Guy Luzon: “Simurq”un mərhələni keçmək şansı 80 faizdir” (Müsahibə)

Guy Luzon: “Simurq”un mərhələni keçmək şansı 80 faizdir” (Müsahibə)
MÜSAHİBƏ 25 İyun 2009 / 15:29 3927
-  A +

- Püşkün nəticəsinə əsasən komandanız Avroliqada Azərbaycan çempionatının bürünc mükafatçısı “Simurq”la qarşılaşacaq.
- Elədir, püşkə əsasən “Simurq”la qarşılaşmalı olduq. Bizi qarşıda çox ciddi sınaq gözləyir. Rəqibimiz də çox güclüdür.
- “Simurq” haqda hansı informasiyaya maliksiniz?
- Elə də geniş məlumatım yoxdur. Ümumiyyətlə, demək olar ki, heç nə bilmirəm. Nə futbolçular, nə də məşqçilər haqda. 
- Belə daşa düşdüm ki, “Simurq” haqda heç bir təsəvvürünüz yoxdur?
- Həqiqətən də sizin komandamız bizim üçün tamamilə sirlidir.
- Amma yəqin ki, məlumat əldə etməyə çalışacaqsınız?
- Təbii ki. Düzdür, bu bir qədər çətin olacaq. Amma əlaqələrimizi işə salmalıyıq.
- Bəs, Azərbaycan futbolu haqda nə bilirsiniz?
- “Simurq” haqda heç nə bildiyim kimi, fubtolunuz haqda da heç bir məlumatım yoxdur.
- Bu günə qədər Azərbaycan klubları İsrail təmsilçiləri ilə yalnız bir dəfə qarşılaşıb. Həmin vaxt İntertoto kubokuna təsadüf edən mübarizədən Azərbaycan klubu “Qarabağ” qalib ayrılıb.
- Doğurdan?
- Bəli. “Qarabağ” “Makkabi” Təl-Əvivi iki oyunun nəticəsinə görə üstələmişdi.
- Bu haqda da heç nə bilmirdim, maraqlıdır.
- Ümumiyyətlə, necə düşünürsünüz, “Simurq” - “Bney İequda” cütlüyündə favorit hansı komandadır?
- “Simurq” favoritdir. Şanslar 80-n 20-ə sizin komandanızın xeyrinədir.
- Niyə belə düşünürsünüz?
- Ona görə ki, bizim komandamız Avrokuboklarda elə də geniş təcrübəyə malik deyil.
- Sizdən fərqli olaraq, “Simurq” ümumiyyətlə, avrokuboklarda hələ debüt etməyib.
- Bu haqda heç nə bilmirəm. Amma hesab edirəm ki, favorit məhz “Simurq”dur.
- Təsadüfən rəqibinizi arxayınlaşdırmaq fikrində deyilsiniz?
- Yox. Mən öz subyektiv fikrimi deyirəm ki, favorit məhz “Simurq”dur.
- İlk oyunu komandanız səfərdə keçirəcək. Necə düşünürsünüz, bu sizin üçün yaxşı haldır yoxsa əksinə?
- Bunu indi dəqiq demək olmaz. İlk oyundan sonra bu suala dəqiq cavab verə bilərəm.
- Adətən kubok oyunlarında komandalar cavab qarşılaşmasını öz meydanlarında keçirmək istəyirlər. Bu zaman nəticə qazanmaq bir qədər asan olur.
- Orası düzdür. Amma təsəvvür edin ki, biz səfərdə keçirilən ilk oyunda böyükhesabla uduzduq. O zaman  artıq cavab qarşılaşması formallığa çevriləcək.
- Çox bədbin danışırsınız. Bu nədən irəli gəlir? Sizin fikrinizcə, “Simurq” həqiqətən də belə güclüdür, yoxsa komandanızda nəsə ciddi problem var?
- Mən olanı deyirəm. Komandamızda problemlər də var. Amma bunları açıqlamaq istəməzdim.
- Ümumiyyətlə, qarşıdakı matçın hazırlığına nə vaxtdan başlamısınız?
- Artıq bir neçə gündür ki, məşq edirik. Yalnız bir yoxlama oyunu keçirəcəyik.
- Bakıya nə vaxt gələcəksiniz?
- İyunun 30-u. Axşam saatlarında.
- Rəqibinizin qarşıdakı matça hazırlığı barədə məlumatınız var?
- Yox. Siz bu haqda mənə məlumat verə bilərsiniz?
- Əlbəttə ki, yox.
- Mən elə belə də bilirdim.   

İbrahim CƏFƏROV

Daha çox


Son xəbərlər
28.03.24  10:55

Qrizmann qayıtdı