"Ona görə bu gün 2 xal itirdik" - Murad Musayev

"Ona görə bu gün 2 xal itirdik" - Murad Musayev
ÖLKƏ FUTBOLU 3 Dekabr 2022 / 19:56 4804
-  A +

 "Demək olar ki, bu gün rəqibdən tamamilə üstün idik. "Şamaxı"nın təhlükəli epizodu yox idi. Təəssüf edirəm ki, bu gün qələbə qazana bilmədik. 10 nəfərlə qalmağımıza baxmayaraq matç bizim nəzarətimiz altında idi. Qələbə qazanmamışıqsa, günahı özümüzdə axtarmalıyıq. 25-ci dəqiqədə lazımsız hərəkətə görə qırmızı vərəqə gördük. Hazırda ikili hisslərim var. Komandaya ikinci hissədəki oyuna görə təşəkkür edirəm. Amma bu cür görüşlərdə 3 xal qazanmalıyıq".

Qol.az xəbər verir ki, bu sözləri "Sabah"ın baş məşqçisi Murad Musayev Misli Premyer Liqasının 16-cı turunda evdə "Şamaxı" ilə heç-heçə etdikləri oyundan (1:1) sonra keçirilən mətbuat konfransında deyib.

"Müdafiə olunan komandalara qarşı oynamaq çox çətindir. Belə matçlarda əlinə düşən fürsətləri dəyərləndirmirsənsə, günahkar özünsən" - deyə o bildirib.

Mütəxəssis sözügedən matçda həm qol vuran, həm də rəqibinin sifətinə zərbə vurduğu üçün qırmızı vərəqə görən Kristian Sebalyosla bağlı söyləyib: "Qəhrəmanlıq barədə heç nə deyə bilmərəm. Əgər oyun epizodunda qırmızı vərəqə alsaydı, nəsə demək olardı. Nizam-intizamı pozub belə qırmızı vərəqə görürsənsə, qəhrəmanlıqdan söhbət gedə bilməz. Çünki, ona görə bu gün 2 xal itirdik.

M.Musayev dünən "Neftçi"nin "Qarabağ"a 0:4 hesablı məğlubiyyətinin futbolçularında arxayınlıq yaradıb-yaratması ilə əlaqədar deyib: " Qələbə seriyalarından sonra peşəkarlıq ortaya çıxır. Əgər iddiamız varsa, avrokuboklara getmək uğrunda oynayırıqsa, peşəkarlığı heç vaxt unutmamalıyıq. Bu gün motivasiyanın çatmadığını deməzdim. Amma səhvlər etdik.

O, "Şamaxı" ilə görüşdə zədələnən futbolçusu Aleksey İsayevin durumu haqda da danışıb: "Heç nə deyə bilmərəm. Tibbi müayinədən sonra durumu aydın olacaq".

Daha çox


Son xəbərlər