Cüdoçu Validə Mirzəzadə: “Bizi dost da tanıyacaq, düşmən də”

Bakının ev sahibliyi etdiyi ilk Avropa Oyunlarında təmsilçilərimizdən biri də 70 kq çəki dərəcəsində mübarizə aparacaq cüdoçu Validə Mirzəzadədir. Bir çox beynəlxalq turnirin qalibi və mükafatçısı olan Validə dünən gərgin məşq prosesindən sonra Qol.Az saytının suallarının cavablandırıb.

- Yorğun olmağından Avropa Oyunlarına ciddi hazırlaşdığın hiss edilir.

- Əlbəttə, yarışa ciddi hazırlaşırıq. İyunun 26-da çox mötəbər bir idman tədbirində iştirak edəcəm. Bu böyük idman bayramı həm ilk dəfə təşkil olunub, həm də vətənimizdə keçirilir. Hamımız üzərimizə düşən məsuliyyəti yaxşı başa düşürük. Gündə iki dəfə məşq edirik. Təxminən bir həftədir, məşqlərimiz nisbətən yüngülləşib. Əsasən səhvlərimiz üzərində işləyir, məşqçilərin köməkliyi ilə onları aradan qaldırmağa çalışırıq.

- Yəqin bütün Avropa idmançılarının iştirak etdiyi belə bir böyük idman tədbirində birinci dəfədir ki, tatamiyə çıxacaqsan. Həyəcan çoxdur?

- Deməzdim çoxdur, amma var. Bugünlərdə nəinki mən, bütün idmançılar həyəcanlıdırlar. Ancaq bacardığımız qədər bu hissi özümüzdən uzaqlaşdırmağa çalışırıq. Çünki həyəcan bizə ancaq mane ola bilər.

-Azərbaycanda ən çox inkişaf etmiş idman növlərindən biri də cüdodur. Azarkeşlər bu idman növündə də təmsilçilərimizdən çox medal gözləyirlər. Fikrincə, onların etimadlarını doğrulda biləcəksiniz?

- Biz buna çalışırıq. Fikrimcə, həm kişi, həm də qadın  cüdoçularımız uğurlu çıxışlarımızla xalqımızı sevindirəcəyik.

- Hər bir cüdoçunun sevimli fəndi olur.Səndə bu fənd hansıdır?

- Daha çox əks-hücumlara üstünlük verirəm. Təbii ki, hər bir təcrübəli cüdoçu kimi, mənim də rəqiblərim üzərində əsas silahım, ən yaxşı bacardığım fənd var. Amma onu sizə deyə bilmərəm (gülür). Ən azı yarışlar başa çatana qədər.

- Avropa Oyunlarını mütamədi olaraq izləyirsənmi?

- Əfsuslar olsun ki, xeyr. Həm Oyunlara hazırlıq, həm də Atletlər kəndində qalmağımız buna mane olur. Amma efir vasitəsilə idmançılarımızın çıxışlarını izləməyə çalışıram. Bildiyimə görə, artıq qırxa qədər medalımız var.

- İlk Avropa Oyunlarına ev sahibliyi etmək dövlətimizin beynəlxalq aləmdəki statusuna necə təsir göstərəcək?

- İlk növbədə ölkəmizdə idmanın kütləviliyi artacaq. Dünya ölkələri arasında Azərbaycan haqda daha sağlam düşüncələr formalaşacaq. Dost da, düşmən də Azərbaycan idmançılarını tanıyacaq.

Kənan NOVRUZOV