Mareska niyə 14 milyon funtluq kompensasiyadan imtina edib?

Mareska niyə 14 milyon funtluq kompensasiyadan imtina edib?
DÜNYA FUTBOLU 4 Yanvar 2026 / 13:22 1999
-  A +

“Çelsi”nin sabiq baş məşqçisi Enzo Mareskanın klubdan ayrıldıqdan sonra ona məxsus olan 14 milyon funt sterlinq (təxminən 16,1 milyon avro) məbləğində kompensasiyadan imtina etməsinin səbəbi bəlli olub.

QOL.az The Sun nəşrinə istinadən xəbər verir ki, italiyalı mütəxəssis klub rəhbərliyinin onun nüfuzunu sarsıtmasından ciddi şəkildə narazı qalıb. Məhz bu səbəbdən Mareska müqavilənin vaxtından əvvəl ləğvi ilə bağlı kompensasiya şərtlərini müzakirə etmək istəməyib.

Mənbə bildirir ki, baş məşqçi həmçinin futbolçuların sağlamlığı ilə bağlı irəli sürülən ittihamlardan qəzəblənib. Belə ki, Mareskanın həkimlərin qadağasına baxmayaraq oyunçuları meydana buraxmağa hazır olduğu barədə yayılan iddialar onu ciddi narahat edib. Bundan əlavə, 45 yaşlı mütəxəssislə klub rəhbərliyi arasında əsas heyətin seçimi və oyun ərzində edilən əvəzləmələrlə bağlı da fikir ayrılıqları olub.

Qeyd edək ki, Enzo Mareska 2024-cü ilin yayından etibarən “Çelsi”nin baş məşqçisi vəzifəsində çalışırdı. Onun müqaviləsi 2029-cu ilə qədər nəzərdə tutulmuşdu və daha bir mövsüm uzadılma maddəsi də mövcud idi. London klubu yanvarın 1-də Mareskanın vəzifəsindən azad edildiyini rəsmən açıqlayıb.


Son xəbərlər