan sonra «Neftçi»nin rəhbərliyi və məşqçiləri hakimlərin təzyiqlərilə üzləşdiklərini bildirirlər. Bir prezident kimi sizin bu məsələlərə münasibətiniz bilmək maraqlı olardı.
- Mən hələ hakimlər haqda danışmamışdım. Bilirsiniz, hər birimiz insanıq, hakim də səhv edə bilər. Onların çatışmazlığı varsa, buna AFFA və PFL-dəki komissiyalar öz münasibətin bildirir. «Neftçi»nin oyunları ərəfəsində və sonra komandamız ətrafında ajiotaj yaradılırdı ki, guya bizi çempion etmək istəyirlər. Bizim təmsilçilər də buna cavab olaraq, elə fikirlər səsləndirdilər. Bir daha deyirəm, «Neftçi»nin gücü göz qabağındadır. Bizim kiminsə köməyinə ehtiyacımız yoxdur. Biz hakimlərdən qərəzsiz olmağı tələb edirik. Şəxsən mənim bir klub prezidenti kimi hakimlərdən şikayətim yoxdur. Qərarı verən hakimlər briqadasıdır, bizim nəsə deməyimizlə isə heç nə dəyişməyəcək.
- «Qarabağ» «Neftçi»də daxil olmaqla, «altılıq»dakı ev oyunlarını Quzanlıda keçirmək istəyir. Sizin bu məsələyə münasibətiniz necədir?
- İlk gündən demişəm ki, bizə müraciət olsa, orada oynayacağıq. Mənim bu məsələylə bağlı «Qarabağ» rəhbərliyi ilə söhbətim olub. «Neftçi» üçün səfər oyunlarını harada keçirmək önəmli deyil. Amma bu məsələ ətrafında söz-söhbətlər ona görə baş qaldırdı ki, «Qarabağ» yalnız «altılıq» oyunları ərəfəsində Quzanlıya getmək qərarı verdi. Quzanlı bizim sevdiyimiz bir yerdi və «Qarabağ»ın da orada oynamağa haqqı çatır.
- Hər halda, bununla bağlı rəsmi razılıq məktubunuzu PFL-ə göndərəcəksiniz?
- Bəli.
- Millimiz iki gün öncə Belçikaya 1:4 hesabı ilə uduzdu. Həmin qarşılaşmada «Neftçi» futbolçularının sərgilədiyi oyun haqda fikirləriniz necədir?
- Oyunu televiziya vasitəsilə izlədim. Özünüz bilirsiniz ki, Belçika qrupun ən güclü komandalarından biridir. Birinci hissədə komandamızın oyunu xoşuma gəldi. Həm «Neftçi»nin, həm də millinin digər futbolçuları özlərini yaxşı tərəfdən göstərdilər. Buraxılan ikinci qoldan sonra isə futbolçular özlərini itirdilər. Mən Belçikada sensasiya olacağını gözləmirdim. Amma 1:4 hesablı məğlubiyyət də ədalətli nəticə deyil.
- «Xəzər Lənkəran»la kubok oyunundan sonra «Neftçi»nin kapitanı Rail Məlikov klubun formasını yerə çarpdı. Bununla bağlı futbolçuyla söhbətiniz olub?
- Bəli. Özünüz bilirsinin ki, «Neftçi»də intizam baxımından da çox güclü işlər gedir. Həmin matç çox gərgin keçdi. Rail formanı o məqsədli yerə atmayıb. Sadəcə, o, bir kapitan kimi, uduzmağı həzm edə bilmirdi. Özü dedi ki, formanı yerə çarpmayıb, əlindən yerə düşüb. Düzdür, idmançı məğlubiyyəti həzm edə bilmir. Amma bu, heç kimə əsas vermir ki, təmsil etdiyi klubun formasını yerə çarpsın. Rail dedi ki, hərəkətinə görə üzr istəyir. O, həyəcanlı olduğuna görə, hərəkətlərinə fikir vermirdi. Onu da başa düşmək olar. Amma yenə də deyirəm, mən belə şeylərə haqq qazandırmıram. Railin hərəkətini isə kluba hörmətsizlik kimi qiymətləndirmirəm.