Qurban Qurbanov: “Berti Foqts bizə “Borussiya” haqda məlumatlar təqdim edib”

Sabah “Qarabag” “Borussiya” ilə Avroliqanın pley-off mərhələsinin ilk oyunu üçün Almaniyaya yola düşür. Səfər ərəfəsində Ağdam klubunun baş məşqçisi Qurban Qurbanov müsahibə verib. Müsahibəni təqdim edirik.

- Qurban bəy, komandanız yorğunluğu üzərindən çıxara bilibmi?
- Hazırlıq plan üzrə gedir. Hələ ki, futbolçularda yorğunluq hiss olunur. Buna normal yanaşmaq lazımdır. Oyundan bir neçə gün sonra vaxt lazımdır ki, bərpa prosesi tamamlansın.
- Bu gün də (söhbət dünən gecə olub - red.) komandanız fərqli məşq etdi. “Qarabağ” 81 minlik “Borussiya” fanat ordusunun sədaları altında hazırlaşdı. Sizcə, bunun nə dərəcədə effekti var?
- Futbolçularımızın Almaniyadakı oyuna tam hazır olması üçün bütün vasitələrdən istifadə olunur. Çalışırıq ki, onlar həm rəqib, həm də azarkeş təzyiqinə tab gətirə bilsin. Bunların nə dərəcədə köməyi olacağını oyun göstərəcək.
- Vaqif Cavadovun komandaya keçidi məsələsi nə yerdədir?
- Hələ ki, məsələ açıq qalıb. Ortada bizə aid olmayan nüanslar var.
- “Tvente” futbolçunu “Qarabağ”a buraxırmı?
- Bilinmir. Bunun üçün klublar arasında danışıqlar gedir.
- Rəqib haqda nə fikirdəsiniz?
- “Borussiya”nın güclü klub olması bizə yaxşı məlumdur. Rəqib komanda ötən mövsüm bundesliqanı 5-ci pillədə başa vurub. Bu gün internet vasitəsilə “Borussiya”nın 3-cü bundesliqa təmsilçisi “Vakker Burqhauzen”lə kubok oyununu izlədim. Deyərdim ki, rəqib yarışlara tam hazırdır. Ancaq futbolda mümkünsüz heç nə yoxdur. Səfər oyununda sona kimi mübarizə aparacağıq.
- Almaniyada hansı nəticəyə ümid etmək olar?
- Bu haqda nəsə deyə bilmərəm. Çalışacağıq ki, layiqli müqavimət göstərək.
- Start heyəti müəyyən etmisinizmi?
- Tam qərara gəlməmişəm. Bir neçə variant üzərində işləyirik. Bu haqda Almaniyada qərar verəcəyəm. Səfərdə, bazar ertəsi günü “Borussiya”nın “Mançester Siti” və “Arminiya” ilə oyunlarının videokasetini bizə təqdim edəcəklər. Bunlara baxdıqdan və bir neçə variant yoxlandıqdan sonra qəti qərar qəbul olunacaq.
- Sağ cinahdan başqa digər mövqelərdə dəyişiklik gözlənilirmi?
- Xeyr, ciddi dəyişiklik olmayacaq. Bu mövqeylə yanaşı, mərkəz xəttində də nəsə ola bilər.
- Sağ cinahda daha çox kimə şans vermək istərdiniz: Vüqar Nadirov, yoxsa Georgi Adamiyaya?
- Hələ ki, tam qərara gəlməmişəm.
- Sizcə, ilk oyunda hansı nəticə qaneedici olar?
- Bəlkə də minimal hesablı məğlubiyyət də sərf edər. Çalışacağıq ki, ən azı qol buraxmayaq, maksimum səy göstərəcəyik ki, qol vuraq. - “Borussiya”nın titullu komanda olması gənc futbolçularınızı qorxuya salmayacaq ki?
- Rəqib böyük tarixə malik, köklü klubdur. Təkcə bir faktı deyək ki, Çempionlar Liqası kimi yarışın qalibi olub. Futbolçular üzərində psixoloji gərginliyin olması qaçılmazdır. 81 min azarkeş qarşısında oynamaq asan olmayacaq. Ancaq “Borussiya”nın adı və titullarından, həmçinin fanatlarından qorxmaq lazım deyil. Komandamızda çoxları millinin heyətində yığma səviyyəsində daha güclü rəqiblərə qarşı oynayıblar. Ancaq klublararası mübarizə fərqlidir. Düşünmürəm ki, oyunçularımız nədənsə çəkinəcəklər. Arzu edirik ki, komandamız gözəl stadionda, eləcə də güclü rəqibə qarşı oynasın. Futbolçularımız özlərini yaxşı tərəfdən göstərməyə çalışacaqlar.
- Komandanıza yeni gələn gürcü futbolçu Beka haqda nə fikirdəsiniz?
- O, özü xahiş etmişdi ki, məşqlərimizə qatılsın, yoxlamadan keçsin. Böyük ehtimalla bu futbolçunu heyətə qatmayacağıq.
- Türkiyə səfəriniz zamanı Raykaarddan məsləhət aldığınız deyilir...
- Bu, doğru deyil. İstanbula şəxsi işlərimlə bağlı səfər etmişdim.
- “Bursaspor”un “Borussiya” ilə yoldaşlıq matçının videokasetini əldə etməmisiniz ki?
- Videokaset almasam da, onların köməkçi məşqçisi ilə danışmışam. Yenə də əlaqə saxlayacağam.
- Azərbaycanda çalışan Almaniyadan olan məşqçi Şefer və həmin ölkədə oynamış futbolçuların rəqib haqda fikirləri ilə tanış olmusunuzmu?
- Bəli. Hər bir məlumat bizim üçün köməkdir. Buna görə öz fikirlərini bildirənlərə təşəkkür edirəm.
- Foqstdan necə,  məlumat ala bilmisiniz?
- Olub, sağ olsun. Mən nəsə deməmişdim. Püşkatmadan bir neçə gün sonra Foqts bizə yazılı surətdə bəzi məlumatlar təqdim edib.
- Komandanıza uğurlar arzulayırıq.
- Çox sağ olun.

Mənbə: supersport.az