Qurban Qurbanov: «Bakı» bizdən daha üstündür»

«Qarabağ» klubunun baş məşqçisi Qurban Qurbanovun Qol.Az saytına müsahibəsi

- Bu həftənin şənbə günü Unibank Premyer Liqasında «Bakı»yla qarşılaşacaqsınız. Bu oyuna hazırlıq necə gedir?
- Hazırlıq bir o qədər də yaxşı getmir. Çünki istədiyimiz futbolçuların hamısıyla birgə məşq edə bilmirik. Futbolçularımızın bəziləri zədəli, bir hissəsi isə millinin düşərgəsindədir. Amma əlimizdən gələni edirik ki, komandanı qarşıdakı oyuna tam hazırlaya bilək.
- Zədəli futbolçularınızın durumu nə yerdədir?
- Bir o qədər də yaxşı deyil. Emin İmaməliyev iki-üç günə fərdi qaydada məşqlərə başlayacaq. Maksim Medvedyev hələ dünən həkimlərin nəzarəti altında hazırlığa başlayıb. Samir Abbasov daha çox trenajorda məşq edir. Andrey Rubinsin tam bərpa olub heyətimizə qayıtması isə hələ bir az uzun çəkəcək. Onun əzələsi hələ birləşməyib. Əfran İsmayılov isə yalnız gələn ilin yanvarında oynaya biləcək.
- Futbolçularınızın yarısı zədəli, yarısı da millinin düşərgəsindədir. Bütün bunlar «Bakı»yla oyunun nəticəsinə təsir göstərə bilərmi?
- Biz bunu istəməzdik. Amma futbolçuların ayrı-ayrılıqda məşq etməsinin bizə problem yaratması mümkündür.
- Millidəki futbolçularınız «Qarabağ»ın düşərgəsinə nə vaxt qayıdacaq?
- Sabah səhər onlar bizimlə birgə məşq edəcəklər.
- Sərəncamınızda çox az futbolçunun olması «Bakı»yla oyunda sizin taktiki gedişatınıza nə dərəcədə təsir göstərə bilər?
- Məncə, böyük problem olacaq.
- Amma nəzərə alaq ki, rəqibiniz bu mövsümü elə də yaxşı keçirməyib. Komandada psixoloji durum yaxşı səviyyədə deyil.
- «Bakı» nə qədər uğursuz çıxış etsə də, güclü heyətə malikdir, yaxşı futbolçulardan qurulmuş bir komandadır. Düşünürəm ki, son turda «Gəncə» üzərindəki qələbədən sonra futbolçuların əhval-ruhiyyəsi yüksəlib. Mən başa düşürəm ki, növbəti turda onlara da qələbə lazımdır. Onların bir üstünlüyü ondadır ki, bizdən fərqli olaraq, komandanın demək olar, bütün üzvləri bir yerdədir. Yalnız Cəmşid Məhərrəmov millinin təlim-məşq toplanışına qatılıb, Vaqif Cavadov isə zədəlidir.  Amma bizdə əsas heyətin beş futbolçusu millinin düşərgəsindədir, zədəli futbolçularımız da çoxdur. Bütün bunlar isə, təkrar edirəm, bizə problem yarada bilər.
- Demək istəyirsiniz ki, rəqibiniz bu gün hazırlıq baxımından sizdən üstündür?
- Çox üstündür.
- Ötən mövsüm və avroliqa oyunlarında əsas heyətdə tez-tez şans verdiyiniz Aslan Kərimov və Namiq Yusifovun axır oyunlarda meydanda az-az görünməsinin səbəbi nədir?
- Onlara da şans verilib. İmkanlarından istifadə etmişik. Biz hər oyuna düzgün hazırlaşırıq. Bəzən olur ki, bir heyət daha yaxşı çıxış edir və məşqçi dəyişikliyə əl atmır. Amma adlarını çəkdiyiniz futbolçuların da oynamaq imkanı var. Biz Aslanla Namiqə güvənirik.
- Hazırkı heyət sizi qane edir?
- Əslində bu heyət də tez-tez dəyişilir. Devran Ayhan son oyunlarda yaxşı təsir bağışlasa da, «Xəzər Lənkəran» və MOİK-lə matçlarda səhvləri oldu. Biz digər futbolçularımızın da potensiallarından istifadə edirik.
- «Xəzər Lənkəran»la oyundan sonra Vüqar Nadirovdan narazılıq etdiyini bildirmişdiniz. Vüqar bu xəbərdarlıqdan nəticə çıxarıb?
- Mən məşqçi karyeramda indiyədək heç bir futbolçuya Vüqar Nadirov qədər güvənməmişəm. O, «Qarabağ»a qayıdandan sonra daim əsas heyətdə oynayırdı. Əgər ona inanmasaydım, əsas heyətdə meydana buraxmazdım. Bu xəbərdarlıqdan sonra Vüqar öz üzərində daha ciddi çalışmağa başlayıb. Hətta özü fərdi qaydada da məşq edirdi. Görünür, xəbərdarlıqdan nəticə çıxarıb. Vüqar hazırda millinin təlim-məşq toplanışındadır. Heyətimizə qayıtdıqdan sonra onun durumuna baxacağam, söhbət edəcəyəm. Ola bilər ki, «Bakı»yla qarşıdakı oyunda Vüqara əsas heyətdə yer verim».
Mən Vüqar Nadirovun sürətindən, güclü zərbələrindən həmişə istifadə etməyə çalışmışam. Amma Rauf Əliyev daha yaxşı formada olduğundan, daha yaxşı inkişaf etdiyindən əsas heyətdə bu futbolçuya şans verirəm. Vüqar Nadirov isə nə vaxt oyunlara hazır olubsa, o zaman da meydana buraxmışam. «Borussiya», «Visla» ilə matçlarda Vüqar start heyətində yer almışdı. Son vaxtlar isə o, mənim istədiyim formada deyildi.
- Bir müddət əvvəl heyətdə ciddi dəyişiklər edəcəyinizi demişdiniz. İndi fikriniz dəyişməyib ki?

- Yox, fikrimdə qalıram. Dəyişiklikləri istisna etmirəm. Sabit heyət qurmağa çalışıram.
- Qış fasiləsi yaxınlaşmaqdadır. Narazı qaldığınız və göndərəcəyiniz futbolçuların siyahısını hazırlamısınız?
- Yox.
- Narazı qaldığınız futbolçuların sayı nə qədərdir?
- Bir nəfər də ola bilər, üç nəfər də, beş nəfər də. Hələ çox şey qarşıdakı oyunlardan sonra bilinəcək.
- «Bakı», «Azal», «Neftçi» və «İnter»lə dalbadal dörd ağır oyununuz olacaq. Millinin düşərgəsindən qayıdan futbolçularınız bu çətin matçlara lazımınca hazırlaşa biləcəklər?
- Biz buna çalışacağıq. Əvvəlcədən bir söz deyə bilmərəm. Qarşıdakı oyunlara başqa bir sistemlə hazırlaşacağıq. Onlar millinin düşərgəsindədir, tam fərqli məşq keçirlər.
- Hazırkı turnir cədvəlinə baxanda hansı komandanın altılıqda yerini artıq indidən təmin etdiyini söyləmək olar?
- Məncə, ilk dördlükdə qərarlaşan komandaların hamısı altılıqda mübarizə aparacaqlar.
- Qış fasiləsi yaxınlaşır. Tranfer çalışmalarına başlamısınız?
- Hələ ki, fikrimizi yalnız çempionatın qarşıdakı oyunlarına yönəltmişik.