Tuyqun Nadirov: «O şüar tribunada beş dəqiqə qalıb, ya qalmayıb»

Unibank Premyer Liqasının səkkizinci turunun «Xəzər Lənkəran» - «Bakı» görüşü qalmaqallı olaylarla yadda qaldı. Xüsusən lənkəranlı azarkeşlərin “Sevirəm Xəzərin qucağındakı, ey əziz, ey gözəl, mehriban Bakı” şüarına paytaxt klubu rəsmi saytı vasitəsilə etirazını bildirib: “Unibank Premyer Liqasının 8-ci turunun "Xəzər Lənkəran" - "Bakı" qarşılaşması bir qrup yerli azarkeşin etik normalara uyğun gəlməyən, milli mentalitetimizə yad və təhqir xarakterli banner qaldırması ilə müşayət olundu. Təəssüf ki, nə həqiqi futbol azarkeşləri, nə də meydan sahiblərinin rəsmi nümayəndələri bu rüsvayçı hala münasibət bildirdilər».
Qol.Az-ın müxbiri bu məsələylə bağlı «Xəzər Lənkəran»ın vitse-prezidenti Tuyqun Nadirova müraciət edərək onun fikirlərini öyrənib.

- «Bakı» klubu lənkəranlı azarkeşlər tərəfindən səsləndirilən şüara etiraz edib. Bununla bağlı «Xəzər Lənkəran»ın mövqeyi necədir?
- Bilirsiniz, oyunlarda belə şüarların olması normal haldır. Əlbəttə, biz bu şüarı görəndən sonra azarkeşlərimizdən xahiş etdik ki, onu yığışdırsınlar. Sizi inandırım ki, o şüar tribunada beş dəqiqə qalıb, ya qalmayıb. Bu hadisə ikinci hissənin ortalarında baş vermişdi.
- Şüarın konkret kimin tərəfindən hazırlandığını müəyyənləşdirə bilmisiniz?
- Bunu klubun rəsmi fan-klubu deyil, sıravi azarkeşlər hazırlayıblar. Birdə ki, biz xaricdə də belə hallara rast gəlirik. Yabancı ölkələrdə də böyük bir plakat hazırlanır. Amma yenə də deyirəm, bu şüarı görəndən sonra biz onlardan xahiş etdik ki, onu yığışdırsınlar. Azarkeşlərimiz də sözümüzü yerə salmadılar.
- Bir məsələ var ki, «Bakı» klubu plakata deyil, orada səslənən və etik normaları aşan ifadələrə etiraz edir.
- Bilirsiniz, bu şüarı klub sifariş etməyib. «Xəzər Lənkəran» bu cür halların baş verməsində maraqlı deyil. Hər bir azarkeşin öz fikri, dünyagörüşü var. Bilirsiniz ki, «Bakı» kubokun finalında bizə qalib gələndən sonra narazılıq yaranmışdı. Ola bilər ki, bəzi azarkeşlərimiz məhz buna görə belə bir şüar hazırlayıblar.
- Ümumiyyətlə, «Xəzər Lənkəran» klubu etik normaları aşan şüarların səsləndirilməsinə necə yanaşır?
- Hər halda biz fikrimizi azarkeşlərimizə çatdırdıq, onlar da plakatı dərhal yığışdırdılar. Əgər belə şeylərə normal yanaşsaydıq,  əlbəttə ki, azarkeşlərə müraciət etməzdik.
- «Bakı» rəhbərliyi bu məsələylə bağlı konkret sizin klubun özünə müraciət edibmi?
- Xeyr. Bizim həmin klubun rəhbərliyi ilə gözəl münasibətlərimiz var. Oyunu da Zeynal Məmmədovla bir yerdə izləyirdik. Mənə elə gəlir ki, elə bir ciddi problem baş verməyib. Qonaqlarımızı da Lənkəranda yüksək səviyyədə qəbul edib, yola salmışıq.
- Oyunun özü haqda nə fikirdəsiniz? Hesabda irəlidə olduğunuz halda 10 nəfərlə qalan «Bakı»yla oyunun son dəqiqələrində qol buraxıb qələbəni əldən verdiniz.
- «Bakı» gözəl və əzmkar oyun nümayiş etdirdi. Hətta mən bu məsuliyyəti öz üzərimə götürüb deyə bilərəm ki, «Bakı» bu mövsüm ən yaxşı oyununu «Xəzər Lənkəran»a qarşı matçda nümayiş etdirdi. Bütün bunlar onu göstərir ki, hər bir klub «Xəzər Lənkəran»a qarşı özəl hazırlaşır.
Bizim komanda da layiqli oyun nümayiş etdirdi. Düzdür, yağışlı hava oynadıq, amma oyunumuz bizi qane etdi. Bunu matçdan sonrakı mətbuat konfransında komandamızın baş məşqçisi Mirça Rednik də etiraf etdi. Bir neçə qol epizodundan istifadə edə bilmədik. Qələbə qazanmağımızda hakimin də yanlış qərarları mane oldu. Başqa sözlə, bu turu da hakimin bizə qarşı qərarıyla yola verdik. «Xəzər Lənkəran»a qarşı hakim səhvləri artıq adətə çevrilib.