Emin İmaməliyev: «Metallurq»a hər iki oyunda qol vuracağımı hiss etmişdim»

«Qarabağ»ın Avropa Liqasında Makedoniya «Metallurq»u ilə hər iki qarşılaşmada qol vuran yarımmüdafiəçi Emin İmaməliyev Qol.Az saytının suallarını cavablandırıb.

- Dalbadal iki oyunda qol vurursan. Oyundan əvvəl özündə buna inam var idimi?
- Bəli, həm Bakıdakı, həm də səfərdəki oyunlarda qol vuracağımı hiss etmişdim. Ümumiyyətlə, hücumameylli yarımmüdafiəçilər qol vurmağa çalışmalıdırlar. Sevinirəm ki, istəyimə nail ola bildim.
- «Qarabağ» artıq növbəti mərhələdə Şimali İrlandiyanın «Portadaun» klubu ilə qarşılaşacaq. Bu mərhələni keçmək şansınızı necə dəyərləndirirsən?
- Rəqibimiz haqda məlumatım yoxdur. Yalnız İnternet vasitəsilə onlar haqda bilgi toplamağa çalışıram. Mən bilən səviyyəli komandadır. İnşallah, çalışacağıq ki, yaxşı, səviyyəli oyun göstərək. Rəqibin oyunlarının videoyazısını əldə edəndən sonra konkret nəsə demək olacaq. İndidən onu söyləyə bilərəm ki, bizi maraqlı və çətin oyun gözləyir.
- «Qarabağ»da hansısa problemlər varmı?
- Problem ondadır ki, komandamız avroliqanın oyunlarına hələ 60-70 faiz hazırdır. Heyətimizdə zədəli futbolçular var, millidən qayıdan futbolçularda yorğunluq qalmaqdadır. Məşqçilər heyəti çalışır ki, bu problemləri aradan qaldırsın və hamı bərabər səviyyədə olsun.
- Şablon səslənsə də, bilmək istərdik, səndə «Portadaun»la oyunlarda da qol vuracağına əminlik var?
- Mən bundan əvvəlki müsahibələrimdə də demişdim ki, hər qol vurduqca futbolçuya əlavə ruh gəlir. İstəyirsən ki, hər oyunda fərqlənəsən. Futbolçuda qol vurmaq vərdiş halını almalıdır. Mən də komandama çox fayda verməyim üçün bacardığımı edirəm.
- Vurduğun qolları kimə həsr elədin?
- Bunda tək mənim yox, bütün komandanın əməyi oldu. Xüsusilə Adamiya və Rəşadı qeyd edərdim. Biz meydana çıxanda özümüz deyil, komandamız üçün oynayırıq. Elə ona görə də bu qolları «Qarabağ»a və komanda yoldaşlarıma həsr edirəm. 
- İki oyunda fərqlənməyin əsas heyətdə yerini möhkəmlətmək baxımından nə dərəcə rol oynayır?
- Bilirsiniz, futbolçu hər zaman hazır vəziyyətdə olmalıdır. O, gərək məşqçinin qərarına hörmətlə yanaşa və öz vaxtını gözləyə. Fərqi yoxdur, əsas heyətdə də oynayanda, ehtiyatda oturanda da komandana xeyir vermək gücündə olmalısan.
- Belə görsənir ki, Adamiya ilə oyunun daha yaxşı alınır. İlk oyunda məhz sənin gözəl ötürməndən sonra gürcüstanlı futbolçu qol vurdu. Təkrar oyunda isə onun ötürməsi sayəsində sən fərqlənə bildin.
- Adamiya yüksək texnikaya malik futbolçudur. Topla davranışı çox yaxşı və rahatdır. Hər imkandan istifadə edə bilir. Amma ümumilikdə, mən təkcə Adamiya ilə deyil, komandamızın bütün üzvləri ilə yaxşı anlaşıram. Çünki neçə ildir ki, bir komandadayıq, bir-birimizə bələdik. Ona görə də oyunumuz yaxşı alınır. Ən əsası isə budur ki, bizdə mehriban kollektiv var. Mehribançılıq olan yerdə isə yaxşı nəticə də olur.
- «Qarabağ» rəhbərliyi avrokuboklarda ən azı ötənilki uğurları təkrarlamağı qarşısına hədəf qoyub.
- Bizdə elə bir kollektiv yığılıb ki, bütün oyunlarda yalnız qələbə haqda düşünürük. Daha nəinki məğlubiyyət, heç-heçə haqda da fikirləşmirik. Beynimizdə bir fikir var - qələbə qazanıb xalqımızı, qaçqınlarımızı sevindirmək. «Qarabağ»ın adı isə bizə əlavə stimul verir. Bəli, biz ən pis halda ötənilki uğurları təkrarlamaq istəyirik. Amma yaxşı olardı ki, ilk olaraq «Qarabağ» avroliqanın qrup mərhələsinə vəsiqə qazanmaqla tarixə düşsün.