"Belə qazonda futbol oynamaq çox ağırdır, bərbaddır" - Coşqun Diniyev

“Araz-Naxçıvan”ın yarımmüdafiəçisi Coşqun Diniyevin QOL.az saytına müsahibəsi

- Misli Premyer Liqasının 17-ci turunda səfərdə “İmişli” ilə bərabərə qaldınız. 2:2 hesablı heç-heçəni necə şərh edərdiniz?

- Oyun haqqında danışılası çox şey yoxdur. Özünüz də meydanın vəziyyətini gördünüz. Həqiqətən də belə qazonda futbol oynamaq çox ağırdır. 2026-cı ildə Azərbaycan Premyer Liqasında belə meydança... Bərbaddır. Bir nömrə kimi çıxış etmək istəyirdik. Lakin bu cür qazonda məşqçinin bizdən tələb etdiyi futbolu göstərmək çox çətin idi. Hər topda sürüşürsən, palçıq... İstədiyimiz olmadı. Qələbə qazansaydıq, bizim üçün daha sevindirici olardı.

- Qazonun vəziyyətini nəzərə alsaq, 1 xalı sizin üçün qənaətbəxş saymaq olar?

- Məncə, rəqiblə müqayisədə biz daha yaxşı idik. Baş məşqçimiz topun bizdə daha çox qalmasını istəyir. Biz də bunun üçün çalışırdıq. Rəqibdən daha yaxşı oynadıq. Sadəcə irəlidə bitiriciliyimiz çatışmadı. Son ötürmələr alınmırdı. Bu da dediyim kimi, qazonun durumundan irəli gəlirdi. Meydanın vəziyyəti normal olsaydı, 3 xal qazanardıq.

- Meydanın durumunu nəzərə almasaq, başqa nə çatışmadı qələbə üçün?

- Məncə, elə əsas problem meydançanın durumu idi. “İmişli” daha əvvəl burada oynayıb deyə öyrəşiblər. Həm də rəqibin sistemi texnikalı futbol tələb etmir. Ona görə də qazonun vəziyyəti bizə daha çox təsir etdi.

- İtirilən 2 xal “Araz-Naxçıvan”ın avrokubok iddiasına nə dərəcədə təsir edəcək?

- Əlbəttə, xal itkisidir. Avrokuboklara vəsiqə qazanmaq istəyən komanda “İmişli” ilə oyunda qələbə qazanmalıdır. Bizim də şansımıza yanvar ayında Quba səfəri düşdü. Nə etmək olar? Qarşıdakı matçlarda bu itkini sığortalamağa çalışacağıq.

- Elmar Baxşıyevin gedişindən sonra komandada nə dəyişib?

- Komanda çox böyük dəyişiklik olmayıb. Heç böyük dəyişiklik üçün vaxt da yox idi. Yeni baş məşqçinin rəhbərliyi altında cəmi 15 gün toplanış keçə bilmişik. Hər məşqçinin öz sistemi var. Yeni baş məşqçimizin sistemi daha çox 1 nömrə ilə oynamağımız və topun bizdə qalmasıdır. Məncə, məşqçinin istədiklərini edə bilsək, daha yaxşı “Araz-Naxçıvan” görə biləcəyik.

- Ümumiyyətlə, Elmar Baxşıyevin gözlənilmədən klubdan göndərilməsi futbolçulara necə təsir etdi?

- Əlbəttə, Elmar müəllimin vaxtında qazanılan nəticələr uğursuz deyildi. Sadəcə bu, rəhbərliyin verdiyi qərardır. Sabah-birigün hər hansı bir futbolçu ilə də yollar ayrıla bilər. Ona görə də bunu normal qarşıladıq. Elmar müəllimə də uğurlar arzulayıram.

- Növbəti turda “Neftçi” ilə qarşılaşacaqsınız. Həmin matçdan gözləntiləriniz nədir?

- Əlbəttə, çətin oyun olacaq. Lakin “Neftçi”yə qarşı daha yaxşı meydanda oynayacağıq. Hər iki komanda avrokuboklara oynamaq istəyir. Ona görə də çox maraqlı görüş olacağını gözləyirəm. İnşallah, sevinən tərəf biz olarıq.