Kaxaber Sxadadze: «Məni problemlər yox, oyun maraqlandırır»

«İnter»in baş məşqçisi Kaxaber Sxadadzenin Qol.Az saytına müsahibəsi

- Premyer Liqada «Qarabağ»a son məğlubiyyətdən sonra çoxları «İnter»in çempionluq şansının xeyli azaldığı düşünür...
- Əlbəttə, lider olmaq üçün böyük şans itirdik. Amma sona iki tur qaldığından hələ hər şey itirilməyib. Nəzəri cəhətdən şansımız qalıb. Biz öz üzərimizdə işləyirik.
- Oyundan sonra bildirmişdiz ki, heyətdə problemləriniz var…
- Yox, mən indi fikrimi tam çatdıracağam. Heyət baxımından problemimiz var deyəndə, mən zədəli futbolçularımızın çox olmasını nəzərdə tuturdum. Pis futbolçularımızın olmasından şikayət etməmişəm.
- Amma axı, geniş heyətiniz var…
- Geniş deyil, normal heyətimiz var. Ötən mövsüm bizdə 32, indi isə 26 futbolçu çıxış edir. Futbolçularımızdan razıyam. Amma zədəli futbolçularımız çoxdur, bundan başqa sarı vərəqə limitini dolduranlar da az deyil. «Qarabağ»la oyun günü iki futbolçumuz - Rubins və Mjavanadze sıradan çıxdı. Bu, bizim problemimizdir. Bütün jurnalistlərdən xahiş edirəm ki, nəsə onlara aydın deyilsə, soruşsunlar, mən cavab verəcəyəm. Problem futbolçularımızın sayında deyil, onların durumlarındadır.
- Bir də demişdiz ki, futbolçular digər meydançalara uyğunlaşa bilmirlər. Axı, başqa komandalar da sizin kimi eyni stadionlarda oynayırlar…
- «Şəfa»nın ot örtüyü digər meydançalardan çox fərqlidir. Biz bura uyğunlaşmışıq. Ona görə bizə çətin olur. Mən öz komandamın adından danışa bilərəm. Düşünürəm ki, başqa komandalar da çətinlik çəkirlər. Bütün bunları məğlubiyyətimizə bəhanə kimi gətirmirəm. Bizim səhvlərimiz çox idi. Ötürmələrdə və topu qəbul etmələrdə səhvlərə yol verirdik. Demirəm ki, «Qarabağ» səhvsiz oynadı. Yox, onların da öz səhvləri var idi. Amma mən öz problemimizdən danışıram.
- Oyunda yeganə qolu həmyerliniz Adamiya vurdu…
- Adamiya çox yaxşı futbolçudur və birinci il deyil ki, Azərbaycanda oynayır. Sadəcə, Adamiya mövsümün əvvəlində çox oyun buraxdı. İndi formasını bərpa edib. Formasının zirvə nöqtəsindədir. Mənim futbolçularım mövsümün əvvəlində yüksək formadaydılar, indi formalarını bir az itiriblər. Adamiya isə əksinə mövsümün əvvəlini buraxsa da, indi əla fiziki formadadır. Sürəti də yaxşıdır. O ki qaldı bizə vurduğu qola, gizlətmirəm, yaxşı qol idi. Qol bizim müdafiəçilərin səhvi ucbatından vuruldu. Üç müdafiəçi onu qol vurmasına imkan verməməli idi.
- Bu gün «Bakı» ilə ölkə kubokunun yarımfinal mərhələsinin cavab qarşılaşmasına çıxacaqsınız. İlk oyunda 1:0 hesablı qələbə qazanmısınız. Bu üstünlüyünüzü qoruyub saxlaya biləcəksiniz?
- Düşünürəm ki, qeyri-adi heç nə baş verməyəcək. Səfərdə qələbə qazanmağımız yaxşıdır. Amma bu o demək deyil ki, biz arxayınlaşmalıyıq. Əksinə yenə qol vurmalıyıq. Yadınızdadırsa, «Neftçi» ilə qarşılaşmada səfərdə 3:0 hesablı qələbə əldə etmişdik. Evdəki oyunda da matç başlayan kimi bir qol vurduq və hesabı sonadək saxladıq. Bu gün çətin oyun olacaq.
- Hazırda sizi komandanızda daha çox nə narahat edir?
- Məni indi problemlər yox, bugünkü oyun maraqlandırır,
- Çempionatın formatı ilə bağlı nə deyə bilərsiz?
- Bizdə ilk «altılıq»da gərgin mübarizə gedir. İkinci «altılığ»a isə heç baxan da yoxdur. Yaxşı olardı ki, Avropadakı kimi, Azərbaycanda da ikidövrəli çempionat keçirilsin. Neçə komandanın yarışdığının isə fərqi yoxdur.
- Mövsümün sonu yaxınlaşır. Komandanızı tərk edəcək futbolçuların siyahısı bəllidir?
- Başa düşürsünüz, indi bütün fikrimizi çempionat və kubok oyununa yönəltmişik. Dünən klub prezidentilə görüşüb «İnter»lə müqavilənin müddətini daha bir illik uzatdım. Əlbəttə, göndərilən futbolçularla da bağlı prezident və direktorla görüşüb söhbət edəcəyik.