Mehman Allahverdiyev: “Neftçi”yə xal verməkdən söhbət gedə bilməz”

“Kəpəz”in baş məşqçisi Mehman Allahverdiyevin Qol.Az saytına müsahibsi

- Sabah doğma meydanda “Neftçi” ilə çətin oyuna çıxacaqsınız. Prinsipial qarşılaşma barədə nə deyə bilərsiniz?

- “Kəpəz” – “Neftçi” oyunu hər zaman gərgin və maraqlı idman mübarizəsində keçib. Bilirsiniz ki, “Neftçi” son çempiondur. Çempionatda çıxış edən 2-3 güclü komandadanan biridir. Hər sahədə - istər maliyyə, istərsə də heyət baxımından bizdən öndədilər. Buna baxmayaraq, “Kəpəz” sabah ancaq qələbə üçün meydana çıxacaq. İnanırıq ki, qalib gələcəyik.

- Vacib oyunöncəsi heyətlə bağlı nə kimi problemləriniz var?

- Heyətdə elə də ciddi itkimiz yoxdur. Sadəcə Şahin Kərimov aktivində 4 sarı vərəqə olduğu üçün oynaya bilməyəcək. Bir də Elşən Poladovun zədəsi var. Yerdə qalan futbolçuların hamısı normal vəziyyətdədir.

- Azərbaycan futbolunda “Kəpəz” – “Neftçi” oyunu hər zaman diqqət mərkəzində olub və derbi matçı hesab olunub. Amma son vaxtlar “Kəpəz”in əvvəlki əzəmətini itirməsi bu görüşün prinsipiallığını bir qədər azaldıb. Hazırda isə “Xəzər Lənkəran” və “Neftçi” arasında “Böyük oyun” daha çox ön plana çıxır. Sizcə, hansı oyun daha çox derbi xarakteri daşıyır?

- Əlbəttə ki, “Neftçi” – “Kəpəz” derbisi daha əzəmətli səslənir. Ona görə ki, bu, müstəqillik vaxtı Azərbaycan futbolunun ilk derbisi olub. Bu iki komandanın görüşü hər zaman maraqlı və gərgin olub. Ancaq bu gün Azərbaycanda “Neftçi” və “Xəzər Lənkəran” lider olduğu üçün bu iki komandanın qarşılaşmasına derbi adı veriblər. Əgər bizim də bu klublar kimi maliyyə dəstəyimiz olsaydı, sabah daha gözəl prinsipial oyunun şahidi olardıq. Görüş daha əzəmətli olardı. Bu komandalar ürəkləri istəyən futbolçunu alırlar. Sağ olsun, Xanlar müəllim də imkanları daxilində əlindən gələni edir ki, bizim heç bir çətinliyimiz olmasın və Gəncədə futbol inkişaf eləsin.

- Yəni siz deyirsiniz ki, hansı klubların pulu varsa, onların oyunu derbi sayılır.

- Derbi həmişə “Neftçi” – “Kəpəz” oyunu olub. Ancaq bugün vəziyyət bir qədər fərqlidir. Məsələn, Abramoviç gələnə qədər “Çelsi”nin elə də ciddi uğuru yox idi. Amma indi İngiltərədə “Mançester Yunayted” – “Çelsi” görüşü derbi adlanır. Azərbaycanda da belədir. “Neftçi” və “Xəzər Lənkəran” klubları lider olduqları üçün onların duelinə maraq daha böyükdür. Ona görə də bu gün bu oyunu derbi kimi qiymətləndirirlər.

- Özünüz də dediniz ki, sabah son çempiona qarşı oynayacaqsınız. Futbolçuları qarşıdakı matça nə dərəcədə kökləyə bilmisiniz?

- Bacardığım qədər futbolçularımızı sabahkı görüşə kökləməyə çalışıram. Əlimdən gələni edirəm ki, sabah qələbə qazanaq. Həm rəhbərlik, həm də futbolçular bilirlər ki, bu oyunda qalib gəlmək nə deməkdir.

- “Neftçi” – “Kəpəz” oyunu hər zaman prinsipiallığı ilə yanaşı, müxtəlif söz-söhbətləri ilə də fərqlənib. İndi də belə bir xəbər dolaşır ki, “Kəpəz” “Neftçi”yə xal verəcək. Sizin bu cür söz-söhbətlərə münasibətiniz necədir?

- Bu sözü bu gün mənə bir nəfər də deyib. Bunlar boş söhbətlərdir. Nəyə görə “Kəpəz” “Neftçi”yə xal verməlidi. Mehman Allahverdiyev olan yerdə belə söhbət gedə bilməz.