“Rəvan”dan peşəkarlığa sığmayan addım

Rəvan” klubu “Qarabağ”a qarşı keçirilən Topaz Premyer Liqanın 21-ci turunun oyunundan sonra növbəti mövsümdən Azərbaycan çempionatında çıxışını dayandıracağını elan edib. Səbəb kimi isə cari çempionatda hakimlər tərəfindən tez-tez təzyiqlərə məruz qalmasını göstərib.

Əslində bir klubun özünə qarşı təzyiq hesab etdiyi qərara istənilən bir formada etiraz etmək hüququ var. Sirr deyil ki, bu mövsümdə paytaxt klubu dəfələrlə hakim idarəçiliyindən narazılığını ifadə edib və bütün bunlar sonda klubu daha sərt addım atmağa məcbur edib. Amma gəlin görək, “Rəvan”ın son qərarı peşəkarlıqla nə dərəcədə bir araya sığır, ümumiyyətlə, futbola və öz işinə belə münasibət nə dərəcədə normal bir haldır?

İlk növbədə onu qeyd etmək lazımdır ki, “Rəvan” klubunun bu qərarı prinsipcə məhəllələrarası yarışda uduzduğunu görüb meydanı tərk edən komandalarının hərəkətindən qətiyyyən fərqlənmir. Uduzmaqla barışmır və müxtəlif bəhanəylə meydanı tərk edir. Amma unutmayaq ki, “Rəvan” həvəskar yox, peşəkar komandaların mübarizə apardığı bir yarışda çıxış edir. Deməli, özü də peşəkar bir komanda kimi addım atmalıdır. Çünki “Rəvan” Azərbaycanda (və dünyada) hakim səhvləri ilə üzləşən yeganə komanda deyil. Amma indiyə qədər hələ heç kim soyuq başla sırf hakim səhvinə görə çempionatdan çıxmaq qərarı verməyib.

“Rəvan” isə belə qərar vermək istədiyini deyir. Hansı məntiqlə?

İradı, etirazı, narazılığı varsa, AFFA-ya, PFL-ə müraciət edə bilər. Hər halda, hakimin səhvi varsa – o da Hakimlər Komitəsinin sədri Xaqani Məmmədovun etiraf etdiyi kimi var – mütləq cəzasını alacaq. Hər halda, indi 90-cı illərin əvvəlləri deyil ki, futbolda və futboldan kənarda hamının başına istədiyin oyunu açasan.  Amma açığı, “Rəvan” bu gün elə addım atır ki, sanki o zamanlarda olduğu kimi ölkədə və futbolda heç nə qaydasında deyil.

Bir səhvə görə çempionatdan və bütünlükdə futboldan imtina eləmirlər. Bu mənada, “Rəvan”ın son addımı sırf hakim səhvinə görə atdığı nədənsə səmimi görünmür. Bəlkə, klub rəhbərliyi, konkret, sponsor “Nurgun Motors” şirkəti “Rəvan” ilk altılığa düşməyib deyə belə addım atır?  Bu versiya daha ağlabatan görsənir. Çünki son illər “Nurgun Motors”un maliyyələşdirdiyi “Muğan”, sonra isə “Rəvan” altılığa düşə bilməyib. Bunda isə günah dərinə gedəndə ən çox futbolçu və məşqçi heyətində yox, elə klub rəhbərliyinin özündədir. Əgər bir mövsümdə düz iki-üç dəfə baş məşqçi dəyişəcəksənsə, əlbəttə ki, komandan nəinki birinci altılıqdan, zamanı gələndə ikinci altılıqdan da kənarda qalacaq.

Digər tərəfdən, “Rəvan” bu qərarı “Azərbaycan futbolunun inkişafı - 2005-2015-ci illərdə futbolun inkişafına dair Dövlət Proqramı" çərçivəsində görülən işlər hələ yekunlaşmamış verir. Bu isə əlbəttə, Azərbaycan dövlətin yürütdüyü futbol siyasəti ilə nəinki qətiyyən uyğun gəlmir, əksinə bu siyasətə qarşı getmək görüntüsü yaradır.

Hər halda, “Rəvan” klubu rəhbərliyinin son bəyanatı əsəblərin tarıma çəkildiyi bir vaxtda verdiyi şübhə doğurmur. Yoxsa, niyə birdən-birə belə radikal fikrə düşəsən? 2003-cü ildən üzü bu yana, Fuad Musayevin AFFA prezidenti vəzifəsindən getməsindən sonra hələ heç kim Azərbaycan çempionatından çıxmaq haqda qərar verməyib.
 
Ümid edək ki, “Rəvan” rəhbərliyinin bu bəyanatı rəsmi bir qərara çevrilməyəcək və tarixə yalnız quru söz olaraq keçəcək.


GÜNDÜZ