Mircavadov: “Vallah, Santuş Canni de Byazidən uğurlu olar”

Mircavadov: “Vallah, Santuş Canni de Byazidən uğurlu olar”
ÖLKƏ FUTBOLU 12 İyun 2024 / 20:30 5137
-  A +

"Fernandu Santuş təcrübəli məşqçidir. Düşünürəm ki, hazırda bizim futbolumuz Portuqaliya, İspaniya futboluna çox yaxındır".

Bu sözləri QOL.az saytına açıqlamasında Azərbaycanın əməkdar məşqçisi Ağasəlim Mircavadov deyib. O, 2016-cı ildə Portuqaliya yığması ilə Avropa çempionluğunu qazanan məşhur mütəxəssis Fernandu Santuşun Azərbaycan millisinə baş məşqçi təyin olunmasını şərh edib.

A.Mircavadov bildirib ki, Fernandu Santuş yığmanın sabiq baş məşqçisi Canni de Byazidən daha uğurlu nəticələr qazanacaq: "Santuşun Polşada işi niyə alınmadı, onu deyə bilmərəm. Amma millimizə gəlməyə razılıq veribsə, deməli, komandanın oyunlarına baxıb də. Bu təyinatın uğurlu olub-olmayacağını indidən demək mümkün deyil. Çünki o, hələ Azərbaycan üçün heç nə etməyib. 

Fernandu Santuş təcrübəli mütəxəssisdir, Portuqaliya millisi ilə uğur qazanıb. Amma bir şey var ki, o, Portuqaliya yığmasında liderlərlə işləyirdi. Bizdə isə tam başqa işlər görməlidir. Vallah, mən düşünürəm ki, Fernandu Santuş Canni de Byazidən uğurlu olar. Çünki Santuşun futbol anlayışı tam başqadır. Razılıq əldə olunubsa, bizə də xeyirli olsun demək düşər. Nə kömək lazım olsa, biz edəcəyik".

Mütəxəssis Fernandu Santuşun milli komandamızda ailə formalaşdırmalı olduğunu deyib: "Məşqçinin təcrübəli olması vacib amildir. İndi əsas məsələ Santuşun millidə necə bir ailə quracağıdır. Mən Polşa millisinin oyunlarına baxırdım. Nəsə Santuşun orda işi alınmırdı. Futbolçularla anlaşması yaxşı deyildi. Bu da oyunda hiss olunurdu. Məşqçinin yığmada bir ailə qurmağı böyük işdir, vacib məsələdir. Fernandu Santuşa uğurlar arzu edirəm".

Nur Zeynalova

Daha çox


Son xəbərlər