Xetaq Qazyumov bürünc medal qazandı, Cəbrayıl Həsənov son anda uduzdu (YENİLƏNİB)

Bu gün Azərbaycanın London olimpiadasındakı sonuncu iki idmançısı, sərbəst güləşçilər Xetaq Qazyumov və Cabrayıl Həsənov mübarizəyə qoşulub.

XETAQ QAZYUMOV

İlk mərhələdən azad olan 96 kq. çəkidəki milliyyətcə osetin olan legioner idmançımız X.Qazyumov 1/8 finalda belaruslu Ruslan Şeyxovla qarşılaşıb. Pekin olimpiadasının bürünc mükafatçısı olan Ruslan Şeyxova hər iki hissədə 1:0 hesabı ilə qalib gəlib. 1/4 finalda idmançımızın rəqibi Valeri Andritsev (Ukrayna) olub. Bu görüşdə Xetaq ilk hissədə 1:0 hesabıyla qalib gəlsə də, sonrakı iki hissədə 0:1, 1:4 hesabı ilə uduzaraq yarımfinala çıxa bilməyib.

Bununla belə, Ukrayna idmançısı finala vəsiqə qazandığı üçün Qazyumov bürünc medal uğrunda təsəlliverici görüşlərə çıxıb.

Qazyumov bürünc medal uğrunda ilk görüşündə tacikistanlı Rüstəm İsgəndəri ilə mübarizə aparıb.

İdmançımız ilk hissədə rəqibinə 3:1, ikinci hissədə isə 3:0 hesabı ilə qalib gəldi.

Qazyumov bürünc uğrunda son görüşündə isə iranlı idmançı Məhəmməd Yazdani ilə qarşılaşmalı idi. Lakin rəqib idmançı zədəli olduğundan bu görüşə çıxmaqdan imtina edib. Beləliklə, Azərbaycana London olimpiadasında 10-cu medalı qazandıran idmançı Qazyumov oldu.


CABRAYIL HƏSƏNOV

66 kq. çəki dərəcəsində çıxış edəcək C.Həsənov da ilk mərhələdən azaddır. Cəbrayıl 1/8 finalda Bolqarıstan güləşçisi Leonid Bazanla
görüşüb. Bu görüşdə güləşçimiz hər iki hissədə qalib gələrək (3:1, 3:1) 1/4 finala yüksəlib. Bu mərhələdə Cəbrayıl Belarus idmançısı Əli Şabanovla görüşüb. İlk iki hissə 2:2 və 1:1 hesabı ilə yekunlaşıb. İkinci hissədə son xalı qazanan Cəvrayıl olduğu üçün idmançılar üçüncü hissəyə çıxıblar. Bu hissə güləşçimiz 2:0 hesabı ilə qalib gəlib. Lakin Belarus təmsilçiləri hakimlərin qələbəni Cəbrayıla verməsindən narazı qalıblar. Yarımfinalda Cəbrayılın rəqibi Yaponiya güləşçisi Tatşuhiro Yonemitsu olub. İdmançımız hər iki hissədə uduzub (0:2, 0:1). Buna baxmayaraq, Cəbrayılın medal qazanmaq şansı qalır. O, bürünc medal uğrunda görüşə çıxacaq.

Həsənov bürünc medal uğrunda yarışda kubalı Livan Lopezlə qarşılaşıb. Görüş 17:54-də başlayıb.

İlk hissədə idmançımız 3:0 hesabı ilə qalib gəlsə də, ikinci hissədə 0:2 hesabı ilə uduzub. Üçüncü hissədə isə Cəbrayıl son saniyələrdə qələbəni əldən verərək bürünc medal qazanmaq şansını əldən qaçırdı.