"Neftçi" çempionluğa, "Simurq" I diviziona doğru (YENİLƏNİB)

Bu gün Unibank Premyer Liqasında XXV turun qalan 3 oyunu keçirilib. Qol.Az-ın məlumatına görə, mərkəzi qarşılaşma Tofiq Bəhramov adına Respublika stadionunda "Neftçi" ilə "Qarabağ" klubları arasında oynanılıb.

Son 9 oyundan qalib ayrılan "Qarabağ" yenə qalib gəlsəydi, lider "Neftçi" ilə xal fərqini minimuma endirəcəkdi. Bu zaman çempionluq uğrunda intriqa daha da artacaqdı. Lakin əksi baş verib. Flaqman qələbə qazanaraq, ən yaxın izləyicisi "Xəzər Lənkəran"la xal fərqini 6-ya yüksəldib. Bununla da Arif Əsədovun komandası çempionluğa doğru daha bir önəmli addım atıb. 

"Qarabağ"ın xal itkisi AZAL-ın işinə yarayıb. Çünki "təyyarəçilər" "İnter"i minimal hesabla yenərək, Ağdam təmsilçisi ilə xal fərqini 6-ya endirib. Bu nəticədən sonra AZAL 4-cü pilləyə yüksəlib. "İnter" isə 5-ci pilləyə enib.   

İlk "altılığ"ın bu iki görüşü ilə yanaşı, ikinci "altılıq"da "Simurq" - "Turan" qarşılaşması da az əhəmiyyət kəsb etmirdi. 11-ci pillədə olan Zaqatala komandası Tovuz təmsilçisindən 6 xal geridə qalırdı. Yalnız qələbə təqdirində, Qyoko Haciyevskinin komandası autsayderlikdən qurtulmaq üçün ciddi addım ata bilərdi. Lakin "Turan" qələbə qazanaraq, "Simurq"un I diviziona enişini sürətləndirib.        

Turun ilk oyun günündə isə 3 görüş baş tutub.

İlk oyunlar ikinci “altılığ”ın görüşləri ilə başlayıb. Burada ən diqqətçəkən məqam isə "Gəncə"nin yeni baş məşqçisi Mehman Allahverdiyevlə bağlıdır. Azərbaycanın ən titullu məşqçilərindən olan mütəxəssis uzun fasilədən sonra futbola qayıdışını Qəbələdə qeyd edib. İlk matçını səfərdə keçirən Allahverdiyevin komandası bu görüşdən 1:1-lik bərabərlikə ayrılıb. Matçın birinci hissəsində hesabda geri düşən "Gəncə" futbolçuları fasilədən sonra cavab qolunu vuraraq Qəbələdən 1 xalla dönməyi bacarıblar. 

Digər oyuna gəlincə, MOİK cari mövsümdə yeganə qələbəsini qazandığı “Muğan”ı qonaq edib. Lakin onlar qələbə qazanacaqları halda belə sonuncu pillədən yaxa qurtara bilməyəcəkdilər. Bununla belə, MOİK bu oyunda böyük əzmkarlıq göstərək 90 dəqiqə ərzində qapısını toxunulmaz saxlaya bilib. 

Turun ilk oyun gününə “Bakı” - “Xəzər Lənkəran” matçı ilə yekun vurulub. Prinsipial əhəmiyyət daşıyan oyunun çətin keçəcəyini proqnozlaşdırmaq olardı. Təsnifat mərhələsində baş tutan görüşlərin hər ikisinin heç-heçə başa çatdığını nəzərə alsaq, bu dəfə də eyni nəticənin təkrarlanacağı inandırıcı görünmürdü.
 
Lakin bu görüş də digərlərindən fərqlənməyib. Oyun ərzində hər iki komandanın bir neçə dəfə qol vurmaq imkanı olsa da, bundan istifadə edə bilməyiblər. Qolsuz heç-heçə ilə başa çatan oyunda hər iki komanda vacib 2 xal itkisilə üzləşib. Bu xal itkisi daha çox "Xəzər Lənkəran"a çempionluq yolunda ağır zərbə vurub. 

3 aprel

15:00. "Simurq" - "Turan" - 0:1
Qol: Georgi Beriaşvili, 10 (0:1)
Hakimlər: Vüsal Əliyev, Mübariz Həşimov, Elşən Acalov, Hacıəli Ağayev
AFFA nümayəndəsi: Əsgər Əmirəliyev
Hakim-inspektor: Əhmədağa Cabbarov
Zaqatala şəhər stadionu.

16:00. AZAL - "İnter" - 1:0
Qol: Nuqzar Kvirtiya, 44 (1:0)
"Şəfa" stadionu.

16:00. "Neftçi" - "Qarabağ" - 2:0
Qollar: Rodriqinyo, 4 (1:0). Flavinyo, 61 (2:0)

Hakimlər: Rövşən Əhmədov, Ramiz Əsədov, Eldar Nağıbəyov, Elnur Muradov
AFFA nümayəndəsi: Ramiz Mustafayev
Hakim-inspektor: Xaqani Məmmədov
Tofiq Bəhramov adına Respublika stadionu.

2 aprel

18:00. “Bakı” – “Xəzər Lənkəran” - 0:0
Tofiq Bəhramov adına Respublika stadionu

15:00. MOİK – “Muğan” - 0:0
Hakimlər: Fuad Həsənov, Aydın Ələkbərov, Samir Hacıyev, Teymur Fərhadov
“Bakı” klubunun təlim-məşq bazası

15:00. “Qəbələ” – “Gəncə” - 1:1
Qollar: Murad Hüseynov, 26 (1:0), Junivan Suares, 56 (1:1)
Hakimlər: Rahim Həsənov, İsgəndər Əliyev, Coşqun Həsənov, Elvin Əsgərov
Qəbələ. Şəhər stadionunun ehtiyat meydançası

Turnir cədvəli