Tuyqun Nadirov: “Xaqani Məmmədov istefa verməlidir”

Unibank Premyer Liqasının 6-cı turu çərçivəsində səfərdə “Muğan”ın qonağı olan “Xəzər Lənkəran”ın son oyunu qalmaqalla başa çatdı. Qol.Az-ın məlumatına görə, oyunun gedişində baş hakim Anar Salmanovun bir sıra qərəzli qərarları ilə üzləşən və sonda qolsuz heç-heçə etməklə zirvədəki mövqeyini əldən verən Lənkəran klubu hazırda ondan ciddi şəkildə narazıdır. Bu narazılığını klubun rəsmi saytı vasitəsilə də bəyan edən cənublular Salmanovun mütləq cəzalanmasını istəyir.
“Xəzər Lənkəran”ın vitse-prezidenti Tuyqun Nadirov da Qol.Az-ın müxbiri ilə söhbətində son baş verən olaylara münasibətini bildirib:

- “Muğan”la səfər matçında baş verənlərə nə ad verəcəyimi bilmirəm. Bu, sadəcə biabırçılıq idi. Hakim meydanda ağlına gələn özbaşnalığı elədi, komandamızın qələbə qazanmaması üçün əlindən gələni əsirgəmədi. Bütün bunların nəyə görə baş verdiyini dəqiq bilməsəm də, hər halda fakt bundan ibarətdir ki, həmin gün Anar Salmanov “Xəzər Lənkəran”ın qələbə qazanmasını istəmirdi. Bunu nəinki biz, stadiona toplaşanlar, hətta televiziya vasitəsilə oyunun gedişini izləyən tamaşaçılar da gördü. Hər kəs klubumuza qarşı necə ədalətsiz münasibət göstərilməsinin şahididir. Lakin biz bu olayların üstündən sakitcə keçilməsinə icazə vermək istəmirik. Salmanov etdiyi özbaşnalıqlara görə, mütləq cəzasını almalıdır.
- Maraqlıdır ki, bu gün keçirilən AFFA İntizam Komitəsinin iclasında da ən böyük cəzanı məhz “Xəzər Lənkəran”a kəsdilər…
- Orda azarkeşlərin meydanda kənar əşyalar atmasına görə, bizə cəza kəsiblər. Bunu normal qarşılayırıq. Düzdür, azarkeşlərin belə hərəkətlərə yol verməsini alqışlamırıq. Ancaq nəzərə almaq lazımdır ki, onları da bu həddə hakimin ədalətsiz idarəçiliyi səbəb oldu. Nizamnamədə isə belə qayda var ki, meydana atılan əşya hansı klubun azarkeşləri tərəfindən həyata keçirilibsə, cəza da həmin kluba kəsilir. Bizim azarkeşlərin yol verdiyi bu qayda pozuntusuna görə, cəriməni ödəməkdə problem görmürük. Ancaq sarı vərəqə alan oyunçulara görə cərimə ödəməyəcəyik. Buna görə, apelyasiya vermək fikrindəyik. Çünki hakim həmin vərəqələri yersiz yerə verirdi. Oyunçularımız həmin sarı vərəqələri haqq etmədiyi halda, biz də bu cəriməni ödəməyi haqq etməmişik.
- Sizcə, Salmanovun sizə qarşı belə ədalətsiz davranışına nə səbəb ola bilər? Hansısa şübhəniz, əsasınız varmı ki, onun bu hərəkətlərinin səbəbi nədir?
- Bizim əmin olduğumuz və olmadığımız bir çox faktlar var. Amma onları hələlik açıqlamaq istəmirəm. Bütün faktları AFFA və PFL-ə təqdim etmişik. Hakimin bu idarəçiliyinə görə cəzalanmasını tələb etmişik. Onun bizə niyə belə münasibət bəsləməsinin səbəbini ilk növbədə Salmanovun özündən soruşmaq lazımdır. Hər halda o, bunu hamımızdan yaxşı bilər. Ya da ona yuxarıdan belə tapşırıq veriblər ki, komandamıza qarşı haqsızlıq edir.
- Yuxarıdan deyərkən, siz konkret kimləri nəzərdə tutursuz?
- Hakimlər Komitəsini. Məncə, artıq Hakimlər Komitəsinin sədri Xaqani Məmmədov istefa verib, getməlidir. Qoy işini daha yaxşı bilən insanlar gəlib, çempionatımızda normal hakimlik yaratsın. Belə davam edə bilməz. Əgər 3-4 turdan bir belə qərəzli hakimliyin şahidi olacağıqsa, bəs Hakimlər Komitəsi hara baxır, nə işlə məşğuldur. Hakim səhvlərinin olması normal şeydir. Amma qərəzli idarəçilik tam fərqlidir. Bizim hakimlərin əksəri sırf qərəzli idarəçiliklə məşğuldur. O vaxt Əfqan Həmzəyevin komandamıza qarşı etdiyi hərəkətlərə görə, komitəyə şiddətli töhmət verilmişdi. İndi nə qərar çıxaracaqlarını bilmirəm. Amma istənilən halda, bizə dəyən ziyan artıq vurulub. Salmanovun cəzalanması bizim üçün sadəcə təsəlli ola bilər. Əsas istəyimiz belə özbaşnalıqların qarşısının alınması, birdəfəlik son qoyulması və normal hakimliyin bərpa olunmasıdır.
- Komandanız bu qalmaqallı oyunla həm də liderlik mübarizəsində iki xal geri düşdü…
- Bizim hesabı açmaq üçün çoxlu şansımız olmasa da, hər halda bəzi fürsətlərimiz oldu. Ancaq hakim ya təmiz penaltimizi vermədi, ya da rəqib qapıçıyla üz-üzə qalan oyunçumuzu səbəbsiz yerə dayandırıb, cərimə zərbəsi təyin etdi. Belə hakimliyi görən futbolçularda da istər-istəməz ruh düşkünlüyü yaranır və nəticə qazanmaq problemə çevrilir. Təsəvvür edin, vəziyyəti nə həddə çatdırmışdısa, hakimliklə bağlı indiyə qədər bir kəlmə də olsun danışmayan baş məşqçimiz Mirça Rednik də onun hərəkətlərinə reaksiya vermək məcburiyyətində qaldı.
- Sizi qarşıda “Neftçi” ilə çempionatın ən maraqlı oyunlarından biri gözləyir. Düşünmürsünüz ki, belə prinsipial qarşılaşma ərəfəsində baş verən olaylar komandanızın üzvlərinə mənfi təsir göstərə bilər?
- Təbii ki, bunlar komanda üzvlərinə pis təsir göstərir. Oyunçular da belə haqsızlıqlarla üzləşməklə ruhdan düşmüş olurlar. “Neftçi”ylə “Xəzər Lənkəran”ın görüşləri ölkədə ən böyük marağa səbəb olan bir qarşılaşmadır. Nəyə görə axı belə vacib oyun ərəfəsində futbolçularımızı ruhdan salmalıdırlar? Mən bu olaylarda qətiyyən “Neftçi”nin hansısa şəkildə əlinin olduğunu vurğulamaq istəmirəm. Yəni fikirlərim səhv başa düşülməsin. Sadəcə bu ərəfədə üzləşdiyimiz haqsızlıqlara etirazımızı bildirmək istəyirəm. Klublar, sponsorlar bu qədər pul xərcləyirlər, uğur qazanmaq istəyirlər. Niyə axı zəhmətimiz yerə vurulmalıdır?