Rəşad Sadıqov: «Biz hələ o qədər inkişaf eləməmişik ki, rəqiblərimizə zəif gözlə baxaq»

«Qarabağ» Avropa Liqasının birinci təsnifat mərhələsinin ilk oyununda sabah Makedoniyanın «Metallurq» klubu ilə qarşılaşacaq. Vacib oyun ərəfəsində Ağdam klubunun müdafiəçisi Rəşad Sadıqov Qol.Az-ın suallarını cavablandırıb.

- Türkiyədəki təlim-məşq toplanışının istədiyiniz kimi alınmadığını söyləmişdin. Komandanızda indi durum necədir?
- Bizdə məşq sistemi elə qurulub ki, hansısa çatışmazlıq oyun praktikamızda hiss olunmasın. İkitərəfli oyunlara daha çox yer ayırılıb ki, futbolçular bir-birilərini uyğunlaşa bilsinlər. Bütün bu prosesin nə dərəcədə yaxşı və pis olduğunu sabahkı oyun göstərəcək.
- Rəqibi öyrənə bilmisinizmi?
- «Metallurq» haqda çox az məlumatımız var. Onların oyunlarının videoyazısını da izləyə bilməmişik. Ötən il bütün rəqiblərimiz yaxşı təhlil edə bilirdik. Bu dəfə vəziyyət fərqlidir. Təkcə onu bilirik ki, rəqibin iki-üç təhlükəli oyunçusu var. Daha çox yarımmüdafiənin sol kənarında mübarizə aparan futbolçuları təhlükəlidir. Hücumameyilli yarımmüdafiəçiləri haqda da eyni sözü demək olar. Dayaq müdafiəçiləri də çox təcrübəlidir. Ağıllı oyun oynamağı xoşlayır və top saxlamağı bacarırlar. Bunlar onu deməyə əsas verir ki, rəqib sürətli futbola üstünlük verəcək, bizim oyunumuzu dağıtmağa və məğlub olmamağa çalışacaq.
- «Metallurq»la bağlı fikirlər haçalanıb. Kimisi onu zəif, kimisi güclü rəqib sayır. Sən bu haqda nə düşünürsən?
- Makedoniya çempionatı qətiyyən zəif deyil. Ən azı hər il bu çempionatdan iki futbolçu Avropaya transfer olunur. Bu komandada hər il inkişaf edir. Rəqib sabah çox istəkli olacaq. Biz də arxayınlaşmamalı, ağıllı və səbirli oynamalıyıq. Rəqibin zəif, ya güclü olduğunu indidən söyləyə bilmərəm. Bunu sabahkı matç zamanı görəcəyik. Birdə ki, gəlin, səmimi danışaq, biz axı, o qədər inkişaf eləməmişik ki, rəqiblərimizə zəif gözlə baxaq. Belə götürəndə, Avropada bir çox klub məhz Azərbaycan komandaları ilə düşmək istəyir ki, mərhələni rahatlıqla keçə bilsinlər.
- Amma komandanızın futbolçuları arasında da belə düşünənlər var ki, «Metallurq» «Qarabağ»ın ötən il mübarizədən kənarda qoyduğu Norveç «Rusenborq»u və Finlandiya «Honka»sından zəifdir.
- Bəli, belə fikirləri mən də tez-tez eşidirəm. Amma axı, «Qarabağ» da ötənilki «Qarabağ» deyil. Keçən il biz bir ay təlim-məşq toplanışında olduq və üç oyun keçirdik. Bu gün «Qarabağ» tam formada deyil. İndi futbolda adlar  heç nəyi həll etmir. Dünya çempionatına baxın… Fransa və İtaliya kimi komandalar qrup səddini aşa bilmədilər. Ötən il «Rusenborq» bizimlə oyunda bütün oyuna nəzarət etdi, amma mərhələni «Qarabağ» adladı. Bir daha deyirəm, sabah «Metallurq» çox istəkli olacaq və bizə narahatlıq yaratmağa çalışacaq. Bu mənada, biz oyuna həm psixoloji, həm də taktiki tərəfdən çox ciddi hazırlaşmalıyıq.
- Avroliqa oyunlarında şəxsən sənin özündən gözləntilər çoxdur. Bu, sənə psixologi tərəfdən necə təsir edir?
- Bu haqda fikirləşmirəm. Sakit formada oyunu düşünür və matça hazırlaşıram. Rəqibi yaxından tanıyanda yaxşı olur, tanımayanda isə bu haqda çox düşünmürəm.
- «Qarabağ»ın yeni albaniyalı legioneri Ansi Aqolli haqda düşüncələrin necədir? Elnur Allahverdiyevi layiqincə əvəz etmək gücündədirmi?
- Onları müqayisə etmək istəməzdim. Hər ikisinin öz yeri var. Ansi komandaya tez uyğunlaşdı. Elnur «Qarabağ»ı tərk edəndən sonra bu futbolçuyla danışıqlar aparılırdı, düşərgəmizə bir az güc qoşulsa da, çox istəklidir. Albaniya millisinin futbolçudur, Ukraynada çıxış edib, təcrübəsi çoxdur, özü də yaxşı insandır. Biz də istəyirik ki, ona kömək edək.