Elxan Məmmədov: “Məqsədimiz qrupdan çıxmaqdır”

AFFA-nın baş katibi Elxan Məmmədov Azərbaycanda keçiriləcək FİFA U-17 qızlar arasında dünya çempionatına hazırlığın son mərhələsi və kişilərdən ibarət milli komandamızın DÇ-2014-ün seçmə mərhələsində keçirdiyi son iki oyunla bağlı Qol.Az saytının suallarını cavablandırıb

- Dünya çempionatı başlamaq ərəfəsindədir. Təşkilatçılıqla bağlı vəziyyət nə yerdədir?

- Artıq həyəcan keçiririk. Çünki dünya çempionatının startına cəmi üç gün qalıb. Xeyli vaxtdır ki, hazırlıq işləri görülür və hər kəs səbirsizliklə bu çempionatın açılış mərasimini gözləyir. Bildiyimiz kimi, açılış oyununda Azərbaycan yığması Kolumbiya millisiylə qarşılaşacaq. Eyni zamanda möhtəşəm bir açılış olacaq, dünya futbolunun nüfüzlu simaları, eləcə də məşhur estrada ulduzları bu mərasimdə iştirak edəcəklər. Dünya çempionatı təkcə bir oyundan ibarət deyil. Ümumiyyətlə, Azərbaycanda gözəl ab-hava olacaq. Demək olar ki, bütün komandalar artıq ölkəmizə təşrif buyurub. Artıq iki komanda – ABŞ və Fransa milliləri Lənkəranda məskunlaşıb. Komandalar ciddi hazırlıqlara başlayıblar.

- Azərbaycan yarışa tam hazırdırmı?

- Bəli. Artıq FİFA-nın nümayəndələri də Bakıya gəliblər. Bu qurumun 200-ə yaxın təmsilçisi ölkəmizdədir. Onlar da bizə öz dəstəyini göstərirlər. Bundan sonra əsas məsələ azarkeşlərin stadionlara axışmasıdır. Stadiona nə qədər çox azarkeş gəlsə, bir o qədər möhtəşəm olacaq.

- Bəs, 17 yaşlı qızlarımızın qarşısına bu  çempionatda hansı məqsədlər qoyulub?

- Əsas məsələ odur ki, millimiz ev sahibi olaraq dünya çempionatının final mərhələsinə vəsiqə qazanıb. Oyunlara gəlincə, çox çətin keçəcək.  Təbii ki, hər bir komanda və idmançının qarşısına məqsəd qoyulub. Məqsədimiz qrupdan növbəti mərhələyə vəsiqə qazanmaqdır.

- Qızlar arasında dünya çempionatına hazırlığın getdiyi bir vaxtda Azərbaycan milli komandası DÇ-2014-də iki seçmə oyunu keçirdi. Əvvəlcə İsraillə 1:1 hesabı ilə barəbərə qaldığımız oyun haqda fikirlərinizi bilmək istərdik.

- Birinci görüşdə yığmamız ilk xalını qazanaraq bizləri sevindirdi. İsrail yığmasını biz yaxşı tanıyırıq. Həm milli, həm də klub səviyyəsində indiyədək çox turnirdə qarşılaşmışdıq. Sirr deyil ki, FİFA-nın reytinqində İsrail seçməsi millimizdən çox irəlidədir. Lakin buna baxmayaraq, komandamız çox gözəl futbol nümayiş etdirdi. Xüsusilə ikinci hissədə. Hətta qələbə də qazana bilərdik. Lakin təəssüf ki, biz iki xal itirdik. Buna baxmayaraq, ilk xalı qazanmaq bizim üçün çox vacib idi.

- Amma ikinci oyunda komandamız Portuqaliyaya böyükhesabla uduzdu. Halbuki futbolçular İsraillə oyundan sonra bu görüşə yaxşı əhval-ruhiyyədə getmişdilər.

- Biz onsuz da lap əvvəldən millimizi Portuqaliyada çətin oyun gözlədiyini bilirdik. Rəqibin həddindən artıq güclü olması hesabda da sözünü dedi. Bundan başqa bizim qarşıda Rusiya və Şimali İrlandiya seçmələriylə daha iki səfər oyunumuz olacaq. Ancaq gələn il demək olar ki, bütün qarşılaşmalarımız Bakıda baş tutacaq. Bu isə yaxşı nəticə qazanmağımız üçün əlverişli olacaq.

- Bu seçmə mərhələdə millimizin yeddidən daha artıq xal toplayacağını gözləmək olar?

- Bizim məqsədimiz hər zaman daha yaxşı nəticələr qazanmaqdır. Bunun üçün əlimizdən gələni edəcəyik.

Əli HƏYATİ