"Böyük oyun" "Xəzər Lənkəran"ın qələbəsi ilə başa çatdı

Bu gün Premyer Liqanın 5-ci turuna start verilib. Qol.Az-ın məlumatına görə, ilk oyun günündə 3 qarşılaşma baş tutub.

Günün ilk qarşılaşmasında isə “Bakı” öz meydanında “Rəvan”ı qəbul edib. Ötən turda gözlənilmədən “Kəpəz”ə 0:3 hesabı ilə məğlub olan “Bakı” klubu “Rəvan”la görüşdə ilk rəsmi qələbəsini qazanaraq bu uğursuzluğu unutdurmaq niyyətində idi. Lakin bu heç də asan görünmürdü.

Son turda “Xəzər Lənkəran”la 1:1-lik heç-heçə oynayan “Rəvan” bunun təsadüfi olmadığını sübut etməyə çalışacaqdı. Bunun üçün Bəhmən Həsənovun komandası “Bakı” ilə oyunda ən azı 1 xal qazanmağı hədəfləsə də, buna nail olmayıb.

Hərçənd ikinci hissədə "Rəvan" buna çox yaxın olub. İlk hissədə qapısında 3 top görən "Rəvan" fasilədən sonra bu qollardan ikisinin əvəzini çıxa bilib. Lakin Premyer Liqanın debütantının bundan artığına gücü çatmayıb - 3:2. 

Günün digər qarşılaşmasında isə “İnter” öz meydanında Zaqatalanın “Simurq” klubu ilə qarşılaşıb. Qalmaqallı oyundan sonra və Premyer Liqada yaranmış fasilədən istifadə edən Kaxaber Sxadadzenin komandası “Simurq”la görüşdə 3 xalı hədəfləmişdi. Son hadisələrdən sonra “İnter”in “Simurq”a qarşı necə çıxış edəcəyi böyük maraq doğururdu. 

Doğma meydan amilindən maksimum yararlanan "İnter" bu görüşdə qələbə qazanmağı bacarıb. İkinci hissədə Valeri Abramidzenin vurduğu qol oyunda yeganə olub və "bankirlər" 1:0 hesabı ilə qələbə qazanıblar. Bununla da, "İnter" 4 oyundan sonra xalını 6-ya yüksəldib. 

Turun mərkəzi oyunu isə Lənkəranda baş tutub. Burada əzəli rəqiblər “Xəzər Lənkəran” və “Neftçi” klubları üz-üzə gəlib. Hazırda 10 xalla turnir cədvəlinə başçılıq edən Lənkəran təmsilçisinin doğma azarkeşlər qarşısında yalnız qələbəyə oynayacağı şübhə doğurmurdu. 

Ötən turda AZAL-a 1:3 hesabı ilə məğlub olan “Neftçi” bu uğursuzluğu “Xəzər Lənkəran”la oyunda unutdurmaq niyyətində idi. Lakin "Neftçi" növbəti görüşdə də meydanı xalsız tərk edib. Matçın 43-cü dəqiqəsində Ruslan Abışovun avtoqolu "Xəzər Lənkəran"a 3 xal qazandırıb.
 

10 sentyabr

Premyer Liqada V turun oyunları

 
20:00. “Xəzər Lənkəran” – “Neftçi” - 1:0
Qol: Ruslan Abışov, 43-avtoqol (1:0)
Hakimlər: Ramil Diniyev, Azər Əsgərov, İlham Əliyev, Orxan Məmmədov.
AFFA nümayəndəsi: Vaqif Məmmədov.
Hakim-inspektor: Əhmədağa Cabbarov.
Lənkəran. Şəhər mərkəzi stadionu. 


17:30. “Bakı” – “Rəvan” - 3:2
Qollar: Şoliç, 7 (1:0), 29 (3:0), İvanovs, 20 (2:0), Torres, 69 (3:1), Sergey Çernişev, 78 (3:2)
Hakimlər: Anar Salmanov, Mübariz Haşımov, Knyaz Əmiraslanov, Rauf Cabbarov.
AFFA nümayəndəsi: Rauf Hüseynli.
Hakim-inspektor: Murad Məmmədov.
Bakı. Tofiq Bəhramov adına Respublika stadionu. 


19:00. “İnter” – “Simurq” - 1:0
Qol: Valeri Abramidze, 53 (1:0)
Hakimlər: Rəhim Həsənov, Elman Musayev, Habil Əliyev, Fariz Yusifov.
AFFA nümayəndəsi: Əsgər Əmirəliyev.
Hakim-inspektor: Asif Namazov.
Bakı. "Şəfa" stadionu.


11 sentyabr (bazar)
 
17:00. “Qəbələ” - “Turan”
Hakimlər: Elçin Məmmədov, Namiq Hüseynov, Zeynal Zeynalov, İnqilab Məmmədov.
AFFA nümayəndəsi: Məmmədəli Məmmədov.
Hakim-inspektor: Əli Hüseynov.
Qəbələ. Şəhər stadionu.
 
17:00. “Sumqayıt Şəhər” – “Qarabağ”
Hakimlər: Ceyhun Haşımov, Vaqif Musayev, Aleksandr Musatkin, Ramil Əhmədov.
AFFA nümayəndəsi: Rauf Əmirov.
Hakim-inspektor: Əmir Zamanov.
Sumqayıt. Mehdi Hüseynzadə adına şəhər stadionu.
 
17:00. “Kəpəz” - AZAL
Hakimlər: Əliyar Ağayev, Mehman Mahmudov, Munis Abdullayev, Hacıəli Ağayev.
AFFA nümayəndəsi: Qürbət Həsənov.
Hakim-inspektor: Şahin Cəfərov.
Gəncə. Şəhər stadionu.


Turnir cədvəli