"Avropa Oyunlarının ilk günlərində çıxış etsəydik..."

“Bakı-2015” I Avropa Oyunlarında gümüş medal qazanan cüdoçumuz Orxan Səfərov Qol.Az saytına müsahibə verib.

- İlk öncə keçirdiyin bütün görüşlər haqda fikirlərini öyrənək...

- Avropa reytinqində birinci olduğum üçün 1/16 finaldan azad idim. 1/18 finalda isə Belarus idmançısı ilə qarşılaşdım. Finala qədər İsveç və İspaniya idmançıları ilə görüşdüm. Finalda rusiyalı idmançısı ilə qarşılaşdım və məğlub oldum. Qızıl medal qazana bilməsəm də, məni dəstəkləyən hər kəsə təşəkkür edirəm. İnanın arenadakı dəstəyi gördükdə gözlərim dolmuşdu.

- Finala qədər üz-üzə gəldiyin rəqiblərlə daha öncə qarşılaşmışdın?

- Yox, daha öncə onların hamısı ilə qarşılaşmışdım və heç vaxt da məğlub olmamışdım. Hətta bəziləri beynəlxalq yarışlarda 2-3 dəfə mənə rəqib olublar.

- Finalda qarşılaşdığın Rusiya cüdoçusu Bestan Mudranovla necə?

- Bestan Mudranovla buna qədər iki dəfə qarşılaşmışdım. Aramızdakı hesab 1:1 idi. “Bakı-2015”in finalından sonra isə hesab 1:2 oldu. Çalışacam ki, onu dünya çempionatında məğlub edim və aramızdakı hesabı bərabərləşdirim.

- Yarışdan öncə rəqiblərinlə hər hansı söhbətin olubmu? Ölkəmiz və Avropa oyunları ilə bağlı nə deyiblər?

- Onlar Azərbaycanda olmaqdan çox məmnundurlar. Hətta bəziləri Atletlər kəndini görəndən sonra şok olmuşdular. Özləri də etiraf edirlər ki, Azərbaycandan belə təşkilatçılıq gözləmirdilər. Yarışa çıxmamışdan öncə də arenadakı atmosferdən danışırdılar.

- Cüdo yarışlarına Avropa Oyunlarının son günlərində start verildi. Bu səbəbdən idmançılarda hər hansı həyəcan hiss olunurdumu?

- Bu günə kimi hara gedirdiksə, “Bakı-2015” haqqında danışılır, idmançılarımızın çıxışları müzakirə olunurdu. Bu da istər-istəməz bizi həyəcanlandırırdı. Əsas da məsuliyyət hissi bizi narahat edirdi. Bəlkə də Avropa Oyunlarının ilk günlərində çıxış etsəydik, bizim üçün daha rahat olardı.

- Avropa Oyunlarının Azərbaycanda keçirilməsi idmançılarımız üçün nə dərəcədə üstünlükdür?

- Bu gün biz çox gözəl bir idman bayramı yaşayırıq. “Bakı-2015” Azərbaycanın dünyada tanınması baxımından da böyük rol oynayır. İdmançılarımız üçün də xüsusi üstünlükdür. Çünki tatamiyə çıxanda insanların alqışları, arenada yaxınlarının olması bizə əlavə güc verir. Çox istərdim bir gün Yay Olimpiya Oyunları da Bakıda keçirilsin.

- Sənə bu yarışda ən çox dəstək verən kim oldu?

- Ən çox dəstək ailəm tərəfindən gəldi. Bu günə qədər də nə əldə etmişəmsə, buna onların sayəsində nail olmuşam. Bu qələbəni də onlara həsr edirəm.

Ergün SEYİD