Qurban Qurbanov: «Elvin Məmmədovla razılığa gələ bilmədik»

«Qarabağ»ın baş məşqçisi Qurban Qurbanov hazırda Türkiyənin Antalya şəhərində təlim-məşq toplanışında olan komandasının hazırkı durumu ilə bağlı Qol.Az-ın suallarını cavablandırıb

- Hazırlıq prosesinin gedişatı sizi qane edirmi?

- Demək olar ki, hə. Həm hava şəraiti, həm meydançaların durumu istədiyimiz kimidir. Ən əsası futbolçularımızın hamısının bir yerdə olmasıdır. Hamısı məşq edir. Yalnız Rəşad Kərimov zədəlidir. O, bizimlə birgə olsa da, hələlik komandanın ümumi məşqlərində iştirak etmir. Yeni transferimiz İlqar Qurbanov, həmçinin Admir Teli hələlik tam hazır olmadıqlarından onlar üçün ayrıca proqram tutulub. Ümumilikdə isə, məşq prosesi normaldır və düşündüyümüz qaydada gedir.

- İki gün öncə futbolçularınızdan test götürdünüz. Hansı futbolçuların durumu sizi qane etdi, hansıların yox?

- Demək olar ki, hamısında göstəricilər istədiyimiz kimi oldu. Çünki futbolçular istirahətə buraxılanda onlara əlavə proqram verilmişdi. Onlar da bunun üzərində çalışırdılar. Hələlik yalnız İlqar Qurbanovla Admir Teli məşq formasından uzaqdır. Ona görə də indi bu futbolçular ayrıca proqram üzrə çalışırlar. Bundan sonra onların hazırlıqları komandanın digər futbolçularıyla eyni səviyyədə olacaq.

- İlqar Qurbanovun «Qarabağ»a transferi maraq doğurdu. Hər həlda, formasından uzaq düşdüyü üçün bu futbolçunun komandanıza keçidini çoxları gözləmirdi.

- İlqarın əvvəlki klubu - «Mersin İdmanyurdu» ilə müqaviləsinin pozulduğunu bilirdik. Komandamızda yerli futbolçuların daha çox olması üçün İlqarı «Qarabağ»a dəvət etdik. Biz indi istədiyimiz başqa yerli futbolçuları komandamıza cəlb edə bilmirik, çünki klubları ilə müqavilələri var. İlqarın «Fənərbaxça» kimi bir klubda yetişdiyini, Azərbaycanda «Xəzər Lənkəran», Türkiyədə bir neçə komandada oynadığını nəzərə alıb onu komandamıza cəlb etdik. Onun böyük təcrübəsi var. Bu yaşda formadan düşməsində qeyri-adi heç nə yoxdur. İlqarın güc toplaması üçün xeyli vaxtı var. İlqar milli komandamızda da çıxış edib. Bu mənada, düşündük ki, biz onun potensialını üzə çıxara bilərik.

Biz onun əvvəlki formasını qaytarmağa çalışacağıq. İlqar özü də üzərində çox işləməlidir. Məşqçilərimiz onu daim nəzarətdə saxalayaqcaqlar.

- «İnter»də ehtiyatda qalan Elvin Məmmədov «Qarabağ»a gələndən sonra komandanızın aparıcı futbolçularından biri oldu, «Bakı»da uğursuz mövsüm keçirən Georgi Adamiya məhz sizin rəhbərliyiniz altında oynayanda ona ikinci nəfəs gəldi. Bu mənada, İlqardan da eyni şeyi gözləmək olarmı?

- Biz onu məhz bu fikirlə komandamıza götürmüşük. Mən İlqarın potensialına bələdəm. Onda futbolçuya xas olan çox üstün cəhət var. Biz də bundan yararlanmalıyıq. Biz ona inandığımız üçün razılığa gəlmişik.

- Bəs, uzunmüddətli zədədən sonra məşqlərə başlayan Əfran İsmayılovun durumu nə yerdədir?

- Əlbəttə, zədəsi səbəbindən Əfran əvvəlki formasından uzaq düşüb. O, beş gündür ki, komandamızda məşqlərə başlayıb. Ona oyun təcrübəsi lazımdır. İlk növbədə fiziki formasını bərpa etməlidir ki, dizində yenidən problem meydana çıxmasın. Çox yüklənmə olanda onda ağrılar baş qaldırır ki, bu da normaldır. Çünki zədəsini bərpa etdikdən sonra yenicə məşqlərə başlayıb. Bu gün ona sərbəst məşq verdik. Axşamkı məşqdə də ayrıca çalışacaq. Sabahdan isə yenidən komandayla birgə məşq edəcək. Əfran elə futbolçudur ki, fiziki forması yerində olsa, problemlə üzləşməyəcək.

- «Qəbələ»ylə çempionatdakı qarşıdakı oyunda o, start heyətində meydana çıxa bilərmi?

- Bu, hələlik sual altındadır. Özüm də onun birdən-birə çox yüklənməsini istəmirəm. Biz üç-beş oyunu Əfransız keçirə bilərik. Çünki Əfranı yenidən itirmək istəmirik.

- Belə başa düşdüm ki, Əfranı final mərhələsinin oyunlarına kimi qorumaq fikrindəsiniz.

- Biz bunu onun özünə görə edəcəyik. İstəyirik ki, təzədən zədə almasın. Ona görə də tələsmək lazım deyil.

- Komandanıza Hollandiyadan bir futbolçu baxışa gəlsə də, geri göndərdiniz. Qarşıdakı günlərdə daha kimləri sınaqdan çıxarmaq fikrindəsiniz?

- Artıq Belçika çempionatında oynamış makedoniyalı Nzerin Nedzip bizimlə birgə məşq edir. Onun oyunu bizi qane edir.

Bu futbolçuyla müqavilə imzalamaq ehtimalı böyükdür.

Bundan başqa, heyətimizə bir neçə futbolçu baxışa gələcək. Onları qarşıdakı yoldaşlıq matçlarında yoxlamaq istəyirik. Çox oyunçu transfer etmək istəmirik. Qış fasiləsində iki, maksimum üç oyunçu alacağıq.

- Hansı mövqeləri möhkəmləndirmək fikrindəsiniz?

- İstəyirik ki, komandamızda rəqabət çox olsun. Fikrimiz var ki, bir hücumçu baxışdan keçirək. Bundan başqa, bəlkə müdafiəçiləri və bir qapıçını sınaqdan çıxardıq. Mən bu məsələlərdə çox tələbkaram. İstəyirəm ki, futbolçunun həm insani keyfiyyətləri yüksək olsun, həm də peşəkarlıq səviyyəsi komandamıza uyğun gəlsin. Belə futbolçular olsa, transfer edəcəyik.

- Elvin Məmmədovun «Qarabağ»da qalıb-qalmayacağı da maraq doğurur…

- Onunla müqavilənin uzadılması ilə bağlı danışıqlar oldu. Amma razılığa gələ bilmədik.

- Yəni Elvin «Qarabağ»dan gedir?

- Onun hələ bizimlə müqaviləsi var. Məncə, yenidən danışıqlar aparacağıq. Biz heç bir futbolçunun karyerasının qarşısını almaq istəmirik. Futbolçunun çıxış etdiyi komanda onun ürəyincə olmalıdır. Əgər belə olmayacaqsa, biz onun qarşısını almayacağıq. Bu mənada, ola bilər ki, Elvin Məmmədovla yollarımızı ayıraq.

- Elvinlə bağlı yekun qərar nə vaxt veriləcək?

- Düşünürəm ki, bugünlərdə hər şey tam aydınlaşacaq.

- Bu ayın sonları «Qarabağ»ın bir neçə futbolçusunun da iştirak edəcəyi millinin təlim-məşq toplanışı başlayır. Bu, sizin planlarınızı pozmayacaq ki?

- Biz çox istəyirik ki, komandanın bütün üzvləri hazırlıq prosesinin sonuna kimi bir yerdə olsun. Çempionatın həlledici oyunlarına birgə hazırlaşmaq çox xoşdur. İndi futbolçularımızın millinin düşərgəsinə qoşulması bizə müəyyən problemlər yaradacaq. Fiziki olmasa da, taktiki və texniki cəhətdən tam hazırlaşa bilməyəcəyik. Baxmayaraq ki, bizim oyunçular peşəkardılar, futbolçular bir yerdə çox olmayanda problemlər yaranır.

Amma digər tərəfdən milli komandada futbolçularımızın çxışı etməsi sevindirici haldır və hər bir klub öz oyunçusunu ölkənin əsas komandasına buraxmalıdır.