Zohair Benouahi: “Mənim favoritim "Xəzər Lənkəran"dır”

AZAL klubunun futbolçusu Zohair Benouahinin Qol.Az saytına müsahibəsi

- Bir müddəv əvvəl zədə almışdın. Hazırda durumun necədir?
- Bəli, iki aydı zədəliyəm, ona görə də məşqlərdə istədiyim kimi calışa bilmirəm. Bu da mənim zəif çıxış etməyimə səbəb olub. Əslində, zədəmi tam sağaltmaq üçün oynamaya da bilərdim. Ancaq komandamın mənə ehtiyacı var idi və rəhbərlik də meydana çıxmağımı istəyirdi.
- AZAL-in heyətində bir neçə dəfə fərqlənsən də, son vaxtlar qol vura bilmirsən.
- Dogrudur. Bunu çempionata tam hazır olmamağımla əlaqələndirərdim.
- Premyer Liqanın oyunlarının səviyyəsi səni qane edir?
- Mən sizin çempionatı çox bəyənirəm. Xüsusən də “Neftçi” və “Xəzər Lənkəran” kimi güclü klublarınız var. Bu cür komandalar Premyer Liqanıza əlavə rəng qatır. Digər klublar da onlardan geri qalmır. Bəzən ortabab klublar, məsələn, “Muğan” və “Gəncə” liderlərə baş ağrısı olur. Bu da Premyer Liqaya marağı artırır. Bildiyimə görə, builki çempionatınız keçən ilkindən daha baxımlı  keçir.
- Əvvəl çıxış etdiyin çempionatları bizim Premyer Liqadan nə ilə fərqləndirərdin?
- Düşünürəm ki, sizin birincilik əvvəl çıxış etmiş olduğum Küveyt və Mərakeşdəki çempionatdan daha güclüdür. Burda yeganə çatışmayan cəhət futbolçuların fiziki cəhətdən zəif olmasıdır. Texnikalı oyun göstərsələr də, oyunu axıra kimi davam etdirə bilmirlər. Bu məsələ də həllini tapsa, sizin çempionat Avropa səviyəsinə çatar.
- Sabah “Xəzər Lənkəran”la qarşılaşacaqsınız. Bu oyundan nə gözləyirsən?
- Mən “Xəzər Lənkəran” kimi güclü komandaya qarşı oynamağı çox sevirəm. Çünki belə oyunlar digərlərinə baxanda daha baxımlı alınır. Düzdür, oyuna yüz faiz hazır deyiləm. Ançaq düşünürəm ki, əsas heyətdə oyuna çıxsam, komandama yardım edə biləcəyəm. Oyunda ancaq qələbəni düşünəcəyik.
- İlk “altılığ”ın digər oyunlarından nə gözləyirsən?
- AZAL-ın heç bir güclü komandayla problemi yoxdu. Biz ancaq “Muğan” və “Gəncə” kimi ortabab komandalarla oyunda axsayırıq. Birdə qorxduğumuz yeganə amil hakimlikdir. Son vaxtlar bu, sizdə çox müzakirə olunur.
- AZAL-ın builki məqsədi nədi?
- Premyer Liqa başlayandan bəri qarşımıza ancaq Avroliqada oynamaq tapşırığı qoyulub. Bunun üçün ən qısa yol Azərbaycan kubokun qazanmaqdı. Ancaq fərq etməz birincilik və ya kubok. Hər ikisində qələbə üçün oynayacağıq.
- Önümüzdə oyunlarda qolsuzluq seriyana son qoya biləcəksən?
- Yenə deyirəm ki, hələ ideal formamdan uzağam. Düzdü, ilk vaxtlar bir neçə oyunda qol vurdum. Ancaq zədə almağım bunun davamına imkan vermədi. Məhz bu amil məni yaxşı oynamaqdan məhrum edir. Gələcək oyunlarda bu uğursuzluğa son qoymaq fikrindəyəm.
- Bu il Azərbaycanda kimi çempion görürsən?
- Mənim favoritim “Xəzər Lənkəran”dır. Məncə, onlar birinciliyi əldə edəcəklər. Qış fasiləsində onlar çox güclü transfer həyata keçiriblər.
- Səncə, Azərbaycanda ən güclü legioner və yerli oyunçu kimdi?
- Legionerlərdən “Qarabağ”da çıxış edən Georgi Adamiya və eyni klubda top qovan Rəşad Sadiqovu görürəm.
- Azərbaycanla ölkəniz arasında nə kimi fərqlər görürsüz? Hər halda hər ikisi müsəlman ölkəsidir.
- Mən burda özümü legioner hiss etmirəm. Bu səbəbdən, iki ölkəni ayırmazdım. Burda çıxış edən əcnəbi vətəndaşlar kimi, mən də sizin qonaqpərvərliyinizi xüsusu qeyd etmək istəyirəm.
- Bura gəlməmişdən öncə bizim ölkə haqda məlumatınız var idi?
- Xeyr, heç adın da eşitməmişdim, harda yerləşdiyini də bilmirdim. Bakıya gələndən sonra belə bir müsəlman ölkəsinin olduğunu və Xəzər dənizi sahilində yerləşdiyini öyrəndim.
- Mətbəximizi bəyənirsən?
- Mərakeşlə Azərbaycan mətbəxi çox da fərqlənmir. Hər ikisində oxşar yeməklər var. Ona görə yeməklərinizi çox rahatlıqla yeyirəm. Xüsusən də aşı bəyənirəm.