Soyuqqanlı Qurban Qurbanov dəliqanlı Dieqo Simeoneyə qarşı

“Qarabağ” – “Atletiko”: bunları bilməlisiniz!

... Bu, hər iki komanda arasında ilk rəsmi oyundur. Amma 2013-cü ildə “Atletiko” Azərbaycanda “Bakı” komandası ilə yoldaşlıq görüşü keçirib və 3:0 hesabı ilə qalib gəlib.

...  Hər iki komanda qrupda buna qədər keçirdiyi iki oyunun heç birində qələbə qazana bilməyib.

... “Atletiko” ÇL-də keçirdiyi son 10 oyunun yalnız 3-də səfərdə qələbə qazanıb. Ötən mövsüm ÇL-in qrupunda Madrid klubu 3 səfər oyununun 2-də rəqibi məğlub edə bilmişdi.

... “Qarabağ”ın yarımmüdafiəçisi Miçel 2011-ci ilin noyabrın 6-da “Hetafe”nin heyətində “Atletiko”ya 3:2 hesabı ilə qalib gəldiklərinin oyunun iştirakçısı olub. O, “Hetafe”nin heyətində keçirdiyi 60 oyunda cəmi 1 qol vurub. Özü də “Atletiko” ilə həmin görüşdə. 2013-cü ilin noyabrında isə Miçelin də iştirak etdiyi matçda “Hetafe” “Atletiko”ya 0:7 hesabı ilə ağır məğlubiyyətə uğrayıb (mənbə: UEFA).

2009-cu ildə isə Miçel “Sportinq”in (Xixon) heyətində “Visente Kalderon”dakı matçda “Atletiko”ya qarşı oynayıb (1:3).

... Miçel və “Atletiko”nun qapıçısı Anxel Moya 2011-14-cü illərdə “Hetafe”də birgə çıxış ediblər.

... “Qarabağ”ın başqa bir futbolçusu Dani Kintana da doğma İspaniyada müxtəlif klublarda çıxış etsə də, “Atletiko”ya qarşı oynamayıb.

... “Qarabağ”ın baş məşqçisi Qurban Qurbanov soyuqanlı davranışları, “Atletiko”nun çalışdırıcısı Dieqo Simeone oyun zamanı çılğınlıqları ilə diqqət çəkir.

... “Atletiko” bu mövsüm La Liqada keçirdiyi 8 oyundan 16 xal toplayaraq turnir cədvəlində 4-cü yerdə qərarlaşıb.

... “Qarabağ” Topaz Premyer Liqada 7 oyundan 19 xalla 1-ci yerdədir.

... Hər iki komandanın əsas hücumçuları oyunu buraxa bilər. “Qarabağ”da Dino Ndlovu zədəli, “Atletiko”da Antuan Qrizmann xəstədir.

... Dünən axşama olan xəbərə görə, oyuna 40 min bilet satılıb. Matç başlanana qədər bu sayın 50 minə (bəlkə də daha çox) çatacağı gözlənilir.

... Maşını  olan azarkeşlər oyunun başlamasına 3 saat qalmışdan başlayaraq stadionun ərazisində avtomobilllərini saxlaya bilərlər.

Məşqçilər nə deyir?

Dieqo Simeone: “İlk 2 oyun yaxşı alınmadı. İnanıram ki, sabah istədiyimiz nəticəni əldə edəcəyik. Bizim üçün ən vacib olan 3 xaldır. Bunun üçün nə dəyişiklik lazımdısa, edəcəyik. Bilirik ki, elə-belə rəqiblə oynamırıq. “Qarabağ”ın ispan futboluna yaxın oynadığını bilirəm. Amma hər oyuna fərqli üslubla çıxırlar. Təhlükəli futbolçuları var. Ona görə də çox diqqətli olmalıyıq”.

Qurban Qurbanov: “Atletiko” müdafiədə çox güclüdür. Bu baxımdan bir nömrədirlər. Onların əsas üslubu rəqibə öz futbolunu oyamağa imkan verməməkdir. Biz çalışacağıq öz oyunumuzu oynayaq. Xal qazanmağa çalışacağıq. Əlbəttə rəqib bizdən üstündür. Lakin biz də hər matçda yaxşı nəticə əldə etmək inamı ilə çıxırıq. “Atletiko” kimi komandalarla oynamaqdan zövq alıram”.