"Dinamo"nun futbolçuları "Qarabağ"la oyundan əvvəl kokos suyu içiblərmi?

Avqustun 28-də "Qarabağ" Çempionlar Liqasının pley-off mərhələsinin cavab matçında Bakıda "Dinamo" (Xorvatiya) ilə qarşılaşacaq. Bu komandaların ilk görüşündə xorvatlar 3:0 hesabı ilə qələbə qazanıblar. Buna baxmayaraq, rəqib Azərbayandakı görüşə ehtiyatla yanaşır.

QOL.az xəbər verir ki, dünən Bakıya yola düşməzdən  əvvəl Zaqreb klubunun baş məşqçisi Sergey Yakiroviç hava limanında yerli jurnalistlərin suallarını cavablandırarkən bu məqamlara toxunub. 47 yaşlı mütəxəssis Bakıdakı görüşün çətin keçəcəyini vurğulayıb:

- Çempionlar Liqasının qrup mərhələsinə adlamaq üçün sözün əsl mənasında var gücümüzü ortaya qoymalıyıq. Amma bu, heç də asan olmayacaq. Çünki “Qarabağ” ciddi komanda olduğunu sübut etdi. Kiminsə buna şübhəsi var idisə, düşünürəm ki, ilk oyundan sonra aradan qalxıb. Ehtiyatlı olmaq lazımdır, Zaqrebdə bəzi məqamlarda bəxtimiz gətirdi. Müdafiədə daha stabil olmalıyıq. Çünki ilk dəqiqədən onların təzyiqini gözləyirəm. Qələbə üçün gəldiyimizi göstərməliyik.

- Polşanın "Rakov" klubunda çıxış edən Fran Tüdor demişdi ki, ötən il onlar "Qarabağ"la oyundan əvvəl kokos suyu içiblər. Çünki bu su qana yaxşı təsir edir və nəfəs almağı asanlaşdırır. Siz bənzər üsuldan istifadə etmisinizmi?

- Biz kokos suyu içməmişik. Bu haqda tibbi xidmətimizlə söhbətim oldu. Onlar dedilər ki, bunun effektli olması üçün həmin suyu daha əvvəldən içmək lazımdır. O vaxta qədər isə bununla bağlı qərar verməmişdik. 

- Azərbaycandakı oyuna xüsusi nəsə hazırlamısınız?

- Hər bir matçda olduğu kimi, qarşıdakı görüşə də normal hazırlaşmışıq. İlk oyunumuz bugünlərdə olduğundan onları daha yaxşı analiz etmişik. Çox vacibdir ki, bunun nəticəsini komanda meydanda hiss edə bilsin. Oyuna nə qədər hazırlaşsaq da, rəqibin müəyyən keyfiyyətli tərəfləri barədə xəbərdarlıq etsək də, oyunçu meydanda rəqibini mütləq hiss etməlidir. Başa düşürük ki, biz kiminlə qarşılaşacağıq. Xüsusən rəqibin hücum xətti onun müdafiə xəttindən daha yaxşıdır. Düşünürəm ki, bu baxımdan bizim şansımız var. Əsasən də onlar çox güclü risk etsələr... Biz göstərdik ki, belə məqamlarda rəqibə təhlükə yarada bilirik.

"Dinamo"nun futbolçuları bu gün Bakıda səhər gəzintisində

- "Dinamo" azarkeşləri üçün avrokuboklarda səfər qadağası ləğv olunub. Bunun sizin üçün nə qədər əhəmiyyəti var?

- Çox əhəmiyyəti var. Ötən mövsüm mən "Dinamo"ya gələndən komandamızın səfər matçlarında azarkeşlər olmurdu. Bu da oyunumuzda hiss edilirdi. Ona görə də biz ev matçlarımızda səfərdəkindən daha fərqli oyun göstərirdik. Mən bunu dəyişmək istəyirəm. Fərqi yoxdur, biz harada oynayacağıq. Bizim öz oyun tərzimiz olmalı və cəsarətli olmalıyıq. Oyunun müəyyən hissələrində müdriklik və cəsarət göstərməlisən. Ümid edirəm ki, belə də olacaq.

- Bazar günü futbolçularınız "Maksimir" stadionunun kilsəsində keçirilən dini mərasimdə iştirak ediblər. Bu haqda nə deyə bilərsiniz?

- Düşünürəm ki, bu hadisəni mediada geniş işıqlandırmağa dəyməz. Bunun mediaya necə sızdığını bilmirəm. Mən “Dinamo”ya gələndən imkan daxilində hər bazar günü bu cür kütləvi mərasimlər keçiririk. Bu, ən normal haldır və sonda hər bir insanın şəxsi işidir.