Kamran Ağayev: “Məgər “Qarabağ” qol vurdu ki, hakim onu saymadı?!”

“Xəzər Lənkəran” klubunun qapıçısı Kamran Ağayevin Qol.Az saytına müsahibəsi

- Dünən kubokun 1/4 final mərhələsinin cavab oyununda öz meydanınızda “Qarabağ”a qalib gəldiniz. Oyunu necə dəyərləndirirsən?
- Ümumiyyətlə, heç bir oyun yüngül olmur. Quzanlıda qeydə alınan ilk nəticədən sonra bizə qələbə qazanmaq lazım idi. Gərgin matç keçdi. Artıq dünənki oyun keçmişdə qaldı. İndi gələcəyə baxmalıyıq.
- Komandanın oyunu barəsində nə deyə bilərsən? “Xəzər Lənkəran”ın göstərdiyi futbol səni qane etdi?
- Məncə, bu sualı baş məşqçiyə ünvanlasanız, daha yaxşı olar. Mən öz oyunuma cavabdehəm. Oyundan bir gün qabaq məşq etmişdim. Həkimlər sual verdilər ki, “özünü yaxşı hiss edirsən?”. Dedim “hə”. Əsas odur ki, top buraxmadım və oyun vaxtı ayağım ağrımadı.
- Dünənki oyun bir növ ağır mübarizə şəraitində keçdi. Bir sıra qalmaqallı məqamlar oldu...
- Biz özümüz bilirik ki, futbolçuların xarakteri necədir. Kim ne edir, necə edir yaxşı bilirik. Sadəcə, mən “Qarabağ”a  yalnız «afərin» deyə bilərəm. Doqquz nəfərlə o cür mübarizə apardılar. Bununla belə, komandanın böyük səhvləri oldu.
- Matçın 87-ci dəqiqəsində “Qarabağ”ın yarımmüdafiəçisi Rəşad Sadiqovun qırmızı vərəqə aldığı epizod barəsində klub tərəfindən narazılıqlar yaranıb...
- Nə bilim, vallah. Bu , hakimin öz fikridir. Amma fikrimcə, Rəşad Sadiqova qırmızı göstərməkdənsə, Maksimə, Zaur Həşimova sarı vərəqə göstərmək lazım idi. Çox sərt oyun göstərirdilər. Birdə ki, əgər hakim vərəqəni göstəribsə, artıq bu barədə danışmaq gecdir.
- “Qarabağ” klubu görüşün baş hakimi Vüsal Əliyevin qərarlarını araşdırması üçün  PFL-ə məktub ünvanlayıb. Məktubda hakimin görüşü birtərəfli idarə etdiyi bildirilir.
- Hakimin bu görüşü birtərəfli idarə etdiyini demək doğru deyil. Bilirsiniz, hakim də səhv edə bilər. Qarabağ hamımızın yaralı yeridir. Amma bu futboldu. Uduzmaqla gərək barışasan. Biz futbolçuların bu məsələyə qarışması düzgün olmazdı. “Qarabağ” bu məsələni özü federasiya ilə aydınlaşdıracaq. Biz, sadəcə, futbol oynamışıq. Zaman-zaman “Xəzər Lənkəran” klubuna qarşı da haqsızlıqlar olub. Biz də uduzmuşuq. Yəni futbolda belə şeylər olur. İnsan da səhv edə bilər. Amma bu o demək deyil ki, görüş başlayandan etibarən Vüsal Əliyev bizə kömək etməyə başladı. Yox. Belə demək haqsızlıqdı. Biz də meydançada qaçırıq, tər tökürük. Məgər, “Qarabağ” qol vurdu ki, hakim onu saymadı?! Bir sıra epizodları oldu. Elvin Məmmədovun, elə Elnurun özünün qol imkanları oldu. Vuraydılar, qol hesaba alınardı. Bundan sonra o qolu kim onların əlindən alacaqdı?
- “Qarabağ” sonadək müqavimət göstərdi. Hətta 9 nəfərlə qaldıqda belə hücumlar təşkil edirdi. Rəqibdən belə oyun gözləyirdin?
- Təbii ki. Bilirdik ki, “Qarabağ” sonadək vuruşacaq. Hər halda əgər uduzsaydıq, biz də dava salardıq. Bu normal haldır. Şəxsən mənə bir oyunçu kimi onların dünən göstərdikləri futbol ləzzət elədi. Çünki kişi kimi xarakterlərini göstərdilər, 9 nəfərdə qalsalar da sonadək «vuruşdular». Bu oyun hər bir komandaya nümunə olmalıdır. Amma “Xəzər Lənkəran” da Azərbaycanda sayılıb-seçilmiş komandadır. Komandamız sıradan heyətə malik bir klub deyil. “Xəzər Lənkəran”la başabaş oynamaq, hətta heç-heçə etmək özü qələbəyə bərabərdir.