"Murad Musayev kimi danışanların cavabını vermək lazımdır" - Azər Məmmədov

“Sabah”dan xal almağımız “Qəbələ” ilə oyundan əvvəl komandamızda ruh yüksəkliyi yaradıb. Çox vacib xal qazandıq. Məncə, bu, “Qəbələ” ilə oyunda öz təsirini göstərəcək”.

Bu sözləri Qol.az-a açıqlamasında “Kəpəz”in baş məşqçisi Azər Məmmədov deyib. Gəncə təmsilçisi Misli Premyer Liqasının 8-ci turunda “Qəbələ”ni qəbul edəcək. Komandanın çalışdırıcısı ev oyununda yaxşı nəticəyə ümid edir: “Biz evdə oynadığımız 4 matçdan 3-də uduzmuşuq. Bu dəfə doğma azarkeşlər önündə qalib gəlmək istəyirik. Evdə məğlubiyyət seriyasını qırmalıyıq. Düşünürəm ki, “Qəbələ” ilə oyunda yaxşı nəticə qazana bilərik”. 

Maraqlıdır ki, “Kəpəz” bu mövsüm topladığı 5 xalı ötən mövsümün çempionu “Qarabağ”dan, gümüş medalçı “Sabah” və iddialılardan olan “Neftçi”dən alıb, digər oyunların hamısında uduzub. A.Məmmədov bununla bağlı da danışıb:

“Kəpəz”in baş məşqçisi kimi yox, bir başqa şəxs kimi qıraqdan baxsaydım, mənə də bu nəticələr maraqlı gələrdi. Komandamız xal götürməyi real görünən oyunlarda uduzub, çətin rəqiblərdən isə xallar almışıq. Futbolda hər bir komandadan xal almaq mümkündür. Biz hər oyunda bunun üçün çalışırıq. Sadəcə hadisələr bizim də gözləmədiyimiz kimi gedir. Biz də “Qarabağ”, “Sabah” və “Neftçi”dən yox, uduzduğumuz komandalardan xal almağı gözləyirdik. Çox adam bunu rəqiblərə daha fərqli yanaşma ilə əlaqələndirir. Amma belə deyil. Çünki biz elə bir komandayıq ki, bütün rəqiblərə qarşı tam məsuliyyətlə oynayırıq. Çünki Premyer Liqada qalmalıyıq. Motivasiyamız hər bir komandaya qarşı eynidir”.

A.Məmmədov son vaxtlar ünvanına səsləndirilən “istefa” şüarları haqda isə bildirib: “Bizim Premyer Liqadan düşmə təhlükəmiz var ki, bu da üzərimizdə təzyiq yaradır. Son oyunlarda “Kəpəz” azarkeşləri bir az səbirsiz davranır. “İstefa” şüarlarını nəzərdə tuturam. Bunlar təbii ki, futboloçulara da psixoloji təsir edir. Mənim üçün “istefa” şüarının kimə deyildiyinin fərqi yoxdur. Yəni ya mənə deyildi, ya da İdarə Heyətinin sədrinə, fərq etməz. Biz bir ailəyik. Futbolçuma qıraqdan nəsə xoşagəlməz söz deyiləndə elə bil ki, mənə deyilir. “İstefa” şüarı da komandaya təsir edir. Bu sözün mənasını hamı bilir. 
Komandanın pis vaxtı da olur, yaxşı vaxtı da. Gərək pis vaxtda da komandanın yanında olasan. Biz “Kəpəz”in Premyer Liqada qalmasını istəyiriksə, mənfi şüarlarla yox, müsbət şüarlarla komandamızı dəstəkləməliyik”.

“Sabah”ın baş məşqçsi Murad Musayev “Kəpəz”lə oyundan (2:2) sonra mətbuat konfransında rəqib komandanın vaxtı çox uzatmasından şikayətlənib. Hətta o, “Mənim komandam nə vaxtsa belə oyun sərgiləsə, futbolu atıb gedib başqa işlə məşğul olaram” cümləsini də işlədib. “Kəpəz”in çalışdırıcısı rusiyalı mütəxəssisin bu fikrinə də münasibət bildirib. O qeyd edib ki, kimisə aşağılamağa heç kimə ixtiyar verilməyib: 

“O kəlməni işlədən adam gərək dərindən düşünsün. Uğursuzluğu rəqib komandanın, onun baş məşqçisinin üstünə atmaqla çox uzağa getmək olmaz. İnsan gərək “mən” ifadəsini bir az az işlətsin. İnsan bir az təvazökar olmalı və problemi özündə axtarmalıdır. Bilirsiniz ki, “Sabah” bizim çempionatın ən yaxşı büdcəsi olan klublarından biridir. Əgər o büdcə, belə dəstəklə, bu cür keyfiyyətli futbolçularla bizə qalib gələ bilmirlərsə, başqa nəsə danışmaq düzgün deyil. Daha yaxşı olar ki, 18 mümkün xaldan niyə cəmi 5-ni yığmaları haqda düşünsün. “Partizan”la oyunlarını xatırlasınlar. Vaxtı nə qədər uzadırdılar. 

Bizim futbolçular yerə əsassız yıxılmayıblar. Rəqib komanda çox sürətli idi. Ona görə də bu cür hallar baş verə bilər. Mən həmişə belə şeylərin əleyhinə olmuşam. Kapitan olanda da yıxılan futbolçunu dərhal ayağa qaldırırdım. Ömür boyu komandama vaxtı uzatmaqla bağlı tapşırığım ola bilməz. Əgər xal qazanmışıqsa, bunu hamı, əsas da Murd Musayev qəbul etməlidir. Biz futbolçularımızın əziyyəti hesabına bu xalı qazanmışıq. Futbolu belə şeylərə görə atmazlar. Futbolu atan elə bu cür büdcə ilə nəticə verməyəndə atar. Danışmağa nə var ki?

Mən futbol oynayanda həmişə problemlərdən qaçan olmuşam. Ancaq futbolumu oynamışam. Təəssüflər olsun ki, Murad Musayev məcbur etdi ki, susqunluğu pozum. Düşünürəm ki, belə danışanların cavabını vermək lazımdır. Heç kimə ixtiyar verilməyib ki, kimisə aşağılasın”.

Ramiq Ağaməmmədov