“Rəşad Sadiqov və Cavid İmamverdiyev milliyə çox fayda verə bilərdi”

AZAL klubunun baş məşqçisi Vaqif Sadıqov Qol.Az saytına müsahibəsi komandasındakı son durum, “Neftçi”nin Avroliqadakı çıxışı və millimizin İsraillə keçirəcəyi dünya çempionatının seçmə oyunu ilə bağlı Qol.Az-ın suallarını cavablandırıb

- İlk əvvəl “Neftçi”nin son uğurlu çıxışları barədə fikirlərinizi bilmək istərdik.

- Biz bu anı uzun illərdi ki, gözləyirdik. Nəhayət, klublarımızdan biri bu misiyanın öhdəsindən gəlməyi bacardı. “Neftçi” 1995-ci ildəki olaya görə Kipr klubu və azarkeşlərinə Avroliqanın qrup mərhələsinə vəsiqə qazanmaqla tutarlı cavab verdi. Bunu yalnız alqışlamaq lazımdır. Onları bu uğur münasibətlə təbrik edirəm.

- Bəs, rəqibləri barəsində nə deyə bilərsiniz? Sizcə, “Neftçi”nin qrup mərhələsindən çıxmaq şansı varmı?

- Əgər qrup mərhələsinə düşməyi bacarıblarsa, deməli, komandada özünəinam var. Fikrimcə, “Partizan” klubunu məğlub etməklə yanaşı, “İnter” və “Rubin”ə qarşı da sonadək mübarizə aparacaqlar. Məncə, “Neftçi”rəqiblərinin güclü olmasına baxmayaraq, onlardan xal almağı bacaracaq.

- Komandanızın “Neftçi”ylə oyunu təxirə salındı. Hazırda isə millinin təlim-məşq toplanışı səbəbindən çempionatda uzun fasilə yaranıb. Bu, AZAL-ın çıxışına mənfi təsir etməyəcək ki?

- “Neftçi”ylə matçın təxirə düşməsi onların xeyrinə oldu. Təmsilçimiz Avropa yarışlarında gözəl bir nəticə əldə etdi. Fikrimcə, tamamilə düzgün qərar qəbul olunmuşdu. Həmçinin millinin oyunları olduğu üçün çempionatın təxirə salınması qərara alınıb. Lakin biz və bütün komanda işinə çox ciddi yanaşır. Hər kəs yaxşı bilir ki, bizi irəlidə hələ ağır çempionat oyunları gözləyir. Sentyabrın 16-dan AZAL-ı “Qarabağ”, “Xəzər Lənkəran” və “Bakı”  kimi güclü komandalarla ardı-arda çətin oyunlar gözləyir. Bütün bunlara əsasən heyətdəki futbolçularla  məşqlərimizi və yoldaşlıq görüşlərimizi davam etdiririk. Qarşıda bizim “Sumqayıt” komandasıyla yoldaşlıq oyunumuz baş tutacaq.

- Qarşıdakı Azərbaycan- İsrail görüşündən nə gözləyirsiniz?

- Bir şeyi unutmamalıyıq ki, “Neftçi”nin qələbəsi ruh yüksəkliyi baxımından millinin də çıxışına müsbət təsir göstərəcək. Yığmamızda çıxış edən futbolçular yaxşı dərk edirlər ki, bu gün Avropada hər bir komandayla başabaş mübarizə aparmaq olar. Bu gün hər bir yığmayla oyunda nəticə əldə etmək mümkündür. Azərbaycan millisi İsrail yığmasına qarşı oyunda çox gözəl təsir bağışlayacaq. İnanıram ki, komandamız bu qarşılaşmada müsbət nəticə əldə edəcək.

- Heyətinin yarısı Avropa klublarında çıxış edən İsrail yığmasını məğlub edə bilərikmi?

- Niyə də olmasın ki? Əgər biz İsrail yığmasından güclü rəqiblərlə oyunda nəticə götürməyə bacarmışıqsa, onlardan da xal ala bilərik. AFFA Berti Foqtsun qarşısında 2016-cı il Avropa çempionatının final mərhələsinə vəsiqə qazanmaq vəzifəsi qoyub. Artıq bu işləri həyata keçirməyin vaxt çatıb.

- “Neftçi”nin futbolçularından Rəşad Sadiqov və Cavid İmamverdiyevin millidən kənarda qalması narazılığa səbəb olub. Sizin Berti Foqtsun bu addımına münasibətiniz necədir?

- Bu qərarın nə dərəcədə düzgün olub-olmadığını Berti Foqts daha yaxşı bilər. Ancaq mənim fikrimcə, Rəşad Sadiqov və Cavid İmamverdiyev öz oyunu və Avropadakı təcrübəsiylə milliyə çox fayda verə bilərdi. Bu gün mötəbər bir yarışmanın qrup mərhələsinə vəsiqə qazanmaqla bunu bir daha sübut ediblər. Mən onların milliyə çağrılmasının tərəfdarıyam.

Əli HƏYATİ