Tahir Süleymanov: «Məşhur klublar daha çox pul təklif etsə də, Mpenza «Neftçi»ni seçdi»

«Neftçi» klubunun vitse-prezidenti Tahir Süleymanov ünlü futbolçu Emil Mpenzanın kluba transferi və avqustun 8-də «Qarabağ»la ölkə çempionatının oyunu ilə bağlı Qol.Az saytının suallarını cavablandırıb

- Emil Mpenza bu gün Bakıya gəlib və «Neftçi»nin məşqini izləyib. Belçikalı futbolçuyla nə vaxt müqavilə bağlanacaq?
- Bu gün və ya sabah danışıqlar tam yekunlaşacaq və onun «Neftçi»yə keçidi rəsmiləşəcək.
- Futbolçuyla tam razılığa gəlinibmi?
- Təbii. Elə bu səbəbdən belçikalı ulduz Bakıdadır. Sadəcə, o, bu gün səhər saat 6-7 radələrində Azərbaycana gəldiyindən və yorğun olduğundan «Neftçi»nin səhər keçirilən məşqində iştirak etmədi. Axşam isə fərdi olaraq məşqə çıxacaq. Artıq dediyim kimi, yaxın iki gündə Mpenza ilə danışıqlar tam yekunlaşacaq və bütün məsələlər öz həllini tapacaq. Mənə elə gəlir ki, hər hansı problem yaşanmayacaq. Mpenza özü də «Neftçi»də oynamaq istəyir. Ona görə də Bakıda və «Neftçi»nin bazasındadır.
- Futbolçu ilə müqavilənin müddəti nə qədər olacaq?
- Minimum iki, maksimum üç illik müqavilə bağlamağı nəzərdə tuturuq.
- Transferin məbləğini açıqlaya bilərsiniz? Hər halda ulduz bir futbolçunun Azərbaycana transferi ucuz başa gələ bilməz. Xarici mətbuatda da bununla bağlı müxtəlif rəqəmlər səslənir.  
- Mən bu haqda heç nə demək istəmirəm. Sadəcə, onu deyim ki, Mpenza ulduz bir futbolçudur və sizin qeyd etdiyiniz kimi, Avropa mətbuatı bu məsələni gündəmdə saxlayır. İndi onlar «Neftçi» klubundan, Azərbaycan futbolundan yazırlar. Bu da futbolumuzun təbliğatı yönündə önəmli addımdır. Biz Azərbaycan çempionatının səviyyəsini qaldırmaq istəyiriksə, ölkəmizə səviyyəli legionerlər gətirməliyik. Yerli futbolçularımız da onların oyununa baxıb inkişaf edərlər.
- Hər halda, transferin qiyməti maraq doğurur…
- Bir məsələni xüsusi vurğulayım ki, «Neftçi»ylə yanaşı Avropanın bir neçə adlı-sanlı klubu da Mpenzanı transfer etmək istəyirdi və onların bu futbolçuya təklif etdiyi məğləğ bizimkindən daha çox idi. Amma biz Mpenza ilə uzun müddətdir ki, danışıqlar aparırdıq. Fürsətdən istifadə edib menecer Rəşid bəyə və şəxsən Mpenzanın özünə təşəkkür edirəm. Futbolçu öncədən söz verdiyi kimi, «Neftçi»ni seçdi, bununla da vədinə əməl etdi. Mpenza daha məşhur klublardan dəvət almasına və ona daha çox pul təklif edilməsinə baxmayaraq, məhz «Neftçi»ni seçdi. Mpenza bizimlə danışıqlarda ən sonda mənəvi baxımdan hərəkət etdi.
- Azarkeşlər Mpenzanı avqustun 8-də «Qarabağ»la ölkə çempionatının oyunlarında görə biləcəklər?
- Bu matça qədər Mpenzanın klubumuza rəsmi transfer məsələsi həllini tapmalıdır. Avqustun 8-nə qədər belçikalı futbolçunun sənədləşdirmə işlərini yoluna qoymalıyıq. Onun meydana çıxıb-çıxmayacağı haqda qərarı isə artıq məşqçilər heyəti verəcək.
- «Qarabağ»la matçdan söz düşmüşkən, bu komanda Avroliqada parlaq oyun nümayiş etdirir və yüksək formadadır. Bu amil sizi narahat etmir ki?
- Mən ilk öncə bütün klub rəhbərliyimiz adından «Qarabağ» klubuna «Visla» ilə Avroliqanın cavab matçında da uğurlar arzulayıram. İnanırıq ki, «Qarabağ» Avropada daha uğurlu nəticələrə imza atacaq. Sizin sualınıza gəlincə, «Neftçi» Azərbaycanın ən köklü klubudur və istənilən rəqiblə qarşılaşmağa hazırdır. Mən şübhə etmirəm ki, Mpenzanın və digər legionerlərimizin «Neftçi»yə gəlişi, eyni zamanda «Qarabağ»ın Avroliqadakı uğuru avqustun 8-də tribunada azarkeşlərin sayını daha da çox edəcək. Biz elə azarkeşlərimizi düşünərək bu matçı axşam saatlarına təyin etmişik. İnanıram ki, azarkeşlər tribunaları doldursalar, qətiyyən yanılmayacaqlar. Dünya səviyyəli ulduz futbolçu və möhtəşəm «Qarabağ» komandasının oyunu onlara zövq verəcək.
- Matçın saat 21.00-da başlayacağı dəqiqləşib?
- Biz oyunun məhz bu saatda start götürməsini nəzərdə tutmuşuq. Bununla bağlı qərarı isə Peşəkar Futbol Liqası verməlidir.