Ağasəlim Mircavadovun təxmini

Azərbaycanın əməkdar məşqçisi Ağasəlim Mircavadov bu həftənin cümə və şənbə günü keçiriləcək Unibank Premyer Liqasının oyunları ilə əlaqədar təxminlərini Qol.Az saytına bölüşüb.

 “Kəpəz” - “Turan”

Gəncəlilərin axrıncı turda məğlubiyyət acısı yaşaması onların “altılq”a düşmək şanslarını azaldıb. Ancaq komandanın baş məşqçi vəzifəsinə Mirbağır İsayev gətirilib. Adətən, yeni baş məşqçi dəyişikliyi uğurlu olur. Belə baxanda “Kəpəz”in potensialı, oyunçuların səviyyəsi qələbə qazana biləcəklərindən xəbər verir. “Turan”ın son vaxtlar maliyyə problemləriylə üzləşməsi, futbolçuların klubun oyunlarında iştirak etməkdən imtina etməsi onların çıxışına mənfi təsir göstərir. “Bakı”yla oyunda da bunun şahidi olduq. Təəssüf ki, Azərbaycanın köklü klublardan biri olan “Turan” ağır günlərini yaşayır. Oyunun Gəncədə baş tutacağı da meydan sahiblərinin qələbə şansını artırır.

“Sumqayıt Şəhər” - “Rəvan”

“Rəvan” məşqçi dəyişikliyi etdikdən sonra uğurlu nəticələrə imza atır. Vladislav Qədirovun düzgün taktika seçməsini xüsusi olaraq vurğulamaq istərdim. Axırıncı oyunlarında səfərdə “Xəzər Lənkəran”la görüşdə məğlub duruma düşməklərinə baxmayaraq, son dəqiqədə bərabərlik topunu vurmağı bacardılar. Belə davam etsə, çox güman ki, “altılığ”a da düşə bilərlər. “Sumqayıt Şəhər”lə oyun onlar üçün mühüm olmalıdır. Debütant komandaya gəlincə isə, cavan oyunçularla təcrübəli futbolçular vəhtəd yaratsa da, qalib gələcəklərini düşünmürəm.

“Simurq” - “Xəzər Lənkəran”

Çempionatın ən gərgin qarşılaşmalarından olacaq. Bu oyunda “Xəzər Lənkəran” öz oyununu ortaya qoymasa, ağır nəticəylə üzləşə bilər. Çoxları deyir ki, cənubluların problemləri olduğu üçün qalib gələ bilməyəcək. Ancaq “Xəzər Lənkəran”da əvvəllər çalışmış məşqçi kimi deyə bilərəm ki, klubun rəhbərliyi komandada hansısa problemin yaranmasına imkan verməz. “Simurq” klubuyla qarşılaşmada cənublular qalib gələcəyi təqdirdə, özünəinamı qaytaracaqlar. Digər tərəfdən, liderliyi əldən vermək istəməyəcəklərini düşünürəm. Amma bir amil də var ki, “Simurq” öz yerində daha yaxşı çıxış edərək qələbə qazanmağı bacarırlar. Ümumi nəticəyə gələndə isə, “Xəzər Lənkəran” əvvəlki oyununu göstərə bilsə, qalib gələ bilər.

“Bakı” - “Qəbələ”

“Bakı”nın “Turan” üzərində böyük hesablı qələbəsi onların ruh yüksəkliyini bir qədər də artırıb. “Qəbələ”də məşqçi dəyişikliyinin isə onlar üçün uğurlu oldu. Bilirsiniz ki, “Neftçi”kimi güclü komandanı məğlub etdilər.

“Qarabağ” - “Neftçi”

Gərgin və maraqlı bir matç olacağını düşünürəm. Onlar 20 ildi ki, bir-birlərinə qarşı hər zaman prinsipial mübarizə aparıllar. “Neftçi” ağdamlılarla qarşılaşmada qalib gəlməyə çalışacaq ki, Qəbələdəki məğlubiyyətin təsadüfü olduğunu isbatlasın. “Qarabağ”a gəlincə, son oyunlarında çoxlu təhlükəli vəziyyət yaratsalar da, onlardan yetərincə istifadə edə bilmirlər.
Qarşılaşmanın çox gərgin olacağını indidən söyləmək olar. Havaların sabit keçməməsi də Quzanlıda stadionun durumuna öz təsirini göstərəcək. Komandaların qələbəsində futbolçuların fiziki durumu böyük rol oynayacaq.

“İnter” - AZAL

AZAL-ın son iki görüşlərdə inamlı çıxış etməsi komandanın özünə gəlməsinə işarədir. Komanda Avroliqaya vəsiqə uğrunda mübarizə apardığından qələbə qazanmağa çalışacaq. Məğlub olduqları halda işləri çətinə düşəcək. «İnter»i isə turnir cədvəlindən liderdən cəmi iki xal ayırır. Onsuz da “İnter” öz meydanında “Qarabağ”la oyunda iki xal itirdi. Bir sözlə, bu qarşılaşma “İnter” üçün çox vacib matç olacaq.

Əli HƏYATİ