"Yaxşı nəticələr istəyiriksə, klub olaraq böyüməliyik" - Ayxan Abbasov

"Yaxşı nəticələr istəyiriksə, klub olaraq böyüməliyik" - Ayxan Abbasov
PREMYER LİQA 11 Mart 2023 / 17:57 1165
-  A +

“Çətin oyun idi. “Qəbələ”nin oturuşmuş heyəti var, çempionatda yüksək pillələr uğrunda mübarizə aparırlar. Üstəlik, kubokda da mübarizəni davam etdirirlər. Heyətlərində yaxşı futbolçular cəmləşib. Bir-birilərini çox gözəl başa düşürlər. Bu gün nəticəni düşünürdük. Evdə bəzən yaxşı oynadığımız matçlarda uduzmuşuq. Belədə komandada psixoloji gərginlik yaranır. Ona görə də bu gün nəticə qazanmaq istəyirdik. Havanın isti olması mübarizəni daha da çətinləşdirirdi. Buna baxmayaraq, futbolçular meydanda mübarizə apardılar. İkinci hissədə fərqlənə bilsəydik, qalib gəlmək şansımız daha çox olardı. Amma rəqibin də şansları oldu”. 

Qol.az xəbər verir ki, bu sözləri “Turan Tovuz”un baş məşqçisi Ayxan Abbasov Misli Premyer Liqasının 26-cı turunda “Qəbələ” ilə matçdan (1:1) sonra təşkil olunan mətbuat konfransında deyib. 

O, 1 xalın komandası üçün dəyərli olduğunu söyləyib: “Yekunda 1 xal qazandıq və hər xal bizim üçün önəmlidir. İstəyirik ki, turnir cədvəlində bizdən aşağıda qərarlaşan komandalarla xal fərqini artıraq. Çünki 4-cü dövrə çox gərgin keçəcək. 5 gündən sonra bizi səfərdə “Səbail”lə gərgin oyun gözləyir. Həmin matça ciddi hazırlaşacağıq”. 

Mütəxəssis Natan Oduvanın yoxluğunun komandası üçün ciddi itki olduğunu bildirib: “Oduva “Neftçi” ilə matçda zədələnmişdi. Dünən komanda ilə birgə məşq etmişdi, özünü yaxşı hiss edirdi. Təəssüf ki, isinmə hərəkətləri zamanı ayağının eyni yerinə toxunuş oldu və ağrıları çoxaldı. Təbii ki, onun yoxluğu bizim üçün böyük itkidir”. 

Abbasov “Turan Tovuz”un gələcək planlarından da söz açıb: “Buna qədər ağır bir dövrü keçirdik. Yayda komandanı qurarkən ikinci ildə hansı çətinliklərlə üzləşəcəyimizi düşünürdük. Çünki iddialı rəqiblərlə mübarizə aparmaq çətindir. Şükürlər olsun ki, artıq komandamızın sponsoru var. Onların da ilk baxışları maraqlı idi. Müsbət haldır ki, onlar da tələsmirlər. O mənada ki, təkcə əsas komandanı deyil, akademiyanı, əvəzedici heyəti də düşünürlər. Gələcəklər bağlı planlar çoxdur: qazonun dəyişməsi, bazanın böyüməsi və s. Gələcəkdə yaxşı nəticələr qazanmaq istəyiriksə, klub olaraq böyüməliyik. Təbii ki, gələn il yeni futbolçular olacaq, rəqabət artaracaq. Premyer Liqa bu mövsümkündən də çətin keçəcək. Bütün bunlara hazır olmaq lazımdır”. 

Çalışdırıcı tovuzlu azarkeşlərdən razılığını ifadə edib: “Bizim azarkeşlər nümunəvidirlər. “Neftçi”yə 0:4 hesabı ilə uduzduğumuz oyundan sonra da komandaya dəstək oldular. Azarkeşlər də vəziyyəti düzgün qiymətləndirirlər. Təbii ki, mən də uduzmaq istəmirəm. Amma reallıq var və onu düzgün qiymətləndirmək lazımdır”.

O, “Turan Tovuz”la yeni müqavilə imzalamasına da toxunub: “İlk növbədə rəhbərlikdən məndən nə istədiklərini eşitdim. Bu gün reallıq var. Əgər gücüm çatmayan tələblər olsaydı, razılaşmazdım. Lakin rəhbərliyin səbrli olması bizə birgə inkişaf etmək şansı yaradır. Qısa zamanda uğur qazanmaq çətindir. Düzdür, bəlkə ideal şərait qarşılığında 1 ildə də nəticə qazanmaq olar. Lakin bu, davamlı olmayacaq. Biz isə stabil komanda yaratmaq istəyirik. Rəhbərlik də bu düşüncədədir. Onların yanaşması xoşuma gəldi. Əlbəttə, hər məşqçi istəyir ki, bir yerdə mümkün olduğu qədər çox işləsin. Bəzən yer dəyişikliyi çətinlik yaradır. Bir sözlə, rəhbərliklə baxışlarımız eynidir. Hazırda əsas diqqətimizi nəticəyə yönəltməmişik. Təbii ki, bu o demək deyil ki, nəticə istəmirik. Xeyr, gücümüz çatdığı qədər bütün rəqiblərə qarşı mübarizə aparacağıq. Bu gün futbolçulardan ilk istəyim öz meydanımızdakı matçlarda uduzmamaqdır. Rəqiblər səfərdə olduqlarını hiss etməlidirlər”.

Çalışdırıcı müqaviləni 3 illik olmasının səbəbini də açıqlayıb: “Rəhbərlik bu müddəti istədi. Təbii ki, mənə güvəndikləri üçün onlara minnnətdaram. Mən də o inamı doğrultmalıyam. Bunun üçün əlimdən gələni edəcəyəm. Artıq indidən yeni mövsümün planlarını cızırıq, axtarışlara başlamışıq”.

Yeniliklərdən daha tez xəbər tutmaq üçün bizi Feysbukda da izləyin

Daha çox


Son xəbərlər
01.03.24  13:35

Sarri qovulur?

01.03.24  10:25

ETOPAZ 12 yaşında